Carcharu dyn o Sir Gaerfyrddin ar ôl i’r heddlu ganfod cyffuriau wedi’u cuddio mewn locer storio yn Llanelli.
Cynnwys y prif erthygl
Carcharu dyn o Sir Gaerfyrddin ar ôl i’r heddlu ganfod cyffuriau wedi’u cuddio mewn locer storio yn Llanelli.
Mae Matthew Davies, sydd â’r llysenw ‘Hillbilly’, o Ddwyfor, Llanelli, wedi’i garcharu am dair blynedd a’i orchymyn i ildio gwerth dros £46,000 o arian cyffuriau ar ôl iddo gael ei ddal yn cuddio cocên a chanabis mewn locer storio fis diwethaf.
Wrth gynnal patrolau arferol ddydd Sadwrn 13 Medi, sylwodd SCCH yn Llanelli ar fan dransit Ford lwyd yn cael ei gyrru gan yrrwr yr oeddent yn amau ei fod wedi’i wahardd rhag gyrru.
Diflannodd y fan a dechreuodd y ddau SCCH – a oedd mewn car heddlu heb farciau’r heddlu arno – chwilio’r ardal hyd nes iddynt ddod o hyd i’r fan wedi’i pharcio tu allan i locer storio yn ardal Dafen, Llanelli.
Gan amau na allai’r ymweliad â’r locer storio fod mor ddiniwed ag yr oedd yn ymddangos, galwodd y SCCH ar eu cydweithwyr yn y maes ymateb am gymorth.
Ar ôl iddynt gyrraedd, aeth swyddogion at y dyn – sydd nawr yn adnabyddus fel Matthew ‘Hillbilly’ Davies – wrth iddo ruthro i geisio cloi’r locer cyn ildio a rhedeg i ffwrdd wrth yr heddlu.
Rhedodd swyddogion ar ei ôl, ond dihangodd Davies a neidio dros ffens, gan ddiflannu o’r golwg.
Gyda'r locer wedi’i adael ar agor ar ôl yr ymgais i’w gloi a fethodd, aeth swyddogion i mewn a chwilio’r uned o dan adran 17 Deddf yr Heddlu a Thystiolaeth Droseddol 1984.
Roedd yr uned yn llawn bagiau o gyffuriau a oedd yn barod ar gyfer y stryd; atafaelodd swyddogion 17 pecyn o gocên a gwerth tua £7000 o ganabis. Roedd offer gwerthu cyffuriau yno hefyd, gan gynnwys tair tafol, tri ffôn symudol, dwy waled a llwy.
Yn nrôr gwaelod cabinet, daeth swyddogion o hyd i dros £46,000 mewn arian parod mewn bwndeli o bapurau £10 ac £20.
Parhaodd ymholiadau dros y penwythnos, a arweiniodd at Davies yn ildio i’r heddlu ddydd Llun 15 Medi. Cafodd ei arestio yng Ngorsaf Heddlu Llanelli ar amheuaeth o fwriadu gwerthu cyffuriau dosbarth A a B. Cafodd y dyn 37 oed ei gyhuddo a’i gadw yn y ddalfa tra bod swyddogion yn parhau i archwilio’r dystiolaeth a atafaelwyd o’r locer storio.
Ymysg y dystiolaeth hon oedd sawl neges WhatsApp a Facebook ar ffônau symudol wedi’u cofrestru i Davies.
Esboniodd tyst sy’n arbenigwr cyffuriau gyda Heddlu Dyfed-Powys bod y negeseuon hyn yn awgrymu bod Davies yn werthwr cyffuriau hysbys a gweithredol yn yr ardal.
Gofynnodd un neges i Davies, “Beth yw’r pris rhataf ar gyfer hanner z, gyfaill?” Esboniodd y tyst arbenigol bod “hanner z” yn cyfeirio at ddêl stryd hanner owns (14 gram) o gyffuriau a reolir. Roedd yn credu mai canabis oedd y cyffur dan sylw yn yr achos hwn.
Roedd neges arall a dderbyniwyd gan Davies yn dweud, “Rho wybod imi pan fyddi di’n actif.” Eglurodd y tyst arbenigol mai term slang y cyfeirir ato wrth gyflenwi cyffuriau yw “actif”. Esboniodd fod gwerthwr yn “actif” pan mae ganddo gyffuriau i’w gwerthu.
Ystyriwyd bod yr 17 bag o gocên wedi’u pecynnu mewn ffordd a oedd yn awgrymu eu bod wedi’u paratoi ar gyfer dosbarthu’r cyflenwad ymlaen. Daeth y tyst arbenigol i’r casgliad bod y cyffuriau a atafaelwyd yn fwy na’r hyn y gellid ystyried yn rhesymol ei fod ar gyfer defnydd personol.
Arweiniodd cryfder y dystiolaeth yn erbyn Davies ato’n pledio’n euog am feddu â’r bwriad o werthu pan ymddangosodd yn Llys y Goron Abertawe ddydd Llun 20 Hydref.
Dychwelodd Davies i’r llys drannoeth lle y cafodd ei ddedfrydu i dair blynedd o garchar am ei droseddau cyffuriau. Plediodd yn euog hefyd i feddu ar eiddo troseddol a chafodd ei orchymyn i roi’r £46,000 mewn arian parod i Heddlu Dyfed-Powys.
Dywedodd y Ditectif Gwnstabl Steve Thomas, y swyddog a oedd yn arwain yr achos: “Arweiniodd meddwl chwim ein SCHTh ni at Davies yn y pen draw, gan ein galluogi i gael gwared ar droseddwr arall o’n strydoedd. Rwy’n gobeithio bod yr achos hwn yn dangos bod gennym ni ffyrdd a chymhelliad i ymchwilio ac erlyn y rhai sy’n diystyru diogelwch y cyhoedd drwy werthu cyffuriau yn ein cymuned. Byddwn ni’n gweithredu’n gadarn yn erbyn cyffuriau yn ein hardal.”