DEDFRYDWYD | Gyrrwr wedi’i dedfrydu am achosi marwolaeth pâr ifanc mewn gwrthdrawiad traffig ffyrdd

Dedfrydwyd gyrrwr a achosodd farwolaethau trasig pâr yn eu 20au drwy yrru diofal i 16 mis o garchar, wedi’i gohirio am 12 mis, yn Llys y Goron Abertawe ddydd Iau 2 Ebrill.

Yn ogystal, gwaharddwyd Alexander MacCallum, 28 oed, o Lanreath yn Noc Penfro, rhag gyrru am 18 mis, ac mae’n rhaid iddo gwblhau 200 awr o waith di-dâl. Cyfaddefodd yn flaenorol i ddau achos o achosi marwolaeth drwy yrru diofal yn yr un llys ar 9 Chwefror eleni. 

Mae’r euogfarn yn ymwneud â digwyddiad am 3.50pm ar 13 Mehefin 2024, pan ddigwyddodd gwrthdrawiad rhwng dau gerbyd ar y ffordd A477 ger Llanddowror. Collodd MacCallum reolaeth ar ei gerbyd Jaguar XK R wrth yrru mewn amodau gwlyb cyn croesi’r gerbytffordd, a gwrthdaro â Ford Fiesta a oedd yn cael ei yrru gan Adam Muskett, 27 oed, gyda’i bartner Katie Worrell, 25 oed, yn deithiwr.

Yn drasig, bu farw Adam yn y fan a’r lle, a chludwyd Katie i’r ysbyty, gydag anafiadau trychinebus, lle bu farw’n ddiweddarach yr un diwrnod.

Mae teuluoedd Adam a Katie wedi cyhoeddi’r datganiad canlynol: “Hoffem ddiolch i’r gwasanaethau brys a oedd yn bresennol y diwrnod tyngedfennol hwnnw a’r bobl a stopiodd i helpu Katie ac Adam. Byddwn ni’n ddiolchgar iddynt am byth.

“Rydyn ni’n cydnabod dedfryd y llys, ond ni fydd yr un ddedfryd yn dod â’n plant a’n brawd a chwaer yn ôl. Gwerthfawrogwn waith Heddlu Dyfed-Powys a Gwasanaeth Erlyn y Goron i sicrhau euogfarn.

“Roedd marwolaethau Adam a Katie’n ddiangen. Buasent dal gyda ni pe na bai’r diffynnydd wedi gyrru ei gar yn y modd y gwnaeth. 

“Rydyn ni nawr yn dymuno preifatrwydd ar ôl taith hir ac anodd i ddiwedd yr erlyniad hwn.

“Anogwn bawb i ystyried y modd a’r cyflymder maen nhw’n gyrru eu cerbydau.”

Dywedodd y Cwnstabl Lucy Brookes, o’r Uned Ymchwilio i Wrthdrawiadau Difrifol: “Yn dilyn marwolaethau trasig Adam a Katie, lansiwyd ymchwiliad llawn i’r gwrthdrawiad, ac ar ôl ystyried y dystiolaeth, penderfynwyd bod dull gyrru MacCallum yn amhriodol ar gyfer yr amodau tywydd gwael iawn. Cafodd ei gyhuddo drwy ofyniad post ym mis Tachwedd 2025, ac y mae bellach wedi cael ei ddedfrydu.

“Mae hwn wedi bod yn ymchwiliad hir i ddigwyddiad a hawliodd fywydau dau unigolyn ifanc. Ni all unrhyw beth ddadwneud colli Adam a Katie, ac mae ein meddyliau’n parhau gyda’u hanwyliaid, sydd wedi dangos dewrder aruthrol drwy gydol y broses hon.”