Swyddogion Gwarant Bro yn carcharu siopladron mynych

Cafodd swyddogion gwarant bro ym Mhowys effaith gadarnhaol yn ystod eu mis cyntaf, gydag ymchwiliadau’n arwain at siopladron mynych yn cael eu carcharu.

Nododd y tîm siopladrata fel prif bryder, ac maen nhw eisoes wedi datrys 22 trosedd. Cyflawnwyd 15 o’r troseddau hynny gan dri throseddwr mynych. Cawsant eu cyhuddo a’u cadw yn y ddalfa cyn derbyn cyfanswm o 37 wythnos o garchar.

Arweiniodd eu hymagwedd ragweithiol at y saith trosedd siopladrata arall yn cael eu datrys gyda gorchmynion datrys cymunedol neu addysg. Mae’r ymagwedd hon sy’n canolbwyntio ar ddioddefwyr yn anelu i atgyweirio niwed a achosir gan drosedd.

Mae’r swyddogion hyn wedi cael eu darparu drwy’r Warant Bro. Mae’r fenter hon yn defnyddio cyllid gan y Swyddfa Gartref i gynyddu adnoddau mewn plismona bro. Y nod yw helpu i gryfhau atal trosedd a diogelwch cymunedol.

Cyflwynodd y warant hon bum swyddog Plismona Bro ychwanegol i ardal Sir Drefaldwyn. Daethant yn weithredol ddechrau Mawrth ac maen nhw wedi canolbwyntio ar faterion cymunedol yn ystod eu mis cyntaf.

Maen nhw wedi bod yn patrolio yn ardaloedd siopa’r Drenewydd a’r Trallwng. Mae’r rhain wedi bod yn gymysgedd o batrolau amlwg a phatrolau mewn dillad cyffredin i aflonyddu ar droseddwyr. Mae’r swyddogion hefyd wedi cefnogi timoedd eraill â dod o hyd i droseddwyr perygl uwch yn y gymuned, galwadau pryderon lles, a gwrthdrawiadau traffig y ffyrdd.

Dywedodd y Prif Arolygydd Matthew Price o Heddlu Dyfed-Powys:  

“Mae hyn wedi bod yn ddechrau cadarnhaol iawn, ac mae’r manteision i’w gweld yn barod. Rwy’n hyderus y bydd y swyddogion yn cario’r momentwm hwn ymlaen ac yn parhau i greu cysylltiadau â phobl leol.

“Mae hyn wedi rhoi llwyfan da iddynt barhau i fynd i’r afael â materion cymunedol ac atal gweithgarwch troseddol gyda phlismona a arweinir gan gudd-wybodaeth. Bydd ymgysylltu cymunedol yn allweddol ar gyfer casglu’r wybodaeth hon ac mae’n dda gennyf weld bod hyn eisoes yn digwydd.”

Yn ogystal â’u hymchwiliadau a’u gwaith atal, ymwelodd y tîm â Choleg y Drenewydd i siarad â swyddogion posibl y dyfodol a hyrwyddo’r rhaglen Cwnstabliaid Gwirfoddol. Swyddogion Heddlu gwirfoddol yw Cwnstabliaid Gwirfoddol sydd â phwerau heddlu llawn, lifrai ac offer. Maen nhw’n gweithio ochr yn ochr â SCCH a Swyddogion Heddlu llawn amser.

Mae’r heddlu’n derbyn ceisiadau ar hyn o bryd ar gyfer Cwnstabliaid Gwirfoddol, a byddai unrhyw ymgeiswyr llwyddiannus yn ardal Trefaldwyn yn gweithio gyda’r tîm plismona bro newydd yn dilyn hyfforddiant. Cewch ragor o wybodaeth am Gwnstabliaid Gwirfoddol a’r broses ymgeisio ar Rôl Cwnstabl Gwirfoddol | Heddlu Dyfed-Powys