Dedfrydu bachgen yn ei arddegau am ymosod ar athrawes yn Ysgol Gyfun Aberdaugleddau

Mae bachgen 16 oed wedi ei ddedfrydu i bedair blynedd a hanner wedi iddo ymosod ar athrawes tra roedd wedi ei arfogi â chyllell mewn ystafell ddosbarth.

Ar 5 Chwefror eleni, fe wnaeth y bachgen yn ei arddegau, a oedd yn 15 oed ar y pryd – ac na ellir ei enwi am resymau cyfreithiol – ddilyn  y dioddefydd i ystafell ddosbarth a gofyn am gymorth gyda gwaith cartref cyn ymosod arni.

Llwyddodd yr athrawes i ddiarfogi’r bachgen yn ei arddegau, fodd bynnag cafodd anafiadau a oedd angen eu trin mewn ysbyty. Yn ffodus, llwyddodd wella yn dilyn triniaeth.

Yng Ngorffennaf, cafwyd y bachgen yn euog o anafu bwriadol. Roedd eisoes wedi pledio’n euog i fod â chyllell yn ei feddiant.

Dywedodd yr Uwch Swyddog Ymchwilio, y Ditectif Arolygydd Sarah Totterdale: “Yn dilyn y digwyddiad ofnadwy hwn yn Chwefror, aeth ein swyddogion yn gyflym i’r safle yn Ysgol Gyfun Aberdaugleddau ynghyd â gwasanaethau brys eraill, a gosodwyd cyfyngiadau symud.

“Ychydig yn ddiweddarach, llwyddom ganfod ac arestio’r bachgen a oedd yn 15 oed ar y pryd, ac yn dilyn hynny cafodd ei gyhuddo ar 7 Chwefror.

“Mae’r dioddefydd yn yr achos hwn wedi dangos dewrder aruthrol, ac mae’n rhaid bod ail-fyw digwyddiadau’r diwrnod hwnnw yn ystod y treial wedi bod yn drawmatig dros ben. Rydym yn ddiolchgar am ei chymorth yn yr ymchwiliad hwn, ac rydym yn gobeithio y gall gydag amser roi’r profiad erchyll hwn y tu ôl iddi.

“Rydym hefyd yn ddiolchgar i athrawon a myfyrwyr Ysgol Gyfun Aberdaugleddau a’r gymuned leol, a fydd hefyd wedi teimlo effaith y digwyddiad hwn yn fawr.  Yn olaf, diolch i’n partneriaid yn y gwasanaethau brys a Chyngor Sir Penfro am eu cymorth, ac i aelodau’r gymuned ehangach am eu cefnogaeth.”