DEDFRYD | Dedfrydu dyn a dreuliodd dwy flynedd ar ffo yn dilyn ymosodiad cemegol.

DEDFRYD | Dedfrydu dyn a dreuliodd dwy flynedd ar ffo yn dilyn ymosodiad cemegol.

Mae Dean Mayze wedi’i ddedfrydu i 18 mis yn y carchar, ar ôl iddo bledio’n euog i achosi niwed corfforol difrifol yn dilyn ymosodiad cemegol a niweidiodd dyn yn ddifrifol ym mis Rhagfyr 2022.

Arestiwyd y dyn busnes 38 oed o Aber-craf gan heddlu Rwmania ddydd Gwener 19 Medi 2025 ar ôl i warant ryngwladol gael ei chyhoeddi ar gyfer ei arést.

Clywodd y llys sut yr oedd Dean Mayze, perchennog busnes, wedi ymosod ar westai a oedd yn aros yn ei encilfa ysbrydol, Hafan-y-Coed, yn Aber-craf, ar ôl i’r ddau ddechrau cweryla.

Dywedwyd bod sylwedd cemegol a ddisgrifir fel ‘alcalin cryf iawn’ wedi’i dynnu o boced Mayze yn ystod y cweryl, a’i daflu at lygaid, trwyn a cheg y dioddefydd.

Er gwaethaf ymdrechion taer y dioddefydd i olchi’r cemegyn i ffwrdd, bu’n rhaid iddo fynd i’r ysbyty gydag anafiadau difrifol i’w wyneb, gan gynnwys colli rhan o’i amrant, a oedd angen misoedd o driniaeth.

Aeth Heddlu Dyfed-Powys ati i arestio Mayze fel rhan o’u hymchwiliad, ond yn ddiweddarach, cawsant wybod bod y drwgdybyn wedi dianc o’r wlad.  

Treuliodd Mayze dros ddwy flynedd yn osgoi’r heddlu wrth iddo deithio drwy dir mawr Ewrop, a hynny tra’n wynebu cyhuddiadau troseddol difrifol nôl yn y DU.

Fel rhan o’r ymgais i ddianc rhag yr heddlu, aeth Jemma Webb, partner Mayze a chydberchennog yr encilfa ysbrydol, at yr heddlu a chyfaddef ei bod hi wedi taflu’r cemegyn a niweidio’r dioddefydd.

Darganfu ymholiadau pellach gan yr heddlu fod Webb wedi bod mewn cysylltiad rheolaidd â Mayze, a’i bod hyd yn oed wedi teithio i Ewrop i ymweld ag ef. Yn ddiweddarach, cafodd ei chyhuddo o wyrdroi cwrs cyfiawnder. Dedfrydwyd Webb, 38 oed, i wyth mis o garchar, wedi’i atal am 18 mis.

Ym mis Tachwedd 2023, cyhoeddwyd gofyniad post i Mayze i ateb cyhuddiad o achosi niwed corfforol difrifol â bwriad, ond ni ymddangosodd yn ei wrandawiad llys.

Parhaodd ymholiadau arést, ac yn y diwedd, daethpwyd o hyd i Mayze yn Rwmania, lle y cafodd ei arestio cyn cael ei anfon nôl i’r DU. Cafodd ei gadw ar remand yn y ddalfa ddydd Gwener 20 Medi.

Ymddangosodd Mayze yn y llys ar 13 Ionawr 2026, lle y gwadodd y cyhuddiad o achosi niwed corfforol difrifol â bwriad. Yn hytrach, plediodd yn euog i gyhuddiad llai, sef achosi niwed corfforol difrifol, a gafodd ei dderbyn yn y gwrandawiad.  

Heddiw, yn Llys y Goron Abertawe, dedfrydwyd Mayze i 18 mis yn y carchar.

Dywedodd y Ditectif Arolygydd Christine Beaton: “Mae dedfryd heddiw’n nodi canlyniad ymchwiliad hir a chymhleth, gan ddwyn Dean Mayze gerbron y llys i wynebu canlyniadau ei weithredoedd ffiaidd yn 2022.

“Rwyf eisiau diolch i’r tîm ymchwilio a weithiodd yn ddiflino i ddod â Mayze nôl i’r DU, ac i’r cyhoedd am rannu ac ymateb i’n hapêl i ddod o hyd i’r troseddwr peryglus hwn.

“Ni fyddwn yn dioddef unrhyw fath o drais yma yn Nyfed-Powys, ac mae’r canlyniad hwn yn dangos y byddwn yn erlid troseddwyr o’r fath yn ddiflino.”