Dyn yn pledio'n euog ar ôl i stop traffig arferol ddatgelu cyffuriau anghyfreithlon gwerth dros £150,000

Mae dyn wedi pledio’n euog ar ôl i gyffuriau Dosbarth A a Dosbarth B gwerth dros £150,000 gael eu darganfod wrth i draffig gael ei stopio fel mater o drefn ar Hoyland Road, Penfro.

Fore ddydd Gwener 2 Ionawr, fe wnaeth Uned Plismona’r Ffyrdd leol stopio a gwirio cerbyd Seat Acea llwyd Dean Evans, 43 oed, fel mater o drefn. Chwiliwyd Evans a’i gerbyd o dan y Ddeddf Camddefnyddio Cyffuriau yn dilyn ei sylwadau y byddai swyddogion yn dod o hyd i ‘stwff’ yn y car. 

Arestiwyd Evans ar amheuaeth o feddu â’r bwriad o gyflenwi cyffuriau a reolir ar ôl i flwch cardfwrdd a oedd yn cynnwys bloc un cilogram o gocên a deg pecyn hanner cilogram o ganabis llysieuol gael eu darganfod yng nghist y Seat. Roedd gwerth y cyffuriau ar y stryd ymhell dros £150,000.

Arweiniodd chwiliad dilynol o eiddo Evans at swyddogion yn atafaelu car Mercedes AMG du a beic modur VOGE DS900 o dan y Ddeddf Elw Troseddau hefyd. Yn ogystal, daethpwyd o hyd i waled â dros £200 mewn arian parod a bag clir yn cynnwys sylwedd gwyn yn y Mercedes. Mae profion wedi dangos mai cocên oedd yn y bag clir.

Cyhuddwyd Evans o feddu â’r bwriad o gyflenwi cyffuriau dosbarth A a B, ac fe blediodd yn euog yn Llys y Goron Abertawe ddydd Sadwrn 3 Ionawr. Y mae wedi’i gadw yn y ddalfa a bydd yn ymddangos yn y llys ddydd Gwener 23 Ionawr i gael ei ddedfrydu