EUOG | Dau o Gasnewydd yn y ddalfa yn dilyn byrgleriaethau cefn wrth gefn o glybiau golff

EUOG | Dau o Gasnewydd yn y ddalfa yn dilyn byrgleriaethau cefn wrth gefn o glybiau golff  

Mae dau ddyn wedi pledio’n euog ar ôl targedu clybiau golff yn Hwlffordd a Chaerfyrddin mewn sbri byrgleriaethau dros nos.

Cyhuddwyd Mikael Bourkhari, 45 oed, a Simon Dickey, 38 oed o Gasnewydd, De Cymru, â dau achos o fyrglera ac un achos o rwystro’r heddlu.

Tua 12.45 o’r gloch fore ddydd Sul 18 Ionawr, derbyniodd Heddlu Dyfed-Powys alwad yn adrodd bod y larwm lladron yn canu yng Nghlwb Golff Hwlffordd.

Pan gyrhaeddodd swyddogion chwe munud yn ddiweddarach, roedd hi’n amlwg bod yr adeilad wedi’i dargedu’n fwriadol a bod grym wedi’i ddefnyddio i dorri i mewn iddo.

Â’r larwm dal yn canu a golau’n tywynnu o’r tu mewn, aeth swyddogion i mewn i’r clwb golff, yn barod i ddal yr ymwthiwr.

Yn lle hynny, fe wnaethon nhw ddarganfod bod yr olygfa wedi cael ei gadael a'i difrodi'n ddrwg.

Cyrhaeddodd perchnogion y clwb yn fuan wedi hynny, gan nodi bod sawl clwb golff gwerth £100 - £500 yr un wedi’u cymryd o siop y clwb. Amcangyfrifwyd bod cyfanswm gwerth yr eitemau a gafodd eu dwyn tua £36,000.

Tra bod swyddogion yn diogelu tystiolaeth yn lleoliad y digwyddiad, casglodd staff yr ystafell reoli ym Mhencadlys yr Heddlu gudd-wybodaeth ar gerbydau yn yr ardal a allai fod yn gysylltiedig â’r drosedd.

Nodwyd fan Vauxhall goch fel rhan o’u hymholiadau, a rhannwyd disgrifiad o’r cerbyd â swyddogion yn Sir Benfro a Sir Gaerfyrddin.

Gyda swyddogion dros y ffin wedi’u hysbysu am y fyrgleriaeth, penderfynodd unedau lleol batrolio’r clwb golff yng Nghaerfyrddin er mwyn bod yn ddiogel. Ar ôl iddynt gyrraedd, roedd hi’n amlwg bod clwb golff Caerfyrddin wedi ei dargedu hefyd.

Roedd difrod helaeth i’r drws ffrynt, a throsol melyn wedi ei adael yn lleoliad y digwyddiad. Amcangyfrifwyd bod clybiau golff gwerth tua £7,000 hefyd wedi cael eu dwyn o'r safle. Amcangyfrifwyd hefyd fod difrod gwerth tua £5,000 wedi'i achosi i'r adeilad.

Ychydig ar ôl 2 o’r gloch y bore, daeth Swyddogion Plismona’r Ffyrdd o hyd i’r cerbyd dan sylw yn teithio ar hyd yr A48 i gyfeiriad Pont Abraham, er gwaethaf platiau rhif ffug wedi’u gosod ar y cerbyd.

Stopiwyd y fan, a daethpwyd o hyd i nifer anarferol o fagiau a chlybiau golff tu mewn. Arestiwyd y gyrrwr a’i deithiwr – a ddywedodd mai “Richard Smythe” a “Michael Hale” oedd eu henwau – ar amheuaeth o fyrglera.

Nôl yn y ddalfa, cyfaddefodd y pâr eu bod wedi rhoi enwau ffug ac fe’u harestiwyd ymhellach ar amheuaeth o rwystro’r heddlu.

Cafodd yr holl eitemau a gafodd eu dwyn eu hadfer a'u dychwelyd i'r clybiau golff.

Ymddangosodd Mikael Bourkhari a Simon Dickey yn Llys Ynadon Llanelli’r bore canlynol (19 Ionawr), gan bledio’n euog i’r ddau achos o fyrglera ac un achos o rwystro’r heddlu.

Cafodd y ddau eu cadw yn nalfa’r heddlu hyd nes iddynt gael eu dedfrydu ddydd Llun 2 Chwefror.

Dywedodd y Ditectif Ringyll Sophie Lambert o Heddlu Dyfed-Powys: “Mae gan droseddau fel hyn effaith ddifrifol ar y gymuned, yn enwedig y rhai sydd â’u bywoliaeth wedi’i hadeiladu ar lwyddiant eu busnes.

“Roedd hon yn enghraifft wych o dimoedd lluosog ar draws lleoliadau gwahanol yn cydweithio i atal y troseddwyr hyn.

“Chwaraeodd y gwaith gan staff yr ystafell reoli i adnabod y cerbyd drwgdybiedig yn gyflym ran hollbwysig o ran y rhyng-gipio buan gan ein Swyddogion Plismona’r Ffyrdd. Heb os nac oni bai, fe wnaeth yr ymateb cydlynol hwn atal troseddau pellach.”