Pledion euog am fyrgleriaeth £6,400 o garej Tesco
Cynnwys y prif erthygl
Mae dau ddyn wedi pledio’n euog i fyrgleriaeth yng ngarej petrol Tesco yn y Trallwng, lle cafodd bron £6,400 mewn arian parod ei ddwyn.
Derbyniodd swyddogion Heddlu Dyfed-Powys adroddiad am fyrgleriaeth yn yr orsaf betrol ar Mill Lane ychydig cyn 1.30 o’r gloch y bore ar 2 Ionawr.
Dangosodd TCC ddau unigolyn yn cyrraedd ar e-feiciau, yn cael mynediad i’r adeilad, ac yn mynd ag arian parod o goffrau.
Dygwyd bron £6,400 mewn arian parod.
Yn ddiweddarach y diwrnod hwnnw, stopiodd swyddogion plismona’r ffyrdd gerbyd yr oeddent yn credu oedd yn gysylltiedig â’r digwyddiad, ac arestiwyd y ddau ddyn.
Daethpwyd o hyd i ddau e-feic yng nghefn y cerbyd, ynghyd â dillad a oedd yn debyg i’r dillad roedd y drwgdybiedigion yn gwisgo.
Cyhuddwyd Ashley Owens, 41 oed, o Crosfield Road, Lerpwl, a John Bishop, 36 oed, o Ismay Street, Lerpwl, â byrgleriaeth. Cafodd Owens ei gyhuddo o feddu ar gyffuriau dosbarth A hefyd.
Dywedodd y Ditectif Ringyll Zoe Powell, o CID Powys: “Mae hon yn enghraifft o waith ardderchog rhwng nifer o adrannau yn y Drenewydd a’r Pencadlys a gyfrannodd at y cyhuddiadau hyn a’r pledion euog cynnar.
“Does dim amheuaeth nad yw eu gwaith wedi atal y troseddwyr teithiol hyn rhag cyflawni rhagor o droseddau.”