CARCHARWYD | Dau frawd wedi’u carcharu am achosi marwolaeth tad annwyl o Bowys

Mae dau frawd wedi cael eu dedfrydu i garchar am achosi marwolaeth tad annwyl mewn gwrthdrawiad traffig ffordd ym mis Tachwedd 2024.

Lladdwyd Rhys Jenkins, yn drasig, ac anafwyd ei fab yn ddifrifol pan darwyd eu Toyota gan BMW Abubakr Yusaf, a oedd newydd droi cornel ar ochr anghywir y ffordd ychydig eiliadau cyn y ddamwain.

Ar ddydd Gwener yn Llys y Goron yr Wyddgrug, cafodd Abubakr Yusaf, 31 oed, o Esmond Road, Manceinion ei ddedfrydu i 14 o flynyddoedd yn y carchar, ar ôl ei gael yn euog o achosi marwolaeth drwy yrru'n beryglus, achosi anaf difrifol drwy yrru'n beryglus ac achosi marwolaeth heb yswiriant.

Cafodd ei frawd Umar Yusaf, 35 oed, o Esmond Road, Manceinion, ei ddedfrydu i ddwy flynedd a naw mis yn y carchar hefyd ar ôl ei gael yn euog o achosi marwolaeth drwy yrru'n ddiofal ac achosi anaf difrifol drwy yrru'n ddiofal.

Cafwyd y ddau yn euog yn dilyn achos llys wyth diwrnod o hyd pan glywodd y llys am ras ffordd ‘ddi-hid’ y brodyr wrth iddynt deithio adref o Aberystwyth i Fanceinion mewn ceir ar wahân.

Dywedodd tystion eu bod nhw wedi gweld y brodyr yn goddiweddyd yn beryglus dros ben ar hyd y rhan o’r ffordd, ac yn goryrru, yn gyrru’n rhy agos, ac yn fflachio eu prif oleuadau at geir eraill er mwyn ceisio mynd heibio iddynt.

Ychydig ar ôl i’r ddau frawd fynd rownd tro ar yr ochr anghywir o’r ffordd, gwrthdarodd BMW Abubakr benben â Toyota a oedd yn cael ei yrru gan Rhys Jenkins yn y Belan. 

Wrth i yrwyr eraill stopio i helpu’r tad a’i fab, dihangodd y brodyr o’r lleoliad yn Audi S4 Umar.

Aeth y gwasanaethau brys i leoliad y gwrthdrawiad, ac yn anffodus, cadarnhawyd bod Mr Jenkins wedi marw o’i anafiadau catastroffig. Aed â’i fab 9 oed, a oedd yn deithiwr yn y car, i’r ysbyty mewn ambiwlans awyr, lle y treuliodd 10 diwrnod yn cael ei drin am ei anafiadau.

O fewn 40 munud i’r gwrthdrawiad, gyrrodd Umar Yusaf, sy’n 34 oed, yn ôl i leoliad y gwrthdrawiad a dywedodd wrth SCCH bod yr unigolyn cyfrifol gydag ef.

Arestiwyd y brodyr ar amheuaeth o achosi marwolaeth drwy yrru peryglus, a lansiwyd ymchwiliad gan Uned Ymchwilio i Wrthdrawiadau Difrifol Heddlu Dyfed-Powys.

Disgrifiwyd y ffordd yr oedd y brodyr yn gyrru fel gyrru ‘di-hid’ ac ‘afreolaidd’, ac yn gyson â rasio, mewn datganiadau gan nifer o dystion. Er nad oedd car Umar yn gysylltiedig â’r gwrthdrawiad yn uniongyrchol, pennwyd bod natur ‘gystadleuol’ ei yrru wedi cyfrannu’n sylweddol at y digwyddiad angheuol.

Cyhuddwyd y brodyr o achosi marwolaeth drwy yrru’n beryglus, achosi anaf difrifol drwy yrru’n beryglus, a methu â stopio yn dilyn gwrthdrawiad traffig y ffyrdd.

Dywedodd y Rhingyll Sara John o'r Uned Ymchwilio i Wrthdrawiadau Difrifol: “Ni all y dedfrydau a gyhoeddwyd heddiw ddadwneud y golled drasig y mae teulu Rhys wedi’i dioddef, ac maent wedi dangos cryfder rhyfeddol drwy gydol yr ymchwiliad a’r broses llys hon.

“Rwy’n gobeithio y bydd canlyniad heddiw yn rhoi rhywfaint o dawelwch meddwl iddyn nhw wrth iddyn nhw ddechrau symud ymlaen â’u bywydau, sydd wedi newid am byth.

“Roedd gweithredoedd Abubakr ac Umar Yusaf ar y diwrnod hwnnw yn drychinebus. Mae eu dewis i yrru yn y ffordd y gwnaethon nhw'n dangos eu diffyg parch llwyr tuag at ddefnyddwyr eraill y ffordd.

“Ni ellir byth gor-bwysleisio effaith eu gweithredoedd.

“Mae dedfrydu heddiw yn nodi diwedd ymchwiliad cymhleth, a hoffwn ddiolch i’r holl dystion a gefnogodd yr achos a’r tîm ymchwilio diwyd a weithiodd i ddod ag Abubakr ac Umar Yusaf gerbron y llysoedd.

“Mae fy meddyliau olaf yn parhau i fod gyda theulu ac anwyliaid Rhys sydd wedi dangos dewrder rhyfeddol drwy gydol yr amser trasig hwn, a hoffwn ddiolch yn ddiffuant iddyn nhw.”