Canfod dyn o Sir Gaerfyrddin yn euog o ymgais i lofruddio yn dilyn achos o drywanu ym Mharc Caerfyrddin

Mae James McKenna, 57 oed, wedi’i ganfod yn euog o ymgais i lofruddio yn dilyn achos wythnos o hyd yn Llys y Goron Abertawe.  

Roedd y dyn 57 oed eisoes wedi pledio’n euog i feddu ar eitem â llafn mewn man cyhoeddus, a chlwyfo bwriadol, ond gwadodd ymgais i lofruddio ar ôl iddo drywanu ei gyn bartner mewn ymosodiad ym Mharc Caerfyrddin.

Derbyniodd yr heddlu adroddiad tua 4 o’r gloch brynhawn ddydd Iau 29 Ionawr bod dyn wedi trywanu dynes sawl gwaith, gan arwain at sawl rhwygiad ac anafiadau trywanu i’w brest, braich a llaw.

Rhedodd y drwgdybyn i ffwrdd o’r lleoliad, ac aeth yr heddlu ati i chwilio amdano i’w arestio. Wrth chwilio, daethpwyd o hyd i sach deithio a oedd yn cynnwys cyllell â gwaed arni mewn rhandir cyfagos – ond doedd dim golwg o’r drwgdybyn.

Yn dilyn ymdrech galed i olrhain ei symudiadau i ardal Ceredigion, arestiodd yr heddlu James McKenna ar amheuaeth o ymgais i lofruddio ddydd Llun 2 Chwefror yn Aberystwyth. Wedi hynny, cafodd ei gyhuddo a’i gadw yn y ddalfa ddydd Mercher 4 Chwefror.

Yn ddiweddarach, plediodd McKenna’n euog i feddu ar eitem â llafn mewn man cyhoeddus, a chlwyfo bwriadol. Gwadodd y cyhuddiad o ymgais i lofruddio.  

Heddiw, dydd Llun 27 Gorffennaf, canfu’r rheithgor yn Llys y Goron Abertawe James McKenna, 57 oed, yn euog o ymgais i lofruddio. Bydd yn cael ei ddedfrydu ar 2 Medi.

Dywedodd yr uwch swyddog ymchwilio, y Ditectif Brif Arolygydd Siân Davies: “Hoffwn ddiolch i’r gymuned leol am eu cefnogaeth yn ystod adeg ysgytiol a gofidus iawn i bobl Caerfyrddin a thu hwnt.

“Hoffwn ddiolch hefyd i bawb a gyflwynodd gwybodaeth yn ystod ein hapêl gyhoeddus i ddod o hyd i McKenna yn dilyn yr ymosodiad ofnadwy hwn.

“Mae digwyddiadau o’r natur hwn yn brin iawn yn ein hardal heddlu, ac ry’n ni wedi ymrwymo o hyd i fynd i’r afael â thrais yn erbyn menywod a merched.

“Dangosodd gweithredoedd James McKenna’r diwrnod hwnnw lefel arswydus o drais wedi’i gynllunio ymlaen llaw a allai’n rhwydd fod wedi arwain at farwolaeth y dioddefydd. Estynnaf fy niolch i’r rheithgor am eu dyfarniad yn yr achos hwn.

“Gobeithio bod canlyniad heddiw’n rhoi rhywfaint o dawelwch meddwl i’r dioddefydd wrth iddi ddechrau symud ymlaen â’i bywyd.

“Hoffwn gydnabod ymrwymiad swyddogion a staff ar draws Heddlu Dyfed-Powys a oedd yn gysylltiedig â’r ymateb cyntaf i’r digwyddiad, y chwiliad i ddod o hyd i’r drwgdybyn, a’r ymchwiliad dyfal a ddilynodd.

“Diolch i’w gwaith caled nhw, a’r ddedfryd a roddwyd gan y rheithgor, mae James McKenna wedi’i ganfod yn euog o’r weithred dreisgar ysgytiol hon.

“Mae’n disgwyl ei ddedfryd.”