DEDFRYD | Carcharu treisiwr am 22 flynedd

Mae treisiwr a gafodd ei ddyfarnu’n euog o gyflawni sawl trosedd, gan gynnwys treisio, cyffwrdd rhywiol, ac annog merch i gymryd rhan mewn gweithgarwch rhywiol, wedi ei garcharu am 22 flynedd yn Llys y Goron Abertawe.

Carcharwyd Damien Jones, 40 oed, o Lanelli, ddydd Llun (6/7) ar ôl i reithgor ei ganfod yn euog o’r canlynol ddydd Mercher 6 Mai eleni:

• Pedwar achos o dreisio merch dan 13
• Dau achos o gyffwrdd â merch dan 13 yn rhywiol
• Tri achos o ymosod yn rhywiol ar ferch dan 13 drwy dreiddio
• Pedwar achos o annog merch dan 13 i gymryd rhan mewn gweithgarwch rhywiol heb dreiddio
• Tri achos o annog merch 13 i 15 oed i gymryd rhan mewn gweithgarwch rhywiol drwy dreiddio

Digwyddodd y troseddau rhwng 2013 a 2021 ac maen nhw’n ymwneud ag un dioddefydd, sef merch a oedd yn iau na 15 oed ar y pryd.  

Yn ogystal â’r ddedfryd o garchar, gwnaed Jones yn destun gorchymyn atal rhag niwed rhywiol amhenodol a gorchymyn atal amhenodol yn erbyn y dioddefydd.

Dywedodd y Ditectif Gwnstabl Leanne Morris o CID De Powys: “Hoffwn gymryd y cyfle hwn i ganmol y dewrder a ddangoswyd gan y dioddefydd yn yr achos hwn yn gyntaf ac yn bennaf. Mae hi wedi dangos dewrder aruthrol drwy roi ei chyfrif inni, yn ogystal ag ymddangos yn y llys i roi tystiolaeth yn ystod yr achos hwn. Rydyn ni’n ddiolchgar dros ben am ei chryfder a’i dewrder o ran sicrhau bod Jones yn cael ei ddwyn gerbron y llysoedd, ac yn y pen draw, cael ei ddedfrydu.

“Mae Jones yn amlwg yn unigolyn peryglus iawn, ac mae dedfryd heddiw’n dangos natur ei droseddau anfoesol. Diolch byth, nid yw’n berygl i’r cyhoedd mwyach. Mae’r tîm ymchwilio yn yr achos hwn wedi dangos proffesiynoldeb arbennig a gwaith caled o ran sicrhau’r canlyniad hwn.”

Os oes angen cefnogaeth arnoch ar gyfer trais neu drosedd rhywiol, cewch gymorth a chefnogaeth fan hyn: Cefnogaeth ar ôl trais rhywiol ac ymosodiad rhywiol | Heddlu Dyfed-Powys

Er mwyn adrodd am drais neu drosedd rhywiol, galwch heibio i’n gwefan fan hyn: Adrodd am dreisio, ymosod rhywiol a throseddau rhywiol eraill | Heddlu Dyfed-Powys