Mae troseddau siopladrata wedi gostwng yn Llanelli

Mae nifer y troseddau siopladrata yn Llanelli wedi gostwng yn ystod y misoedd diwethaf ar ôl i swyddogion weithio i dargedu troseddwyr mynych a helpu siopau i gyflwyno mwy o fesurau atal.

Targedodd Tîm Plismona Bro ac Atal Llanelli siopladron mynych ar draws y dref ac ym Mharc Mân-werthu Trostre. Mae’r gwaith hwn wedi arwain at swyddogion yn cyhuddo 15 o bobl â chyfanswm o 67 trosedd ers canol Ebrill. Cyhuddwyd yr holl siopladron hyn ac aed â nhw i’r llys.

Roeddent yn cynnwys un unigolyn a gafodd ei garcharu am 13 trosedd unigol ac unigolyn arall a gafodd ei gyhuddo â 15 trosedd unigol. Byddant yn cael eu dedfrydu yn Llys Ynadon Llanelli ddydd Llun 20 Gorffennaf 2026.

Mae’r Tîm Plismona Bro ac Atal wedi gweithio’n agos â mân-werthwyr ar draws y dref i wreiddio mwy o ddulliau atal, gan gynnwys y cynllun Os Dwyn Cewch Eich Gwahardd. Mae hyn yn gweld troseddwyr yn cael eu gwahardd o bob siop sy’n rhan o’r cynllun ac yn gadael i fân-werthwyr rannu cudd-wybodaeth am droseddwyr lleol a theithiol.

Mae rhagor o waith wedi’i drefnu yn sgil cyflwyno’r ap ‘Auror’. Mae’r ap hwn yn gadael i fân-werthwyr adrodd am droseddau nad ydynt yn rhai treisgar, megis siopladrata, yn uniongyrchol wrth yr heddlu mewn ffordd strwythuredig a chyson. Gallant lanlwytho delweddau o droseddwyr neu gerbydau, darnau ffilm TCC, a datganiadau tyst. Mae hyn yn rhoi mynediad i swyddogion at gudd-wybodaeth a thystiolaeth o safon uchel i gefnogi’r ymchwiliad.

Mae ‘Auror’ hefyd yn defnyddio swyddogaeth cudd-wybodaeth trosedd i greu proffiliau o droseddwyr mynych a chysylltu digwyddiadau gan ddefnyddio deallusrwydd artiffisial.

Dywedodd y Rhingyll Tom Grace, o Heddlu Dyfed-Powys:

“Mae hwn wedi bod yn ymdrech tîm arbennig gan y Tîm Plismona Bro ac Atal, swyddogion ymateb a mân-werthwyr. Mae’r gwaith hwn wedi arwain at lai o droseddau siopladrata ac wedi gwneud hi’n anoddach i bobl gyflawni’r troseddau hyn ar draws Llanelli.

“Mae’r perthnasau agos rydyn ni wedi datblygu gyda siopau a’r gwell mynediad at deledu cylch cyfyng wedi caniatáu i’n swyddogion gyflenwi canlyniadau cyflym ac effeithiol. Rwy’n falch iawn o’r gwaith maen nhw wedi gwneud ac yn hyderus bod y dulliau atal maen nhw’n helpu i’w gwreiddio’n gwneud ein tref yn fwy diogel.”

Os ydych chi wedi gweld neu ddod yn ymwybodol o unrhyw droseddau siopladrata, cewch adrodd amdano wrth Heddlu Dyfed-Powys drwy:

🖥️ | https://orlo.udk/zR413
📧 | [email protected]
💬 | Neges uniongyrchol ar gyfryngau cymdeithasol
📞 | 101, neu 999 mewn argyfwng

Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i https://orlo.uk/UnNB9

Gallwch gael hysbysiadau am y gweithgarwch yn eich ardal chi a siarad yn uniongyrchol â’ch Tîm Plismona Bro ac Atal drwy Gyswllt Dyfed-Powys. Cewch gofrestru fan hyn: Hafan – Cyswllt Dyfed-Powys