Ry’n ni’n diweddaru’r ffordd ry’n ni’n rhannu delweddau ar ein sianeli cyfryngau cymdeithasol

Mewn ymateb i ganllawiau ar gyfer rhieni gan yr Asiantaeth Troseddu Cenedlaethol a’r Sefydliad Gwylio’r Rhyngrwyd, i fynd i’r afael â’r bygythiad cynyddol o ddelweddau cam-drin plant yn rhywiol a gynhyrchir gan ddeallusrwydd artiffisial, ni fyddwn ni’n cyhoeddi ffotograffau o blant sy’n dangos yn glir pwy ydynt ar ein llwyfannau cyfryngau cymdeithasol fel mater o drefn rhagor.  

Ni fydd y newid hwn yn berthnasol lle mae diben plismona dilys dros gyhoeddi delwedd plentyn, megis apeliadau i helpu i ddod o hyd i blentyn coll, adnabod rhywun, neu lle mae angen gweithredol neu ddiogelu clir arall dros wneud.

Gwyddom fod ein dilynwyr yn mwynhau straeon positif sy’n cynnwys pobl ifainc a’r ymgysylltu gwych rhyngddyn nhw a’n timoedd – a byddwn ni’n parhau i ddathlu eu llwyddiannau a thynnu sylw at y gwaith arbennig sy’n digwydd ar draws ein hardal heddlu. Fodd bynnag, lle bynnag y bo modd, byddwn ni’n gwneud hyn gan ddefnyddio delweddau sydd ddim yn dangos pwy yw’r plant, neu drwy ddewis ffotograffau lle nad yw wynebau plant i’w gweld ac sy’n gwarchod eu preifatrwydd.

Mae’r newid hwn yn adlewyrchu ein hymrwymiad i ddiogelu plant ac ymateb i’r peryglon sy’n esblygu a gyflwynir gan ddatblygiadau mewn technoleg.

Er nad oes unrhyw awgrym bod delweddau a rannwyd yn flaenorol gan yr heddlu wedi’u camddefnyddio, credwn ei fod yn bwysig arddel agwedd ragofalus yn unol â chanllawiau cenedlaethol. Drwy wneud y newid hwn, gobeithiwn y bydd yn codi ymwybyddiaeth o'r canllawiau ac yn annog rhieni a gwarcheidwaid i ystyried eu hymagwedd eu hun.

Diolch am ddeall ac am eich cefnogaeth barhaus wrth inni addasu ein harferion i helpu i gadw plant yn ddiogel, all-lein ac ar-lein.

Os hoffech ddysgu mwy am y canllawiau cenedlaethol a’r bygythiad sy’n esblygu a gyflwynir gan ddelweddau o gam-drin plant yn rhywiol a gynhyrchir gan ddeallusrwydd artiffisial, cliciwch ar y linc canlynol: AI-Generated Child Sexual Abuse Material: New Guidance for Parents