Gang troseddau cyfundrefnol yn euog o gynllwynio i gyflenwi cocên

Mae wyth o bobl wedi cael eu heuogfarnu o gynllwynio i gyflenwi cyffuriau dosbarth A yn Sir Benfro a Sir Gaerfyrddin dros gyfnod o naw mis.

Mae ymchwiliad Heddlu Dyfed-Powys i gyflenwad cocên ar raddfa fawr wedi arwain at gyhuddo wyth aelod o grŵp troseddau cyfundrefnol o droseddau cyffuriau difrifol cyn ymddangos yn Llys y Goron Abertawe.

Dechreuodd yr ymchwiliad pan gafodd fan negesydd DPD ei stopio gan swyddogion heddlu ar yr M4 ger Pont Abraham, Sir Gaerfyrddin ar 8 Awst 2025. Cafodd dros 1.6kg o gocên purdeb uchel, gwerth bron i £190,000, ei rhyng-gipio.

Yn dilyn ymholiadau pellach nodwyd fod wyth o bobl yn rhan o gynllwyn cymhleth i gyflenwi'r cyffuriau hyn. Roedd y rhain yn cynnwys cyflenwyr ym mhen uchaf y gadwyn gyflenwi a chludwyr y tu hwnt i ardal Dyfed-Powys, cwsmeriaid yn prynu symiau cyfanwerthu, a dosbarthwyr lleol.

Nododd swyddogion o Dîm Troseddau Difrifol a Chyfundrefnol yr heddlu fod Tommy Lee Jones, o Monkton, yn chwarae rhan flaenllaw fel pennaeth gang Sir Benfro. Roedd yn caffael sawl cilogram o'r cyffuriau anghyfreithlon ar bob dyddiad dosbarthu gan y cyflenwr Ahmed Al-Farraji a'i gydweithiwr Adam Noraddin, y ddau o Gaerdydd.

Byddai Jones yn cysylltu'n rheolaidd â'r cyflenwyr, a throsglwyddwyd taliadau arian parod mawr i Al-Farraji. Yna byddai'r cyflenwr yn trefnu i'r cyffuriau gael eu danfon mewn ceir moethus o Fryste a Birmingham i leoliadau gwledig gan gynnwys Stepaside, Llandyfái, Hundleton a Monkton i'w cyflenwi ymlaen gan aelodau'r gang oedd wedi'u lleoli yn Sir Benfro a Sir Gaerfyrddin.

Cafodd Kalum Haines, Leon Haines, a Zak Fecci eu hadnabod fel aelodau dibynadwy o'r gang, gan gymryd meddiant o'r cyffuriau'n uniongyrchol gan y cyflenwyr ym mhen uchaf y gadwyn gyflenwi a gweithredu fel dosbarthwyr y cocên yn Sir Benfro. Cyflawnodd Ryan Hare yr un rôl yn Sir Gaerfyrddin a chafodd ei adnabod fel yr un sy'n gyfrifol am drefnu casglu a danfon cyffuriau a atafaelwyd gan yr heddlu ar 8 Awst.

Canfuwyd bod Usman Afsar wedi chwarae rhan sylweddol yng ngweithgareddau'r gang pan yrrodd o Fryste i Sir Benfro fel negesydd a chyfarfu ag aelodau'r gang oedd yn reidio beiciau trydan ym Mhenfro.

Dywedodd y Ditectif Ringyll Mark Jones, o Dîm Troseddau Difrifol a Chyfundrefnol Heddlu Dyfed-Powys: “Ar ôl nifer o fisoedd o ymholiadau, fe wnaethon ni adeiladu achos yn dangos yn glir bod Ahmed Al-Farraji wedi teithio o Gaerdydd i gyfarfod â Tommy Lee Jones mewn lleoliadau gwledig, byddai negeswyr cyflenwi ym mhen uchaf y gadwyn gyflenwi hefyd yn gyrru o Fryste i Sir Benfro ar y dyddiadau hyn ac yn cyflenwi Tommy Lee Jones â symiau mawr o gocên.

“Yna casglwyd y danfoniadau hyn gan ei gwsmeriaid ffyddlon a’u dosbarthu ledled dwy sir.”

Cynhaliwyd ymgyrch heddlu ragweithiol i arestio'r wyth unigolyn dan amheuaeth dros gyfnod o wythnos. Cynhaliwyd gwarantau gan y Tîm Troseddau Difrifol a Chyfundrefnol a thimau plismona ac atal bro yn Sir Gaerfyrddin, Sir Benfro, Caerdydd a Bryste, gyda'r diffynyddion canlynol wedi'u harestio a'u cyhuddo o gynllwynio i gyflenwi cyffuriau dosbarth A:

• Tommy Lee Jones, 33 oed, o Castle Quarry ym Monkton
• Ryan Hare, 27 oed, o Heol Cae Pownd yng Nghefneithin
• Kalum Haines, 22 oed, o Woodland Park yn Neyland
• Leon Haines, 26 oed, o Ashdale Lane ym Mhenfro
• Zack Fecci, 20 oed, o Hawkstone Road yn Noc Penfro
• Ahmed Al-Farraji, 25 oed, o Stryd Topaz yng Nghaerdydd
• Usman Afsar, 41 oed, o Woodborough Street ym Mryste
• Adam Noraddin, 25 oed, o Blas Nanthelyg yng Nghaerdydd

Mae'r holl ddiffynyddion wedi ymddangos yn Llys y Goron Abertawe lle cyfaddefodd Jones, Hare, Haines, Haines a Fecci eu rôl yn yr achos.

Cafwyd Al-Farraji, Noraddin ac Afsar yn euog o’r un troseddau yn dilyn achos llys chwe wythnos o hyd.

Ychwanegodd swyddog yn yr achos, Cwnstabl Sam Burson: “Mae’r unigolion hyn wedi gweithio gyda’i gilydd fel gang troseddu trefnedig gan ddod â symiau mawr o gyffuriau dosbarth A i’n trefi a’n pentrefi.

“Maen nhw wedi dangos diffyg parch llwyr at ddiogelwch cymunedau Sir Benfro a Sir Gaerfyrddin, ac wedi cyfrannu at yr effaith andwyol y mae cyffuriau’n ei chael ar lesiant cymdeithasol ac economaidd y lleoedd rydyn ni’n byw ac yn gweithio ynddynt.

“Trwy ddadansoddiad ymchwil manwl a thrylwyr, rydym wedi dwyn cyhuddiadau yn erbyn grŵp o bobl, ac wedi chwalu’r grŵp hwn, a oedd yn credu y gallent elwa o’u gweithgaredd troseddol. Fodd bynnag, mae cryfder y dystiolaeth yn eu herbyn wedi arwain at ganlyniadau cadarnhaol ac euogfarn i’r unigolion hyn.”

Bydd y diffynyddion yn cael eu dedfrydu ar ddyddiad yn y dyfodol.