Ficer wedi ymddeol a garcharwyd am ddelweddau anweddus o blant yn honni nad oedd ganddo “ddim byd arall i’w wneud”

Mae cyn-ficer o Bowys wedi cael ei garcharu am 12 mis a 12 wythnos ar ôl cael ei ganfod ym meddiant delweddau gwaharddedig o blant yn ystod ymweliad heddlu heb rybudd.

Roedd Andrew Robinson, o Dal-y-bont ar Wysg, Aberhonddu, wedi bod gerbron y llysoedd eisoes ym mis Ebrill 2025 pan gyfaddefodd i feddu ar ddelweddau anweddus o blant.

Yn ei ddedfryd y llynedd, derbyniodd y dyn 77 oed ddedfryd ohiriedig o garchar, gorchmynnwyd iddo lofnodi cofrestr troseddwyr rhyw, a chyhoeddwyd gorchymyn atal niwed rhywiol.

Fel troseddwr rhyw cofrestredig, roedd Robinson dan oruchwyliaeth agos gan uned rheoli troseddwyr Heddlu Dyfed-Powys, y mae ei gwaith yn cynnwys ymweliadau heb rybudd gan yr heddlu.

Ddydd Mawrth 9 Mehefin 2026, ymwelodd ditectifs â chyfeiriad cartref Robinson er mwyn cynnal adolygiad ar hap o’i ddyfeisiau digidol.

Gan ddangos yn glir ei hyfdra a’i ddiystyrwch llwyr o’i orchymyn llys a’i ddedfryd ohiriedig o garchar, daeth swyddogion o hyd i liniadur agored yn dangos delweddau graffig animeiddiedig o blant yn cymryd rhan mewn gweithgarwch rhywiol gydag oedolion.

Pan holwyd ef am hyn gan y ditectif, honnodd Robinson “Doeddwn i ddim yn meddwl bod y rhain yn anghyfreithlon.”

Ar ôl cael ei arestio, parhaodd Robinson i ddiystyru difrifoldeb ei weithredoedd yn llwyr, gan ddatgan “Does gen i ddim byd arall i’w wneud.”

Cyhuddwyd Robinson yn gyflym o fod â delwedd waharddedig o blentyn yn ei feddiant. Gwrthodwyd mechnïaeth i’r cyn-ficer ac ymddangosodd yn Llys Ynadon Merthyr y diwrnod canlynol (10 Mehefin).

Plediodd Robinson yn euog i’r drosedd rhyw yn ymwneud â phlant ac i dorri ei orchymyn atal niwed rhywiol.

Yn dilyn sbarduno ei ddedfryd ohiriedig, cafodd Robinson ei garcharu ar unwaith am 12 mis a 12 wythnos a gorchmynnwyd iddo dalu dirwy o £187.

Dywedodd y Ditectif Ringyll Paula Rutherford: “Honnodd Robinson nad oedd yn gwybod bod meddu ar ddelweddau animeiddiedig o blant yn cymryd rhan mewn gweithgarwch rhywiol yn anghyfreithlon. Mae’r gyfraith yn glir, ac nid yn unig roedd ymddygiad Robinson yn anghyfreithlon ond hefyd yn gwbl anfoesol a chythryblus.

“Efallai y bydd pobl yn meddwl nad oes unrhyw ddioddefwyr “go iawn” yn y mathau hyn o droseddau, ond mae’r weithred o weld delweddau o’r fath ar-lein yn bwydo’r galw i gynhyrchu delweddau mwy niweidiol.

“Yn aml, gall gwylio delweddau anweddus fod y cam cyntaf tuag at gyflawni troseddau rhywiol difrifol yn erbyn plant, ac mae gennym ddyletswydd i amddiffyn plant rhag niwed.

“Mae dedfrydu Robinson yn ganlyniad rhagorol gan dîm dygn ac ymroddedig sy’n targedu ac yn monitro troseddwyr rhyw cofrestredig yn y gymuned.

“Diogelu a gwarchod y cyhoedd ar-lein, ac yn y gymuned, yw ffocws ein gwaith ac mae’r ddedfryd hon o garchar yn adlewyrchu’r ymrwymiad hwnnw.”