CANLYNIAD Y LLYS | Tynnu e-feic peryglus oddi ar y strydoedd fel rhan o ymrwymiad parhaus yr heddlu i wneud cymunedau'n fwy diogel
Cynnwys y prif erthygl
CANLYNIAD Y LLYS | Tynnu e-feic peryglus oddi ar y strydoedd fel rhan o ymrwymiad parhaus yr heddlu i wneud cymunedau'n fwy diogel
Mae tactegau effeithiol gan Heddlu Dyfed-Powys i fynd i'r afael â phroblem barhaus e-feiciau anghyfreithlon wedi arwain at atafaelu cerbyd beiciwr peryglus i'w ddinistrio.
Ddydd Mawrth 10 Mawrth yn Llys Ynadon Hwlffordd, fe gyfaddefodd Joshua Miller, 24 oed, i yrru'n beryglus, peidio â stopio cerbyd pan gafodd gyfarwyddwyd gan yr heddlu i wneud hynny, a hefyd i ddefnyddio e-feic heb yswiriant trydydd parti.
Cafodd Miller, o Gil-maen yn Sir Benfro, ei wahardd rhag gyrru am 12 mis, rhaid iddo gwblhau 150 awr o waith di-dâl a thalu costau o £85 a gordal llys o £114. Gwnaed gorchymyn amddifadu i atafaelu ei e-feic, yr oedd wedi gwario tua £10,000 i’w addasu.
Ar 6 Medi’r llynedd, aeth swyddogion i ganol Penfro yn dilyn adroddiad bod e-feiciau trydan yn cael eu gyrru mewn ffordd wrthgymdeithasol ychydig cyn hanner nos. Roedd Miller ymhlith grŵp o feicwyr a oedd wedi cam-drin swyddogion ar lafar ar ôl cael eu gofyn i stopio wrth reidio i lawr lôn gul sydd ar gyfer cerddwyr yn unig.
Aeth yr heddlu at Miller ar lain las, cyn iddo gyflymu'r e-feic yn beryglus tra bod dau swyddog yn gafael ynddo ef. Yna cafodd ei arestio ar unwaith.
Arestiwyd Miller fel rhan o ymgyrch Heddlu Dyfed-Powys lle cafodd swyddogion eu hyfforddi'n arbennig i ddefnyddio chwistrelliad SelectaDNA i dagio e-feiciau anghyfreithlon – tacteg a ddefnyddir i gasglu tystiolaeth i gysylltu beicwyr peryglus â digwyddiadau anghyfreithlon.
Dywedodd yr Uwch-arolygydd Louise Harries o uned reoli sylfaenol Sir Benfro: “Mae’r canlyniad hwn oherwydd meddwl arloesol a dycnwch swyddogion sy’n ceisio datrys y broblem hon yn ein cymunedau. Roedd yn ffodus iawn na chafodd neb ei anafu ar ôl i Miller gyflymu ei e-feic yn y fath ffordd, gan dynnu’r swyddogion yn eu blaen gyda’r cerbyd pwerus.
“Mae’r beicwyr hyn yn achosi pryder mawr i gymunedau lleol o ganlyniad i’r ffordd y maen nhw’n reidio’r e-feiciau hyn mewn ffordd anystyriol, peryglus ac anghyfreithlon. Ac, yn aml, caiff y beiciau hyn eu haddasu i deithio ar gyflymder llawer cynt hefyd.
“Mae’r defnydd anghyfreithlon a di-hid o’r e-feiciau hyn nid yn unig yn niwsans, ond mae hefyd yn frawychus i drigolion pan fydd unigolion yn eu reidio yn gyflym iawn, yn gwau trwy strydoedd ac yn mynd ar balmentydd neu lwybrau cerdded.
“Dyma pam rydyn ni’n cymryd camau cadarn – ac mae atafaelu e-feic Miller yn dangos ein hymrwymiad i fynd i’r afael â’r broblem hon. Nid yw’n deg bod pobl yn ofni cerdded trwy eu cymdogaethau oherwydd y risg y mae e-feicwyr peryglus yn ei hachosi.
“Byddwn yn parhau i dargedu’r grwpiau hyn o bobl dros y misoedd nesaf, ac rydym yn hyderus y bydd y gweithrediadau hyn yn cael canlyniadau cadarnhaol. Rydym hefyd yn parhau i annog aelodau’r gymuned sy’n dyst i’r mathau hyn o ddigwyddiadau, neu sydd ag unrhyw wybodaeth am unrhyw un sy’n reidio’n anghyfreithlon, i gysylltu â ni.”
Gallwch gysylltu â Heddlu Dyfed-Powys yn y ffyrdd canlynol:
Ar-lein: https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/
Cyfeiriad e-bost: [email protected]
Ffoniwch: 101