Carcharu gyrrwr danfon nwyddau am achosi marwolaeth dyn ‘gofalgar a disglair’ drwy yrru’n beryglus

Mae gyrrwr danfon nwyddau wedi ei ddedfrydu i bedair blynedd a hanner o garchar am achosi marwolaeth Aaron Jones, tad o Lanpumsaint mewn gwrthdrawiad yn Rhagfyr 2024.

Ymddangosodd Daniel Douglas Wyke, o Gaerfyrddin, yn Llys y Goron Abertawe heddiw i gael ei ddedfrydu ar ôl pledio’n euog i un achos o achosi marwolaeth drwy yrru’n beryglus ac un achos o yrru’n beryglus.

Clywodd y llys bod Wyke, 28 oed, wedi gwrthdaro ag Aaron wrth yrru drwy’r pentref yn Sir Gaerfyrddin ar gyflymder o 34mya – 14mya yn fwy na’r terfyn cyflymder –  fin nos ar 23 Rhagfyr. Ffodd o’r safle yn ei gerbyd a oedd wedi ei ddifrodi, ac a adnabuwyd yn fuan wedyn fel y cerbyd a oedd ynghlwm â’r gwrthdrawiad, a chafodd ei arestio’r diwrnod canlynol.

Roedd Aaron, oedd yn 38 oed, wedi bod allan yn cerdded ei gi pan gafodd ei ladd. Disgrifiodd ei deulu ef fel ‘dyn rhyfeddol, cryf, gofalgar a disglair a oedd bob amser yn arwain drwy’r esiampl orau’.

Ychwanegasant: “Hoffem ddiolch i Heddlu Dyfed Powys, ac yn arbennig i’r tîm archwilio, am archwilio achos Aaron yn drylwyr ac ein cefnogi ni drwy’r amser ofnadwy hwn, a hefyd am ein helpu ni i sicrhau’r ddedfryd hon heddiw.

“Hoffem hefyd ddiolch i Elusen Galar Plant Sandy Bear am eu cefnogaeth barhaus ac amhrisiadwy i’n teulu ni.

Rydym mor ffodus o gael cefnogaeth gan ein teulu ac ein ffrindiau annwyl, ond hefyd gan gymuned sydd wedi parhau i ofalu amdanom ni wrth i ni geisio ailadeiladu ein bywydau heb Aaron.”

Dywedodd y barnwr fod penderfyniad Wyke i beidio ag aros wrth leoliad y gwrthdrawiad yn "greulon o annynol" a dywedodd wrth y llys bod y gyrrwr yn “poeni mwy am achub ei groen ei hun” yn hytrach nag ystyried y niwed y gallai fod wedi achosi.

Meddai: “Roedd y rhai a oedd yn agos i Mr Jones yn chwilio’n wyllt amdano. Ni ellir dychmygu’r ing yr oeddent yn ei deimlo ar y pryd.”

“O ran canlyniadau’r hyn a wnaethoch, costiodd eich gyrru peryglus fywyd tad tyner dau o blant, gŵr a mab cariadus, a dyn a oedd yn ffrind da i nifer,” ychwanegodd.

Dedfrydwyd Wyke i bedair blynedd a hanner o garchar, ac mae wedi’i wahardd rhag gyrru am wyth blynedd a dau fis.  Dywedodd y Rhingyll Nicholas Brookes o Uned Archwilio Gwrthdrawiadau Difrifol Heddlu Dyfed Powys: “Roedd hwn yn ddigwyddiad trasig sydd wedi gadael teulu sy’n galaru am dad, gŵr a mab, a theimlir y golled ar ei ôl yr un mor gryf heddiw ag a wnaed 15 mis yn ôl.

“Profwyd bod y diffynnydd, Daniel Wyke, yn gyrru’n anhygoel o beryglus drwy bentref Llanpumsaint ar noson 23 Rhagfyr, 2024, a chanlyniad dinistriol – a chwbl osgoadwy – hyn oed marwolaeth Aaron.

“Mae ein hymchwiliad wedi bod yn un hir a manwl wrth i ni weithio’n drylwyr i sicrhau cyfiawnder i deulu Aaron, sydd wedi bod wrth galon pob un o’n gweithredoedd. Rydw i’n hynod ddiolchgar am y gefnogaeth a’r amynedd a ddangoswyd ganddynt drwy gydol yr ymchwiliad hwn.”