Cyhoeddi twf mewn timau plismona bro

Mae Heddlu Dyfed-Powys wedi cyhoeddi twf ei Dimoedd Plismona Bro ac Atal, drwy gynyddu nifer y swyddogion lle mae eu hangen fwyaf.

O ddydd Llun (16 Mawrth), elwodd Timoedd Plismona Bro ac Atal ar draws yr heddlu o hwb yn nifer y swyddogion heddlu, gyda ffocws uwch ar fynd i'r afael ag ymddygiad gwrthgymdeithasol ac atal troseddu.

Nod Heddlu Dyfed-Powys yw chwalu’r galw mynych, drwy fynd i'r afael â throseddu yn uniongyrchol yn llygad y ffynnon.

Er mwyn bodloni’r galw, bydd nifer o swyddogion yn dychwelyd i'r rheng flaen o adrannau canolog, tra bod swyddi ychwanegol hefyd yn cael eu creu.

Dywedodd y Prif Uwch-arolygydd Dros Dro Steve Davies, pennaeth plismona lifrog: "Mae'r symudiadau yn cael eu gyrru gan yr angen i ryddhau cwnstabliaid yr heddlu i roi hwb i niferoedd ar y rheng flaen, ac i fynd i'r afael â heriau adnoddau.

"Maen nhw'n dod fel rhan o becyn ehangach o newidiadau ar draws yr heddlu gyda'r nod o wella effeithiolrwydd ac effeithlonrwydd sefydliadol cyffredinol, tra'n gwella lles swyddogion a staff yr heddlu a'r gwasanaeth i'r cyhoedd.

"Rydym yn gweld y symudiadau hyn fel newyddion hynod gadarnhaol i'n cymunedau, a fydd yn elwa o Dimoedd Plismona Bro ac Atal mwy i fynd i'r afael â materion yn eu hardal leol, ac ymchwilio i droseddau."

Gwnaed y symudiadau’n bosibl drwy arian gan y Swyddfa Gartref i gynyddu adnoddau mewn plismona bro. Gelwir hyn yn Warant Bro, ac mae'n anelu i helpu i gryfhau atal troseddu a diogelwch cymunedol.

Dyrannwyd £1.4 miliwn o'r cyllid hwn i Heddlu Dyfed-Powys yn 2025/26, i gryfhau ei Dimoedd Plismona Bro ac Atal. Mae hyn yn cael ei gyflawni trwy recriwtio staff yr heddlu i alluogi swyddogion heddlu a oedd yn gweithio mewn rolau cymorth i ddychwelyd i'r rheng flaen.

Mae pedwar rhingyll a 29 o swyddogion heddlu yn cael eu rhyddhau i dimoedd ar draws yr heddlu oherwydd y Gwarant Bro.

Mae gan bob ardal Plismona Bro ac Atal swyddog penodol erbyn hyn, a gellir dod o hyd i fanylion holl aelodau'r tîm yn yr adran Eich Ardal Chi ar wefan Heddlu Dyfed-Powys.

Mae'r heddlu hefyd wedi gweithredu'n gyflym i gael mynediad at gyllid gwarant bro 2026/27, gan sicrhau 12 swyddog ychwanegol rhwng Ebrill a'r hydref. Mae'r rhain yn swyddi newydd a fydd yn cyfrannu at gynnydd yn ffigurau cyffredinol swyddogion heddlu yn Nyfed-Powys.

Dywedodd Comisiynydd yr Heddlu a Throseddu, Dafydd Llywelyn: "Mae Plismona Bro’n ymwneud â mwy na niferoedd, mae'n ymwneud â pherthnasoedd. Mae cynyddu amlygrwydd swyddogion yn helpu i adeiladu ymddiriedaeth, yn cryfhau cysylltiadau cymunedol, ac yn rhoi sicrwydd i'r cyhoedd bod plismona yn bresennol, yn ymatebol ac yn ymrwymedig i fynd i'r afael â throseddu a chadw pobl yn ddiogel.

"Rwyf wedi ymrwymo ers amser maith i wella amlygrwydd yr heddlu ar draws ein cymunedau, ac rydym yn darparu'r swyddogion ychwanegol sydd eu hangen i wireddu'r uchelgais honno."