CARCHAR | Dynion o Gasnewydd wedi’u carcharu am ladrata o glybiau golff yng ngorllewin Cymru

CARCHAR | Dynion o Gasnewydd wedi’u carcharu am ladrata o glybiau golff yng ngorllewin Cymru

Mae dau ddyn wedi’u carcharu ar ôl lladrata o ddau glwb golff yng ngorllewin Cymru, un ar ôl y llall.

Plediodd Mikael Bourkhari, 45 oed, a Simon Dickey, 38 oed – ill dau o Gasnewydd, de Cymru – yn euog i ladrata mewn gwrandawiad llys fis Ionawr.

Ar Dydd Llun, yn Llys y Goron Abertawe, carcharwyd Boukhari am ddwy flynedd a chwe mis, a charcharwyd Dickey am ddwy flynedd ac wyth mis.  

Clywodd y llys sut y galwyd Heddlu Dyfed-Powys am oddeutu 12.45 o’r gloch fore ddydd Sul 18 Ionawr, yn adrodd bod y larwm lladron yn canu yng Nghlwb Golff Hwlffordd.  

Pan gyrhaeddodd swyddogion chwe munud yn ddiweddarach, roedd hi’n amlwg bod yr adeilad wedi’i dargedu’n fwriadol a bod grym wedi’i ddefnyddio i dorri i mewn iddo.

Â’r larwm dal yn canu a golau’n tywynnu o’r tu mewn, aeth swyddogion i mewn i’r clwb golff, yn barod i ddal yr ymwthiwr.

Yn lle hynny, fe wnaethon nhw ddarganfod bod yr olygfa wedi cael ei gadael a'i difrodi'n ddrwg.

Cyrhaeddodd perchnogion y clwb yn fuan wedi hynny, gan nodi bod sawl clwb golff gwerth £100 - £500 yr un wedi’u cymryd o siop y clwb. Amcangyfrifwyd bod cyfanswm gwerth yr eitemau a gafodd eu dwyn tua £36,000.

Tra bod swyddogion yn diogelu tystiolaeth yn lleoliad y digwyddiad, casglodd staff yr ystafell reoli ym Mhencadlys yr Heddlu gudd-wybodaeth ar gerbydau yn yr ardal a allai fod yn gysylltiedig â’r drosedd.

Nodwyd fan Vauxhall goch fel rhan o’u hymholiadau, a rhannwyd disgrifiad o’r cerbyd â swyddogion yn Sir Benfro a Sir Gaerfyrddin.

Gyda swyddogion dros y ffin wedi’u hysbysu am y fyrgleriaeth, penderfynodd unedau lleol batrolio’r clwb golff yng Nghaerfyrddin er mwyn bod yn ddiogel. Ar ôl iddynt gyrraedd, roedd hi’n amlwg bod clwb golff Caerfyrddin wedi ei dargedu hefyd.

Roedd difrod helaeth i’r drws ffrynt, a throsol melyn wedi ei adael yn lleoliad y digwyddiad. Amcangyfrifwyd bod clybiau golff gwerth tua £7,000 hefyd wedi cael eu dwyn o'r safle. Amcangyfrifwyd hefyd fod difrod gwerth tua £5,000 wedi'i achosi i'r adeilad.

Ychydig ar ôl 2 o’r gloch y bore, daeth Swyddogion Plismona’r Ffyrdd o hyd i’r cerbyd dan sylw yn teithio ar hyd yr A48 i gyfeiriad Pont Abraham, er gwaethaf platiau rhif ffug wedi’u gosod ar y cerbyd.

Stopiwyd y fan, a daethpwyd o hyd i nifer anarferol o fagiau a chlybiau golff tu mewn. Arestiwyd y gyrrwr a’i deithiwr – a ddywedodd mai “Richard Smythe” a “Michael Hale” oedd eu henwau – ar amheuaeth o fyrglera.

Nôl yn y ddalfa, cyfaddefodd y pâr eu bod wedi rhoi enwau ffug ac fe’u harestiwyd ymhellach ar amheuaeth o rwystro’r heddlu.

Cafodd yr holl eitemau a gafodd eu dwyn eu hadfer a'u dychwelyd i'r clybiau golff.

Ymddangosodd Mikael Bourkhari a Simon Dickey yn Llys Ynadon Llanelli’r bore canlynol (19 Ionawr), gan bledio’n euog i’r ddau achos o fyrglera ac un achos o rwystro’r heddlu.

Ar Dydd Llun (2 Mawrth), cafodd y pâr eu dedfrydu i garchar:

• Mikael Bourkhari, 45 oed – dwy flynedd a chwe mis
• Simon Dickey, 38 oed – dwy flynedd ac wyth mis

Dywedodd y Ditectif Gwnstabl Kate Williams: “Diolch i waith ardderchog y swyddogion a ymatebodd ar y noson ei hun, a’r ymchwiliad a ddilynodd, mae Boukhari a Dickey wedi wynebu canlyniadau eu gweithredoedd haerllug yn awr. 

“Mae’r perchnogion clwb golff lleol hyn wedi gweithio’n galed iawn i adeiladu a chynnal cyfleusterau sy’n dod ag aelodau o’r gymuned golffio at ei gilydd. Ni ddylent byth ddod yn darged trosedd mor drychinebus. 

“Mae canlyniad heddiw’n tanlinellu’r ffaith y byddwch chi’n cael eich dal os fyddwch chi’n teithio i ardal Dyfed-Powys i gyflawni trosedd.  

“Byddwn ni’n cymryd pob cam gofynnol i’ch adnabod a’ch arestio a’ch dwyn i gyfiawnder.

“Rwyf nawr yn gobeithio gall y dioddefwyr yn yr achos hwn symud ymlaen o’r digwyddiadau ofnadwy hyn a dychwelyd i’r clybiau golff mae cymaint yn eu caru.”