Rhyddhau delwedd ddigidol mewn ymchwiliad i adnabod dyn y daethpwyd o hyd iddo mewn cronfa ddŵr

Mae Heddlu Dyfed-Powys wedi rhyddhau delwedd ddigidol o ddyn y daethpwyd o hyd i’w gorff mewn cronfa ddŵr ym mis Hydref 2024 wrth i ymdrechion barhau i’w adnabod.

Mae’r heddlu wedi gweithio gyda Face Lab ym Mhrifysgol John Moore, Lerpwl, i gynhyrchu delwedd realistig o wyneb y dyn ar ôl bron 16 mis o ymholiadau i sefydlu pwy ydyw.

Adroddwyd am ddarganfyddiad corff dyn yng Nghronfa Ddŵr Claerwen wrth yr heddlu gan gerddwr ar 17 Hydref 2024. Roedd y dyn, sydd heb ei adnabod, yn gwisgo siwt wlyb, fodd bynnag, ni ddaethpwyd o hyd i unrhyw ddillad arall, gemwaith, na thrafnidiaeth yn yr ardal, ac nid oedd ganddo unrhyw farciau gwahaniaethadwy megis creithiau neu datŵau.

Amcangyfrifwyd ei fod wedi bod yn y dŵr am hyd at 12 wythnos cyn cael ei ganfod.

Yn y misoedd a ddilynodd, cynhaliodd ditectifs pob ymholiad posibl i adnabod y dyn, â’r nod o hysbysu ei anwyliaid am ei farwolaeth.

Er gwaethaf pob ymdrech, mae’r dirgelwch dal heb ei ddatrys.

Dywedodd y Ditectif Arolygydd Anthea Ponting, sydd wedi arwain yr ymchwiliad: “Pan adroddwyd am y darganfyddiad wrthym, aethom ati’n syth i geisio sefydlu pwy oedd y dyn hwn.

“Yn absenoldeb unrhyw eitemau personol heblaw’r siwt wlyb yr oedd yn ei gwisgo, diffyg dogfennau adnabod a dim cerbydau gerllaw, dechreuom weithio gyda heddluoedd cyfagos i gynnal gwiriadau ar gyfer pobl ar goll neu yn eisiau nad oedd wedi’u canfod.

“Pan oedd hyn yn aflwyddiannus, estynnom ein hymholiadau i gysylltu â phob heddlu yn y DU, chwilio Cronfa Ddata Genedlaethol yr Heddlu, a chyhoeddi bwletinau i wasanaethau heddlu tramor drwy Interpol.

“Rydyn ni hefyd wedi chwilio cofnodion DNA, olion bysedd a deintyddol am gyfatebiadau posibl, a chyhoeddi apeliadau cyhoeddus ac apeliadau yn y cyfryngau am wybodaeth.

“Bob tro yr ydym wedi estyn allan i’r cyhoedd, rydyn ni wedi derbyn rhai llwybrau ymholi i’w dilyn, ond yn anffodus, nid oes un wedi’n harwain at adnabod y dyn hwn.”

Mae ymholiadau hyd yn hyn wedi galluogi’r heddlu i gyhoeddi disgrifiad ysgrifenedig o’r dyn – a oedd rhwng 30 a 60 oed, tua 6 troedfedd (1.83 medr), yn pwyso rhwng 202 pwys a 220 pwys (91.5 cilogram - 99.5 cilogram), ac o dras Ewropeaidd. Mae swyddogion nawr wedi cymryd cam pellach o ran gofyn am ail-luniad wyneb gan Face Lab ym Mhrifysgol John Moore, Lerpwl.  

Y gobaith yw y gall rhyddhau delwedd realistig gyrraedd rhywun a all helpu i ddatrys yr achos hwn.

Rhoddwyd ffotograffau, adroddiad post mortem, adroddiad deintyddol fforensig a sgan CT o’r dyn ymadawedig i dîm Face Lab er mwyn cynhyrchu’r disgrifiad o’r wyneb.  

Dechreuodd eu gwaith gyda data o’r sgan CT, a ddefnyddiwyd i greu model 3D gan ddefnyddio meddalwedd delweddu meddygol. Nesaf, fe wnaethant ddefnyddio’r adroddiad deintyddol a delweddau i greu siâp o ran isaf wyneb a cheg y dyn, gan nodi fod ganddo ddannedd a oedd yn ymwthio allan a chamfrathiad ar yr ochr chwith.

Yn dilyn hyn, amcangyfrifwyd siâp wyenb, gwefusau a thrwyn y dyn, ac ychwanegwyd cyhyrau i’r model. Sefydlwyd bod ganddo ên gron a llinell gên sgwâr, gyda thrwyn sy’n troi i lawr.

Unwaith yr oedd yr ail-luniad 3D wedi’i gwblhau, defnyddiodd Face Lab gyfeiriadau ffotograffig – yn ôl rhyw, oed a nodweddion – i greu cyfres o haenau. Ychwanegwyd gweadau i’r model o’r wyneb i greu ymddangosiad realistig, a phylwyd ymylon yr wyneb lle’r oedd llai o sicrwydd o gwmpas nodweddion y dyn.

Dywedodd y Ditectif Arolygydd Ponting: “Tan nawr, yr unig eitem oedd ar gael inni ar gyfer datblygu ein hymchwiliad oedd y siwt wlyb roedd y dyn yn gwisgo, a roddodd gwybodaeth gyfyngedig inni o gwmpas ei daldra a’i bwysau.

“Diolch i Face Lab, rydyn ni nawr wedi cael amcangyfrif clir a manwl iawn o edrychiad posibl y dyn, a mawr obeithiaf y bydd yn arwain at dderbyn gwybodaeth gadarnhaol.

“Mae’r ddelwedd eisoes wedi ei phrosesu drwy Gyfrifiadur Cenedlaethol yr Heddlu ar gyfer unrhyw gyfatebiadau, ac mae wedi’i rhannu gydag Interpol, ac rydyn ni’n gofyn i’r cyhoedd unwaith eto am eu cymorth.

“Credwn mai hwn yw’r cyfle gorau i adnabod y dyn oherwydd gellir rhannu’r ddelwedd hon ledled y DU a thramor yn ein hymdrechion i’w adnabod.

“Anogaf unrhyw un sy’n credu y gall fod yn ei adnabod i ddod ymlaen. Dyma aelod o deulu rhywun – anwylyn rhywun – a byddwn wir yn hoffi ei ddychwelyd i’w anwyliaid, a allai fod yn ei golli.”

Ychwanegodd yr Athro Caroline Wilkinson, Cyfarwyddwr Face Lab ym Mhrifysgol John Moore, Lerpwl: “Mae Face Lab yn gweithio gyda heddluoedd ar draws y byd a gall darluniad o wyneb o weddillion dynol weithredu fel arf ar gyfer adnabod, gan ddarparu llwybrau ymchwilio newydd mewn perthynas â hunaniaeth.   

“Gobeithio bydd rhywun a oedd yn adnabod y dyn hwn nawr yn adnabod ei wyneb a gall ein darluniad o wyneb gefnogi’r heddlu i’w adnabod o’r diwedd.”

Os ymweloch chi â Chronfa Ddŵr Claerwen rhwng mis Gorffennaf a 18 Hydref 2024, a gweld unrhyw beth a allai helpu â’n hymholiadau, neu os ydych chi’n gwybod am rywun sydd heb ei weld ers cryn amser ac sy’n ateb y disgrifiad uchod, cysylltwch â Heddlu Dyfed-Powys drwy un o’r dulliau canlynol:

Ar-lein: Porthol Cyhoeddus

E-bost: [email protected]

Ffôn: 101

Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i crimestoppers-uk.org.