DEDFRYDWYD | Dedfrydwyd treisiwr i 21 mlynedd o garchar yn Llys y Goron Abertawe

Mae treisiwr a gyfaddefodd i gyfres o droseddau’n cynnwys, treisio, ymosodiad, ac achosi plentyn i wylio gweithred rywiol wedi ei ddedfrydu i 21 mlynedd o garchar.

Cafodd Talha Ahmadzai, 33 oed, o Hwlffordd ei garcharu ar ddydd Llun 16 Mawrth yn Llys y Goron Abertawe, ar ôl pledio’n euog i’r troseddau canlynol mewn gwrandawiad blaenorol ym mis Tachwedd.

• Tri achos o dreisio
• Treisio plentyn dan 13 oed
• Ymosod drwy guro
• Achosi i blentyn wylio gweithred rywiol
• Ymgeisio i dreisio plentyn dan 13 oed
• Creulondeb i berson dan 16 oed

Digwyddodd y troseddau ym mis Chwefror y llynedd, ac maent yn gysylltiedig â thri dioddefydd, menyw, ynghyd ag un ferch ac un bachgen.

Roedd cyfanswm y ddedfryd yn 19 mlynedd a saith mis yn y carchar, gyda chyfnod dwy flynedd ar drwydded, yn ogystal ag Ahmadzai’n cael ei wneud yn rhwym i orchymyn atal sydd yn ei wahardd am gyfnod amhenodol rhag cael unrhyw gysylltiad gyda’i ddioddefwyr.

Dywedodd y Ditectif Arolygydd Sarah Totterdale, o CID Sir Benfro: “Mae’n glir fod Ahmadzai’n unigolyn eithriadol o beryglus a chreulon, ac mae’r ddedfryd a dderbyniodd yn adlewyrchu hyn.

“Hoffwn gymeradwyo’r dewrder a’r urddas a ddangoswyd gan ei ddioddefwyr, a wnaeth roi eu tystiolaeth o’u profiadau erchyll mewn modd dewr iawn. Mae’n rhaid bod gwneud hynny ac ail-fyw eu profiad wedi achosi trawma aruthrol iddynt. Maent wedi derbyn y gefnogaeth a’r mesurau diogelu priodol drwy drafodaethau strategaeth gydag asiantaethau partner.

“Gyda diolch i’w tystiolaeth, a holl waith caled ein tîm o swyddogion ditectif, llwyddom sicrhau penderfyniad cyhuddo ar gyfer Ahmadzai, ac y mae nawr wedi ei ddedfrydu i gyfnod hir yn y carchar lle nad yw bellach yn achosi perygl i’r cyhoedd. Dylid cymeradwyo’r tîm ymchwilio am eu proffesiynoldeb a’u hysgogiad wrth gyflawni’r canlyniad hwn.”

Os oes angen cefnogaeth arnoch yn dilyn trais neu ymosodiad rhywiol, gallwch gael cymorth a chefnogaeth yma: Cefnogaeth ar ôl trais rhywiol ac ymosodiadau rhywiol | Heddlu Dyfed-Powys

I roi gwybod am drais neu drosedd rhywiol, ewch at ein gwefan yma: Riportio treisio, ymosod rhywiol a throseddau rhywiol eraill | Heddlu Dyfed-Powys