Heddlu Dyfed-Powys wedi cynnal sesiynau BeicioDiogel mewnol yn ddiweddar ar gyfer staff sy’n feicwyr modur brwd

Menter genedlaethol yw BeicioDiogel sy’n cael ei harwain gan yr heddlu ac wedi anelu at roi cyfle i bob beiciwr modur wella eu gwybodaeth, gwella eu technegau reidio, a lleihau eu perygl ar y ffordd. Wedi’i gyflwyno gan feicwyr modur uwch yr heddlu, mae’r gweithdy’n cyfuno mewnbwn dosbarth gyda thaith sy’n cael ei harsylwi, gan gynnig adborth personol ymarferol mewn amodau byd go iawn.

Mae beicwyr modur yn parhau i fod yn un o'r grwpiau mwyaf agored i niwed ar ein ffyrdd, ac mae mentrau fel BeicioDiogel yn chwarae rôl hanfodol o ran helpu reidwyr i ddeall canfyddiad o berygl, lleoli, cornelu a gwneud penderfyniadau yn well.

Mae Heddlu Dyfed-Powys hefyd wedi arddangos ei ymrwymiad tuag at ddiogelwch reidwyr yn fewnol, gan gynnal sesiynau BeicioDiogel mewnol yn Llandrindod a Chaerfyrddin yn ddiweddar ar gyfer staff sy’n feicwyr modur brwd. Rhoddodd y sesiwn yr un arweiniad a hyfforddiant o safon uchel sydd ar gael i’r cyhoedd i staff, gan atgyfnerthu pwysigrwydd dysgu parhaus ac arferion reidio diogel wrth eu gwaith neu’r tu allan.

Dywedodd y Rhingyll James Helyer: “Mae BeicioDiogel yn ymwneud â rhoi’r arfau a’r hyder i reidwyr fwynhau eu teithiau gan aros yn ddiogel. P’un a ydych chi newydd ymgymhwyso neu â blynyddoedd o brofiad, mae rhywbeth i’w ddysgu o hyd. Roedd hi’n wych gweld ein staff ein hun yn ymgysylltu â’r sesiynau mewnol, a byddem yn annog pob beiciwr modur yng Nghymru i ystyried cofrestru.” 

Cymerodd y Prif Arolygydd Dominic Jones ran yn sesiwn BeicioDiogel Caerfyrddin. Meddai, “Rwyf wedi bod yn reidio ers ychydig dros ddwy flynedd, ac rwyf eisoes wedi bod ar y Cynllun Reidiwr Uwch. Fe’m llethwyd gan drefniadaeth wych digwyddiad BeicioDiogel Dyfed-Powys ac roedd y gefnogaeth a’r wybodaeth a roddwyd gan yr hyfforddwyr yn arbennig. Ar ôl mynychu, rwy’n teimlo’n fwy hyderus ac rwy’n reidiwr mwy diogel. Rwy’n annog pawb sydd â beic modur i wneud cymaint o hyfforddiant a dysgu ychwanegol â phosibl, a gallaf dystio’n bersonol i fanteision y cwrs hwn.”

Cynhelir gweithdai BeicioDiogel mewn lleoliadau amrywiol, ac maen nhw ar agor i bob reidiwr â thrwydded beic modur lawn a’u beic modur eu hun sy’n ddiogel i fod ar y ffordd.

Er mwyn cael rhagor o wybodaeth neu archebu lle, galwch heibio i wefan BeicioDiogel: bikesafe.co.uk

Gyda’n gilydd, gallwn wneud ein ffyrdd yn fwy diogel i bawb.