Mae Heddlu Dyfed-Powys wedi cyhoeddi apêl newydd am wybodaeth i adnabod dyn y cafodd ei gorff ei ddarganfod mewn cronfa ddŵr ym mis Hydref 2024.

Dwy flynedd ers darganfod y corff yng nghronfa ddŵr Claerwen ym Mhowys, mae’r heddlu’n annog unrhyw un a allai helpu i sefydlu pwy ydyw i ddod ymlaen.

Adroddwyd bod cerddwr ci wedi dod o hyd i’r dyn ar 17 Hydref 2024. Roedd yn gwisgo siwt wlyb ddu ‘ZONE3 Agile’ maint mawr iawn, ac amcangyfrifwyd ei fod wedi bod yn y dŵr am hyd at 12 wythnos.  

Mae ymchwiliad a arweinir gan CID Powys wedi gweld pob llwybr ymholi rhesymol a chymesur yn cael ei ddilyn, fodd bynnag, ar hyn o bryd, nid yw’n hysbys pwy yw’r dyn.

Dywedodd y Ditectif Arolygydd Anthea Ponting, sydd wedi arwain yr ymchwiliad: “Mae hon yn sefyllfa anarferol iawn o ran bod dwy flynedd wedi mynd heibio a dydyn ni dal ddim tamaid yn nes at wybod pwy yw’r dyn hwn.

“Rydyn ni wedi cysylltu â phob heddlu yn y DU i gynnal gwiriadau am unigolion coll neu yn eisiau a oedd heb eu canfod, chwilio Cronfa Ddata Genedlaethol yr Heddlu, a chyhoeddi bwletinau i heddluoedd tramor drwy Interpol.

“Rydyn ni hefyd wedi chwilio cofnodion DNA, olion bysedd a deintyddol am gyfatebiadau posibl, ac wedi gweithio gyda Face Lab ym Mhrifysgol John Moore Lerpwl i greu delwedd ddigidol o wyneb rhag ofn y byddai hynny’n helpu rhywun i’w adnabod.

“Rydyn ni wedi estyn allan i’r cyhoedd am wybodaeth sawl gwaith, a bob tro, rydyn ni wedi adolygu’r wybodaeth a roddwyd inni, a mynd ar ôl cysylltiadau lle mae angen gwybodaeth bellach i adolygu, yn y gobaith o’i ddychwelyd i’w deulu neu anwyliaid. Yn anffodus, nid yw hyn wedi’n harwain at ganfod pwy yw’r dyn.”

Rhoddodd ymholiadau cychwynnol syniad cyffredinol i swyddogion o oed, taldra a maint corff y dyn. Y mae rhwng 30 a 60 oed, tua 6 troedfedd (1.83 medr), yn pwyso rhwng 202 pwys a 220 pwys (91.5kg-99.5kg), ac o dras gwyn Ewropeaidd.

Nododd y gwaith darluniad o wyneb dilynol fod ganddo ddannedd yn ymwthio allan a chamfrathiad ar yr ochr chwith, gên gron a llinell gên sgwâr, â thrwyn sy’n troi i lawr.

Nid oedd ganddo unrhyw farciau gwahaniaethadwy megis creithiau neu datŵau, ac ni ddaethpwyd o hyd i unrhyw ddillad arall, gemwaith, na thrafnidiaeth yn yr ardal.

Tra bod apeliadau cyhoeddus blaenorol wedi cyrraedd llawer iawn o bobl yn y DU a thramor, mae’r Ditectif Arolygydd Ponting yn gobeithio bydd y neges yn cyrraedd yr unigolyn iawn ddwy flynedd ar ôl darganfod y corff.

“Mae’n rhaid bod rhywun yn gwybod pwy yw’r dyn hwn,” meddai. “Efallai’ch bod chi’n ei adnabod o’r ddelwedd ddigidol, neu efallai’ch bod chi wedi ymweld â chronfa ddŵr Claerwen a gweld rhywbeth sy’n aros yn y cof – beth bynnag ydyw, gallai’n helpu i fwrw ymlaen â’n hymholiadau.

“Ein nod yn y pen draw yw adnabod y dyn hwn fel ein bod ni’n gallu ei ddychwelyd i’w deulu neu anwyliaid er mwyn iddo gael ei roi i orffwys yn briodol.

“Mae ein safle apêl dal ar agor ar gyfer cyflwyniadau, felly os ydych chi’n gwybod rhywbeth a allai helpu a dydych chi ddim wedi rhoi gwybod i’r heddlu yn barod, ystyriwch gysylltu â ni.

“Hoffwn ddiolch eto i bawb sydd wedi estyn allan dros y ddwy flynedd ddiwethaf â gwybodaeth a’ch sicrhau y byddai’ch adroddiad wedi’i ystyried, a chamau gweithredu wedi’u cymryd pan oedd modd.”

Os wnaethoch chi ymweld â chronfa ddŵr Claerwen rhwng mis Gorffennaf a 18 Hydref 2024, a gweld unrhyw beth a allai helpu â’n hymholiadau, neu os ydych chi’n gwybod am rywun sydd heb ei weld ers cryn amser ac sy’n ateb y disgrifiad uchod, cysylltwch â Heddlu Dyfed-Powys drwy un o’r dulliau canlynol:

Ar-lein: Porthol Cyhoeddus

E-bost: [email protected]

Ffôn: 101

Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i crimestoppers-uk.org.