Mynd a reidwyr oddi ar y ffordd anghyfreithlon oddi ar y ffordd

Mae Tîm Troseddau Gwledig Heddlu Dyfed Powys wedi bod yn ymuno â phartneriaid i arestio reidwyr peryglus, atafaelu cerbydau, ac atal difrod rhag cael ei achosi i’n hardaloedd cefn gwlad, cynefinoedd bywyd gwyllt a chymunedau gwledig.

Mae reidwyr beiciau modur a beiciau cwad wedi bod yn reidio ar draws Ceredigion gwledig drwy gydol yr haf, yn aml heb yswiriant, trwyddedau gyrru, neu pan dan ddylanwad alcohol neu gyffuriau.

Yn ystod diwrnod gweithredu diweddar ar draws Cymru, gan weithio dan faner Ymgyrch Taurus Cymru, ymunodd tîm Hawliau Tramwy Cyngor Sir Ceredigion â swyddogion yn agos i Abaty Ystrad Fflur, ac o amgylch Cronfeydd Dŵr Nant y Moch a Phendam.

Arestiwyd dyn 24 oed ar y dydd am fod â chyffuriau yn ei feddiant, gyrru dan ddylanwad cyffuriau, gyrru pan wedi ei wahardd, a gyrru heb yswiriant. Atafaelwyd y beic cwad a chafodd ei adnabod fel un a oedd wedi ei ddwyn. Cafodd ei ryddhau ar fechnïaeth ddiamod a gwnaed ymdrechion i ddychwelyd y beic cwad i’w berchennog.

Riportiwyd dau unigolyn arall am yrru heb yswiriant ac atafaelwyd eu beiciau cwad.

Croesawyd y tîm gan gerddwyr a reidwyr yn defnyddio’r traciau gwledig a ffyrdd dibalmant cyhoeddus, a adwaenir fel lonydd gwyrdd, yn yr ardaloedd.

Dywedodd y Rhingyll Paul Roberts, o Heddlu Dyfed Powys: “Rydym wedi siarad â llawer o bobl sydd wedi diolch i ni am weithio allan yn y lonydd gwyrdd. Mae’r ardaloedd hyn yn brydferth ac mae’n hawdd gweld pam mae pobl yn cael eu denu iddynt. Dydyn ni ddim eisiau annog pobl i beidio â reidio yma gan nad oes unrhyw broblem gyda hynny, dim ond iddynt gadw at y gyfraith.

“Rydyn ni’n gallu gweld y difrod sylweddol a achosir pan nad yw pobl yn cadw at y ffyrdd a’r perygl y mae’n ei achosi i bobl sy’n cerdded.

“Meddyliwch am y ffyrdd gwledig yn yr un modd â ffyrdd arferol. Os ydych yn gallu reidio’n gyfreithlon ar ffordd arferol, gallwch reidio’n gyfreithlon ar y lonydd gwyrdd. Cadwch at y syniad hwn a chadwch at y ffyrdd.”

Dywedodd Aelod Cabinet Ceredigion, y Cynghorydd Clive Davies, sy’n gyfrifol am Economi ac Adfywio: “Dylai ein cefn gwlad gael ei fwynhau, ei barchu a’i ddiogelu.

“Mae’r ymdrechion gorfodi ar y cyd hyn yn anfon neges glir na fydd reidio oddi ar y ffordd anghyfreithlon yn cael ei oddef yng Ngheredigion.

“Drwy gydweithio gyda’n partneriaid gallwn helpu diogelu ein cymunedau gwledig, gwarchod ein hamgylchedd naturiol, a sicrhau bod pawb yn gallu mwynhau'r llefydd arbennig hyn mewn modd cyfrifol.”

Os ydych wedi bod yn dyst i unrhyw reidio oddi ar y ffordd anghyfreithlon, neu os ydych yn ymwybodol ohono, gallwch ei riportio i Heddlu Dyfed Powys drwy:

🖥️ | Reportio | Dyfed-Powys Police

📧 | [email protected]
💬 | Neges uniongyrchol ar gyfryngau cyhoeddus
📞 | 101, neu 999 mewn argyfwng

Fel arall, gallwch gysylltu â’r elusen annibynnol Crimestoppers yn ddienw drwy ffonio  0800 555111, neu fynd at https://orlo.uk/UnNB9

Gallwch gael dderbyn rhybuddion ynghylch gweithgarwch fel hyn yn eich ardal, a siarad yn uniongyrchol gyda’ch swyddogion lleol, drwy Cyswllt Heddlu Dyfed Powys. Gallwch gofrestru yma: Tudalen Gartref - Cyswllt Dyfed-Powys