Diswyddo Cwnstabl Heddlu ar unwaith yn dilyn gwrandawiad camymddwyn cyhoeddus

Yn dilyn gwrandawiad camymddwyn cyhoeddus, mae swyddog wedi’i ddiswyddo ar unwaith o Heddlu Dyfed-Powys.

Diswyddwyd Cwnstabl Rhodri Davies o Heddlu Dyfed-Powys yn dilyn y gwrandawiad a gynhaliwyd o ddydd Llun (19/10) i dydd Iau (22/10) ym Mhencadlys yr Heddlu, Llangynnwr. Cafodd ei gadeirio gan gadeirydd Gwrandawiad Camymddwyn yr heddlu, Mr Ian Arundale.

Pan oedd yn gweithio yn Llanelli, wynebodd Cwnstabl Davies honiadau ei fod wedi dilyn perthynas emosiynol a rhywiol gyda ‘Thyst A’, swyddog heddlu sy’n gwasanaethu, yr oedd yn gwybod neu’n amau ei bod yn ddioddefydd cam-drin domestig. Honnwyd bod ‘Tyst A’ yn destun ymddygiad rhywiol digroeso.

Roedd honiadau ychwanegol yn ymwneud âg ymddygiad PC Davies pan gymerodd ddatganiad  gan ‘Dyst B’ yn mis Hydref 2023 mewn perthynas â digwyddiad siopladrata. Honnwyd ei fod wedi gwneud sylwadau amhriodol, ac wedi cadw rhif ffôn y tyst ar ei ddyfais personol mewn ymgais i ddatblygu neu ddilyn perthynas rhywiol a/neu emosiynol.

Canfu’r panel fod yr honiadau yn erbyn Cwnstabl Davies wedi’u profi, ac o’r herwydd, roedd yn torri’r Safonau Ymddygiad Proffesiynol mewn perthynas â Gonestrwydd ac Unplygrwydd, Cyfrinachedd, Awdurdod, Parch a Chwrteisi, Cydraddoldeb ac Amrywiaeth ac Ymddygiad Gwarthus, a’i fod gyfystyr â chamymddwyn difrifol.

Daeth y panel i’r casgliad y dylai’r cyn Gwnstabl Davies gael ei ddiswyddo o’r heddlu ar unwaith, a bydd nawr yn cael ei ychwanegu at Restr Wahardd y Coleg Plismona, a fydd yn ei atal rhag ailymuno â’r gwasanaeth heddlu.

Yn dilyn canlyniad y gwrandawiad, dywedodd y Dirprwy Brif Gwnstabl Gemma Morris, yr Awdurdod Priodol ar gyfer cwynion a chamymddwyn yn Heddlu Dyfed-Powys: “Yn Heddlu Dyfed-Powys, ry’n ni’n disgwyl y safonau ymddygiad proffesiynol uchaf gan ein holl swyddogion a staff, p’un a ydynt ar ddyletswydd ai peidio.

“Roedd ymddygiad PC Rhodri Davies yn hollol annerbyniol. Canfu’r panel fod yr honiadau yn erbyn Cwnstabl Davies wedi’u profi, ac mae wedi cael ei ddiswyddo o’r heddlu.

“Mae Heddlu Dyfed-Powys wedi ymrwymo i ymdrin yn gadarn â unrhyw ymddygiad sy'n disgyn yn is na safonau gonestrwydd a phroffesiynoldeb a ddisgwylir gan ein swyddogion a'n staff, a bydd yn cymryd camau priodol ble bynnag y nodir ymddygiad amhriodol.

“Rwy’n canmol y tystion am eu dewrder o ran adrodd am ymddygiadau Cwnstabl Davies, ac am ddangos gwydnwch drwy gydol y broses gamymddwyn, gan gynnwys rhoi tystiolaeth yn y gwrandawiad.”