Carcharu troseddwr rhyw gwyrdröedig am pedair blynedd

Carcharu troseddwr rhyw gwyrdröedig am pedair blynedd

Mae ymdrechion di-ildio gan swyddogion Heddlu Dyfed Powys wedi arwain at garcharu troseddwr rhyw gwyrdröedig yn dilyn ymchwiliad chwe blynedd.

Dechreuodd yr ymchwiliad pan wnaeth Thomas Spalding, 47 oed o Aberhonddu, ei ddinoethi ei hun i blentyn 11 oed ar Snapchat.

Roedd Spalding eisoes yn droseddwr rhyw cofrestredig pan ddinoethodd ei hun i’r plentyn a chyflawni gweithredoedd rhywiol o flaen y camera. Gwadodd Spalding y drosedd, ond, gan feddwl yn sydyn, recordiodd y plentyn y sgrin gan ddal y delweddau erchyll a’i riportio i Heddlu Swydd Gaerloyw.

Cadarnhaodd Snapchat gysylltiad Spalding i’r cyfrif a oedd yn ymwneud â hyn. Sbardunodd hyn yr ymchwiliad a ddatgelodd natur y troseddwr rhyw. Bu’n gyson yn dweud celwydd, yn cuddio tystiolaeth, ac yn gwneud ymdrechion amaturaidd i darfu ar yr ymchwiliad yn barhaus. Parhaodd i droseddu ac wrth newid ei amddiffyniadau’n barhaus llusgodd y broses yn un chwe blynedd.

Honnodd Spalding ei fod yn ‘dyst arbenigol’, ac roedd ei amddiffyniadau a oedd yn newid yn dragwyddol yn cynnwys:

• Beio’r plentyn 11 oed am ei ychwanegu ef at sgwrs grŵp,
• Cyfaddef mai ef oedd y person ar y recordiad sgrin (er iddo wadu hyn i gychwyn) ond honni ei fod wedi ei recordio o flaen llaw ac yn cael ei chwarae gan rywun arall,
• Honni bod yn rhaid mai fideo wedi ei recordio o flaen llaw ydoedd gan nad oedd ‘yn rhyngweithio gyda’r plentyn’ pan oedd yn ei ddinoethi ei hun,
• Defnyddio data a allai fod wedi ei manipiwleiddio i ddangos nad ydoedd yn y lleoliad ar adeg y drosedd.

Gwrthbrofodd y tîm ymchwilio bob amddiffyniad a gyflwynwyd yn fanwl. Fe wnaethant adnabod y lleoliad ar y recordiad sgrin fel fflat o eiddo perthynas hŷn i Spalding. Roedd y perthynas yn yr ysbyty tra roedd yr unigolyn gwyrdröedig yn ei ddinoethi ei hun i blant yn eu cartref.

Yna fe wnaethant atafaelu dillad o eiddo Spalding a oedd yn cyfateb i’r rhai a wisgwyd yn y recordiad sgrin.

Defnyddiodd Uned Fforensig Ddigidol Heddlu Dyfed Powys ddata o ffôn Spalding i brofi ei fod yn y lleoliad ar adeg y drosedd. Ceisiodd wadu hyn gyda data lleoliad ffug ond methodd â darparu’r data amrwd er mwyn i’r tîm gadarnhau ei alibi.

Drwy gydol y broses, gwnaeth y troseddwr gwyrdroëdig hefyd dargedu swyddogion gyda llifeiriant o achosion o aflonyddu a arweiniodd at fesurau diogelu’n cael eu gweithredu. Canlyniad y llifeiriant di-ildio hwn oedd bod dros 100 o negeseuon e-bost difrïol wedi eu hanfon at nifer o aelodau’r tîm ymchwilio a Gwasanaeth Erlyn y Goron. Roedd mor ddyfalbarhaus fel y cafwyd ef yn euog o droseddau dan A.127 Deddf Cyfathrebiadau 2003.

Er gwaethaf yr ymdrechion cyfeiliornus hyn i frawychu’r tîm, defnyddiodd y swyddogion yr adnoddau o’u hamgylch mewn ymchwiliad di-ildio i sicrhau cyfiawnder.

Cychwynnodd y treial yn Llys y Goron, Merthyr ar 21 Gorffennaf 2026. Parhaodd ymdrechion aneffeithiol Spalding yn y llys wrth iddo newid ei amddiffyniadau mewn ymdrech i ddirmygu’r system cyfiawnder. Cododd y tîm ymchwilio i herio pob ymgais ac roeddent yn parhau i gyflwyno tystiolaeth i wrthbrofi ei dystiolaeth wrth i’r treial fynd rhagddo.

Daeth y treial i ben gyda’r rheithgor yn canfod Spalding yn euog o gymryd rhan mewn gweithred rywiol gyda phlentyn a thri achos o dorri ei Orchymyn Atal Niwed Rhywiol.

Rhoddwyd dedfryd estynedig o garchar o pedair blynedd i Spalding, sy’n cynnwys pediar blynedd o garchar a chyfnod estyniad o 4 blynedd.