Gwobr y Ganolfan Chwilio Genedlaethol Heddlu’r DU i Dîm Achub Mynydd Aberhonddu

Mae gwirfoddolwyr lleol o Dîm Achub Mynydd Aberhonddu wedi derbyn gwobr fawreddog gan Ganolfan Chwilio Genedlaethol Heddlu’r DU.

I gydnabod eu cymorth parhaus, cyflwynodd y Prif Arolygydd Mark Sweeney o’r Coleg Plismona’r wobr ‘Gwasanaeth Neilltuol i Gymuned Chwilio’r Heddlu’ iddynt.

Enwebwyd y tîm gan yr Uwch-arolygydd Dros Dro Andrew Pitt, Comander Heddlu Powys, ar ôl i’r tîm gael ei anfon i chwilio am ddwy ddynes oedrannus yn ardal Aberhonddu yn gynharach eleni.

Meddai’r Uwch-arolygydd Dros Dro Pitt:

“Er bod yr enwebiad yn ymwneud ag ymdrechion y tîm ar gyfer dwy ymgyrch chwilio benodol, y mae hefyd yn adlewyrchu cyfraniad sylweddol y grŵp hwn o wirfoddolwyr mewn blynyddoedd blaenorol a’u hymdrechion parhaus i gefnogi’r gwasanaethau brys, ddydd a nos, er mwyn canfod ac achub pobl goll.”

Ychwanegodd y Prif Arolygydd Sweeney: 

“Enwebiadau wedi’u derbyn gan asiantaethau amrywiol ledled y DU, a bod pob un ohonynt yn rhoi cymorth neilltuol i’r heddlu, fodd bynnag, roedd yr enwebiad mewn perthynas â thîm Aberhonddu’n sefyll allan. Mae’n glir cymaint mae Heddlu Dyfed-Powys a'r cymunedau lleol maen nhw’n eu gwasanaethu’n gwerthfawrogi’r tîm.”

Gan dderbyn y wobr ar ran yr aelodau, dywedodd arweinydd y tîm, Dr. Rob Powell:

“Mae’n dda iawn gennym gael ein cydnabod ar lefel genedlaethol ar gyfer y wobr hon. Mae ein gwirfoddolwyr yn rhoi oriau dirifedi o amser ac yn aberthu eu hamser gwerthfawr i wasanaethu ein hardal weithrediadol. Nid ydym yn edrych am ddiolch, ond braint o’r mwyaf yw cael ein cydnabod. Yr ydym yn diolch i Heddlu Dyfed-Powys am eu cefnogaeth barhaus. Mae ein perthynas weithio’n golygu ein bod ni’n medru sicrhau bod anghenion chwilio ac achub y gymuned yn cael eu bodloni.”