Cadw’n ddiogel rhag terfysgaeth

Yr hyn allwch chi ei wneud

Cymunedau sy’n trechu terfysgaeth. Rydym angen cymorth a chefnogaeth unigolion, busnesau a chymunedau ledled y DU i fod yn wyliadwrus a chadw’r mannau yr ydym yn byw, gweithio a chymdeithasu ynddynt yn ddiogel.

Os byddwch yn gweld neu’n clywed rhywbeth annisgwyl neu amheus, gwrandewch ar eich greddf a gweithredwch (ACT - Action Counters Terrorism) drwy riportio am weithgarwch terfysgol posibl yn gyfrinachol. Gallai unrhyw ddarn o wybodaeth fod yn bwysig, felly mae’n well bod yn saff ac riportio am unrhyw beth yr ydych yn ei weld. Gallwch helpu’r heddlu i atal terfysgaeth ac arbed bywydau.

Rhai enghreifftiau o leoliadau a allai fod yn dargedau posibl ar gyfer terfysgwyr yw mannau poblog, digwyddiadau, trafnidiaeth gyhoeddus a lleoliadau eiconig ar draws y wlad. 

Rydych yn gyfarwydd â’ch gweithle a’r ardal o’i gwmpas, felly rydych mewn sefyllfa ddelfrydol i weld os oes rhywbeth o’i le. Yn y cyfnod hwn mae’n hollbwysig aros yn wyliadwrus, gwrando ar eich greddf ac riportio am weithgarwch terfysgol posibl wrth yr heddlu. 

Cadwch lygad am unrhyw beth sy’n edrych yn wahanol i’r arfer, megis:

• pobl mewn cerbydau llonydd yn gwylio adeilad neu strwythur
• cerbydau’n symud yn araf ger adeiladau cyhoeddus, strwythurau neu bontydd, neu wedi’u parcio mewn amgylchiadau amheus
• pobl yn defnyddio offer recordio, yn cynnwys ffonau camera, neu’n gwneud nodiadau neu frasluniau o fanylion diogelwch
• rhywun amheus yn talu sylw agos i fynedfeydd ac allanfeydd, grisiau, cynteddau neu ddiangfeydd tân
• pobl yn loetran wrth sefydliadau am gyfnodau hir ac yn gwylio aelodau staff, ymwelwyr a chyflenwadau’n mynd a dod heb reswm amlwg
• pobl yn gofyn cwestiynau manwl neu anarferol am adeiladau a threfn busnes, cyfleusterau (megis trefn ystafelloedd), diogelwch neu barcio a hynny am ddim rheswm amlwg
• unrhyw un mewn ardaloedd ‘gwaharddedig’, ystafelloedd peiriannau a mannau tebyg - holwch y bobl hyn ynglŷn â phwy ydynt a beth maent yn ei wneud, ac riportiwch am hyn ar unwaith i'ch rheolwr diogelwch neu ffoniwch 999. Os oes gennych nam ar eich clyw neu’ch lleferydd, defnyddiwch ein gwasanaeth ffôn testun 18000 neu anfonwch neges destun atom ar 999 os ydych wedi cofrestru ymlaen llaw gyda’r gwasanaeth SMS brys.

Os ydych wedi bod yn dyst i unrhyw un o’r sefyllfaoedd uchod, gwrandewch ar eich greddf ac riportiwch amdano, yn gyfrinachol, gan ddefnyddio ein hofferyn ar-lein i riportio am weithgarwch terfysgol posibl neu ffoniwch y llinell frys gwrthderfysgaeth ar 0800 789 321. Bydd ein swyddogion sydd wedi’u hyfforddi’n arbennig yn delio â’r mater wedi hynny.

Rhedeg Cuddio Dweud

Mae Plismona Gwrthderfysgaeth yn cynghori tri cham allweddol i aros yn ddiogel yn ystod ymosodiad â drylliau neu arfau. Rhedeg Cuddio Dweud.

Mae’r cyngor hwn yn gweithio mewn llawer o wahanol leoedd a sefyllfaoedd. Gwyddom o astudiaethau achos a thystiolaeth pobl sydd wedi goroesi ymosodiadau y gall y cyngor hwn achub bywydau.

Os bydd ymosodiad â drylliau neu arfau:

• Rhedwch i fan diogel. Mae hwn yn opsiwn llawer gwell na ildio neu geisio dal pen rheswm. Os nad oes unman i fynd, yna...
• Cuddiwch a chofiwch ddistewi eich ffôn a diffodd y modd dirgrynu. Codwch faricêd o'ch blaen os gallwch. Yna yn olaf...
• Dywedwch wrth yr heddlu trwy ffonio 999 pan fydd hi’n ddiogel gwneud hynny.

Fideo: Sut i gadw'n ddiogel

Mae’r fideo hwn gan Plismona Gwrthderfysgaeth yn dangos y tri cham allweddol i’ch helpu i aros yn ddiogel yn ystod ymosodiad â drylliau neu arfau.

Diogelwch eich busnes

Mae'r canllaw Guide Shelter Report (GSR) ar ProtectUK yn rhoi cyngor diogelwch i fusnesau, perchnogion safleoedd a staff ar beth i’w wneud os bydd ymosodiad terfysgol.

Gallwch hefyd ddysgu mwy am amddiffyn eich busnes neu eiddo cyhoeddus rhag terfysgaeth.