Diogelu’ch busnes chi neu fangreoedd cyhoeddus rhag terfysgaeth.
Mae nifer o gamau y gallwch eu cymryd i amddiffyn eich gweithwyr a’ch busnes rhag bygythiad terfysgaeth.
Yn gyntaf, mae’n werth gofyn i’ch staff ac unrhyw rai eraill sy’n defnyddio’ch safle i ymgyfarwyddo â’n cyngor ar Gadw'n ddiogel rhag terfysgaeth.
Yn ail, darllenwch y canllaw Guide Shelter Report (GSR) ar ProtectUK. Mae’r canllaw hwn yn esbonio i fusnesau, sefydliadau a staff beth i’w wneud os bydd ymosodiad terfysgol. Mae’n egluro egwyddorion GSR, yn dangos sut y gallant weithio mewn sefyllfaoedd go iawn, ac yn rhoi cyngor ar sut i’w hymgorffori yn eich busnes neu sefydliad.
Yn drydydd, gallwch ddarllen canllaw lleoliadau hygyrch i'r cyhoedd gan Protect UK. Mae’n dweud wrthych, ymhlith pethau eraill, am reoli risg, parhad busnes, cyfathrebu a sut i ddelio â bygythiadau bom. Darllenwch hefyd y Also read cyngor i reolwyr diogelwch yn ystod lefel bygythiad uwch er mwyn gwella gweithdrefnau diogelwch eich busnes.
Fe all fod angen ichi gymryd camau ychwanegol i ddiogelu rhag ymosodiadau terfysgol os ydych chi'n rheoli mangreoedd neu ddigwyddiadau penodol. Mae'r rhain wedi'u nodi o dan Ddeddf Terfysgaeth (Diogelu Mangreoedd) 2025, sydd hefyd yn cael ei nabod fel Cyfraith Martyn.
Yn olaf, gallwch chi a’ch staff gwblhau pecyn e-ddysgu Ymwybyddiaeth ACT a hefyd gysylltu â’ch cynghorydd diogelwch gwrthderfysgaeth lleol i gael cyngor arbenigol wedi’i deilwra ar gyfer eich busnes. Gallwch gael rhagor o wybodaeth a gweld sut i gysylltu isod.
Cynllun Ymwybyddiaeth ACT
Cynllun cenedlaethol yw Ymwybyddiaeth ACT (Action Counters Terrorism) i ddiogelu adeiladau, ardaloedd busnes a’u cymdogaethau cyffiniol rhag bygythiad terfysgaeth.
Cwblhewch gwrs e-ddysgu Ymwybyddiaeth ACT
Gallwch chi ac aelodau’ch staff gwblhau cwrs e-ddysgu Ymwybyddiaeth ACT, sydd wedi’i gynllunio ar gyfer pob busnes a sefydliad yn y DU gan y Swyddfa Diogelwch Gwrthderfysgaeth Genedlaethol.
Bydd y cwrs yn cymryd llai nag awr i’w gwblhau ac mae’n ymdrin â’r canlynol:
- Nodi elfennau gwan o ran diogelwch.
- Sut i nodi ac ymateb i ymddygiad amheus.
- Beth i’w wneud os bydd bygythiad bom.
Cysylltu â chynghorydd diogelwch gwrthderfysgaeth
Fel rhan o Ymwybyddiaeth ACT, bydd cynghorwyr diogelwch gwrthderfysgaeth lleol yn gweithio’n agos gyda busnesau, cynrychiolwyr sefydliadau masnach a chyrff proffesiynol ar draws y DU, gan wneud yn siŵr bod eu mesurau a’u cynlluniau diogelwch amddiffynnol yn gyfredol gyda’r cyngor diogelwch gwrthderfysgaeth diweddaraf.
Mae cynghorwyr diogelwch gwrthderfysgaeth wedi cael hyfforddiant arbenigol, cynhwysfawr mewn meysydd megis:
- ffrwydron a rhagsylweddion cemegion
- pathogenau a gwenwynau
- ffynonellau ymbelydrol
- arolygu safleoedd a mannau bregus
- parhad busnes ac adfywio wedi trychineb
- diogelwch gwybodaeth a phersonél
- systemau diogelwch integredig
- cynllunio i rwystro terfysgaeth mewn cerbydau
- amddiffyn yn erbyn ymosodiad cemegol, biolegol, ymbelydrol neu niwclear
Os hoffech wneud cais am gyngor gan eich cynghorydd diogelwch gwrthderfysgaeth lleol neu holi ynglŷn â rhywbeth arall sy’n ymwneud â diogelu eich busnes rhag terfysgaeth, cliciwch ‘Dechrau’ isod i lenwi ein ffurflen ar-lein gyflym a syml.