Data o ran rhywedd staff, swyddogion a throsedd 414/2024
Cyfeirnod Rhyddid Gwybodaeth: 414/2024
Cais:
Dylai pob ymateb wahaniaethu rhwng ‘rhyw’ a ‘rhywedd’.
- Hoffwn gael sicrwydd eich bod yn casglu data trosedd yn ôl rhywedd biolegol, yn hytrach na rhyw addefedig.
Os na, sut ydych chi’n cipio’r ffaith bod gwrywod yn fwy tebygol o droseddu na benywod?
A ydyw Heddlu Dyfed-Powys yn cofnodi data trosedd sy’n nodi rhyw a hunaniaeth rhywedd y cyflawnwr?
- Hoffwn wybod a ydych yn cofnodi data troseddau a gyflawnwyd ar sail ‘rhyw’ yr unigolyn sy’n cyflawni’r drosedd ac nid y ‘rhywedd’.
- A ydyw Heddlu Dyfed-Powys o’r farn ei bod yn bwysig gwybod yr ystadegau ar gyfer gweithredoedd troseddol ar sail ‘rhyw adeg geni’; ac a ydyw’n ystyried bod yr wybodaeth hon yn ddefnyddiol i ymchwilwyr ac ymyriadau?
- A ydyw Heddlu Dyfed-Powys yn cadw data sy’n nodi rhyw aelodau o staff a phaneli at ddibenion cynrychiolaeth gyfartal?
Cwestiwn yn ceisio eglurhad: Beth ydych chi’n ei olygu gan y gair ‘paneli’?
Ateb eglurhaol: Unrhyw banel, lle mae’n rhaid i ymgeisydd lenwi ffurflen gwybodaeth bersonol i gael rôl ar y panel. Gallai hwn olygu’r ‘Panel Sicrhau Ansawdd’, aelodau annibynnol ‘Panel Heddlu a Throseddu Dyfed-Powys’ ac ati.
Cwestiwn yn ceisio eglurhad: Lle’r ydych wedi cyfeirio at aelodau o staff, a ydych chi eisiau data yn ymwneud â staff neu swyddogion hefyd?
Ateb eglurhaol: Y ddau.
- A ydyw Heddlu Dyfed-Powys yn sicrhau bod noeth-chwiliadau bob amser yn cael eu cynnal gan swyddog o’r un rhyw â’r sawl a ddrwgdybir?
- Atodaf y ffurflen Gwybodaeth Bersonol y mae’n rhaid ei chwblhau mewn cais ar gyfer y Grŵp Cynghori Annibynnol.
a) A ydyw’r ffurflen sy’n cael ei llenwi gan ymgeiswyr am swyddi yn wahanol i hon ac os felly, pam mae’r ddwy ffurflen yn wahanol wrth gasglu gwybodaeth?
b) A oes modd anfon copi o’r ffurflen gais am swydd ataf?
c) A ydyw’r ffurflen honno’n holi ynghylch ‘rhyw’?
- A ydyw Heddlu Dyfed-Powys yn anelu at gydbwysedd rhwng y rhywiau ar y panel annibynnol?
- Os ydyw cwestiwn 1 yn ddewisol, sut gall Heddlu Dyfed-Powys gasglu data ar gydraddoldeb?
- Os nad yw’r swyddogion dosbarthu yn gwybod pa swyddogion sy’n drawsryweddol, sut y gellir ymdrin â cheisiadau dioddefwyr i gael eu trin gan swyddog o’r un rhyw o gwbl?
- Mae rhyw yn nodwedd warchodedig. Sut y darperir ar gyfer urddas, preifatrwydd a diogelwch menywod gan swyddogion dosbarthu pan fo mwyafrif y menywod am weld ffiniau rhyngddynt hwy a menywod trawsryweddol y maent yn eu hystyried yn is-grŵp o ddynion, yn anffodus yn dioddef o ddysfforia rhywedd; ac o bosibl paraffilia ac awtogynoeffilia?
- A ydyw’r swyddog dosbarthu yn gwybod rhywedd cyflogai sy’n honni ei fod yn drawsryweddol ond heb dystysgrif cydnabod rhywedd?
Cwestiwn yn ceisio eglurhad: Lle’r ydych wedi cyfeirio at gyflogai, ai staff yr heddlu a/neu swyddog heddlu sydd gennych mewn golwg?
Ateb eglurhaol: Unrhyw swyddog heddlu neu aelod o staff y mae’r swyddog dosbarthu yn ei gyfarwyddo i ymdrin â sefyllfa benodol, sy’n cynnwys cyswllt â’r cyhoedd.
Cwestiwn yn ceisio eglurhad: At ba ‘gyflogai’ ydych chi’n cyfeirio?
Ateb eglurhaol: Yr ateb eto yw’r swyddogion hynny neu aelodau eraill o staff y mae’r swyddog dosbarthu yn eu gorchymyn i ymdrin â’r cyhoedd. Mae’n amlwg bod llawer o sefyllfaoedd lle mae rhyw yn amherthnasol ond, mae rhai amgylchiadau sensitif lle mae’n bwysig i fenywod bod menyw arall yn delio â nhw.
- Yn y ffurflen yr wyf wedi’i gweld ar gyfer cael eich cynnwys ar banel, nid yw hon yn holi ynghylch ‘rhyw’, felly ni allaf ddeall sut y gall yr ymateb ddatgan eich bod yn gwybod y ‘rhyw’ a’r ‘rhywedd’. A allwch chi esbonio?
- A oes rhaid i’r rhai sy’n cael eu hamau o droseddu gofnodi eu ‘rhyw’?
Ymateb 1:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Cofnodir data mewn perthynas â rhywedd
Cofnodir data ar gyfer statws trawsryweddol:
- Dyn trawsryweddol
- Menyw drawsryweddol
- Trawswisgwr/Croes wisgwr
Ymateb 2:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Cofnodir rhyw/rhywedd o dan yr un teitl. Fel heddlu rydym yn cofnodi’r data hyn ar sail adnabyddiaeth y dioddefwr/y sawl a ddrwgdybir.
Ymateb 3:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Mae Heddlu Dyfed-Powys yn ystyried bod pob nodwedd warchodedig yn bwysig, gan gynnwys rhyw a rhywedd, gan fod hyn yn ein galluogi i ddeall y ddemograffeg o fewn ein poblogaeth, ond hefyd yn ein helpu i ddeall proffiliau ein dioddefwyr a’r rhai a ddrwgdybir, ac mae’n ddefnyddiol i ddeall patrymau a thueddiadau trosedd.
Ymateb 4:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Ydyw, ar gyfer aelodau staff a swyddogion: Mae Heddlu Dyfed-Powys yn cyhoeddi ei Dyletswydd Cyfrifoldeb y Sector Cyhoeddus yn flynyddol.
Ymateb 5:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Ydyw.
Ymateb 6:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
a) Ydyw, mae’r ffurflen gais am swydd yn wahanol i’r ffurflen Grŵp Cynghori Annibynnol. Mae hyn oherwydd bod adrannau gwahanol yn ymdrin â phob un ohonynt.
b) Mae’r ffurflen Cyfle Cyfartal i’w chael ar y system recriwtio ar-lein. Dyma sgrinlun ohoni.
c) Mae ffurflenni cais system recriwtio’r heddlu ar gyfer swyddi gwag allanol yn cynnwys rhyw.
Ymateb 7:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Mae Heddlu Dyfed-Powys yn anelu at gynrychiolaeth amrywiol o’r holl nodweddion gwarchodedig ar ein Grŵp Cynghori Annibynnol.
Ymateb 8:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Gweler ymatebion 1 a 3.
Ymatebion 9, 10 ac 11:
Nid yw’r cais yn gais dilys o dan adran 8 o’r Ddeddf Rhyddid Gwybodaeth, felly am y rhesymau a amlinellir isod ni ellir ymdrin â’r cais o dan Ddeddf Rhyddid Gwybodaeth 2000.
Mae adran 8 o’r Ddeddf yn darparu:
(1) Yn y Ddeddf hon mae unrhyw gyfeiriad at “gais am wybodaeth” yn gyfeiriad at gais o’r fath sydd—
(a) yn ysgrifenedig,
(b) yn datgan enw’r ceisydd a chyfeiriad ar gyfer gohebiaeth, ac
(c) yn disgrifio’r wybodaeth y gofynnwyd amdani.
(2) At ddibenion is-adran (1)(a), mae cais i’w drin fel pe bai wedi ei wneud yn ysgrifenedig pan fo testun y cais—
(a) yn cael ei drosglwyddo drwy ddull electronig,
(b) yn dod i law ar ffurf ddarllenadwy, ac
(c) yn addas i’w ddefnyddio at ddibenion cyfeirio dilynol.
Mae’n ofynnol yn ôl statud i gais o dan Ddeddf Rhyddid Gwybodaeth 2000 ddisgrifio’r wybodaeth y gofynnir amdani, yn nhermau gwybodaeth gofnodedig a gedwir gan Heddlu Dyfed-Powys, fel y’i diffinnir gan adran 8(1)(c).
Mae’r Ddeddf Rhyddid Gwybodaeth yn darparu’r hawl mynediad i wybodaeth a gofnodwyd yn unig. Nid yw’n ei gwneud yn ofynnol i awdurdod cyhoeddus ateb cwestiynau uniongyrchol neu ddamcaniaethol na rhoi sylwadau neu farn, oni bai bod gwybodaeth gofnodedig yn bodoli a allai ateb cwestiynau o’r fath ei hun.
Mae’n amlwg o’r cais y gofynnir am sylwadau/barn mewn perthynas â’ch cais; ac felly, nid yw’n ymwneud â gwybodaeth a gofnodwyd.
Yn unol â Deddf Rhyddid Gwybodaeth 2000 mae’r ymateb hwn yn cynrychioli hysbysiad gwrthod ar gyfer y rhan hon o’ch cais o dan adran 8(1)(c) o’r Ddeddf.
Ymateb 12:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Mae gwall ar y ffurflen. Dylai ddatgan ‘rhyw’, nid ‘rhywedd’. Bydd hwn yn cael ei gywiro.
Ymateb 13:
Gallaf gadarnhau bod Heddlu Dyfed-Powys yn cadw’r wybodaeth y gofynnwyd amdani, fel yr amlinellir isod.
Oes. Mae’r swyddogion yn gyfrifol am gasglu cymaint o ddata â phosibl a byddai hyn yn cynnwys rhyw y sawl a ddrwgdybir.
(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 28/05/2024)