Gweddillion awyren yn Llanilar, Ionawr 1983 164/2024

Cyfeirnod Rhyddid Gwybodaeth: 164/2024

Cais:

Unrhyw wybodaeth yn ymwneud â digwyddiad hedfan yn isel posibl ym mis Ionawr 1983 ger pentref Llanilar, Cymru. Deffrodd ffermwr lleol i ddarganfod gweddillion metelaidd a gweddillion eraill wedi’u gwasgaru dros ei dir. Roedd hyn cyn noswaith 2 Ionawr 1983, ac yn ôl pob tebyg wedi’i achosi gan awyren yn hedfan yn isel ac yn taro brigau coed ar dir y ffermwr ac yn gwasgaru’r deunydd hwn ar draws ei gae ac yn y goedwig gyfagos. Yn ôl y ffermwr ac adroddiadau lleol ni chwalodd yr un awyren, a dim ond y gweddillion hyn a oedd i’w cael. Hysbysodd y ffermwr yr heddlu lleol a chafodd y rhan fwyaf o’r gweddillion eu casglu gan y Weinyddiaeth Amddiffyn.

Hoffwn ofyn am yr wybodaeth ganlynol:

1: A oes gennych chi adroddiad ar y digwyddiad hwn o hyd, gan iddo gael ei adrodd i’r heddlu gan y ffermwr dan sylw? Os felly, hoffwn ofyn am gopi os gwelwch yn dda.

2: A allwch chi gadarnhau bod yr heddlu lleol wedi cynorthwyo wrth glirio’r gweddillion hyn?

3: A gawsoch chi wybodaeth am darddiad yr awyren dan sylw? Ai awyren sifil neu filwrol ydoedd?

Ymateb:

Gallaf gadarnhau nad yw Heddlu Dyfed-Powys yn cadw’r wybodaeth y gofynnwyd amdani, gan na ddaethpwyd o hyd i unrhyw ddogfennaeth yn ymwneud ag unrhyw ddigwyddiad tebyg i’r hyn y gofynnwyd amdano.

(Ymateb yw hwn o dan Ddeddf Rhyddid Gwybodaeth 2000 ac fe’i datgelwyd ar 11 Mehefin 2024)