Polisi Ymddeol ac Ailymuno

1. Datganiad Polisi  

Bwriad y polisi hwn a’r ddogfen weithdrefn gysylltiedig yw cynorthwyo Heddlu Dyfed-Powys i gadw swyddogion profiadol a medrus, sy’n gallu ymddeol ond sydd eisiau parhau i weithio. Mae’r polisi hwn wedi’i fwriadu i gynorthwyo swyddogion sy’n gymwys i ymddeol drwy roi’r dewis iddynt ymddeol, derbyn eu cyfandaliad (cymudiad) a dychwelyd i’r Heddlu.

Bydd y polisi hwn yn cynorthwyo’r sefydliad i sicrhau bod ganddo’r swyddogion profiadol a medrus sydd angen i ddarparu’r gwasanaeth gorau posibl i gymunedau Dyfed a Phowys.

Nid yw’r polisi hwn wedi’i fwriadu i ddisodli cynllunio effeithiol ar gyfer olyniaeth ac nid y bwriad yw ei ddefnyddio ar gyfer swyddogion sy’n ymddeol mewn rolau y gellir eu llenwi’n hawdd.

Yn berthnasol (ond heb fod yn gyfyngedig) i’r canlynol: Pob categori o swyddogion Heddlu Dyfed-Powys, boed yn weithwyr amser llawn, rhan amser, parhaol, cyfnod penodol neu dros dro.  

2. Cwmpas y Polisi

Mae’r polisi hwn yn berthnasol i bob swyddog heddlu sy’n gwasanaethu ar hyn o bryd hyd at reng Dirprwy Brif Gwnstabl sy’n gallu ymddeol ac sy’n gallu cael mynediad i’w buddion pensiwn.

Mae Prif Swyddogion hefyd yn cadw’r hawl i ddefnyddio disgresiwn i ystyried swyddogion sydd eisoes wedi ymddeol, pe bai angen busnes allweddol yn codi.

Ystyrir pob achos yn ôl ei amgylchiadau a’i rinweddau ei hun. Mae’r rhagdybiaeth gyffredinol tuag at gymeradwyaeth i gadw sgiliau, gwybodaeth a phrofiad.

Rhaid i’r meini prawf cymhwysedd ar gyfer ymgeiswyr ar gyfer ymddeol ac ail-ymgysylltu fod yn: -

• Swyddogion heddlu sy’n gyn aelodau o gynllun 1987 sydd naill ai wedi cael 30 mlynedd o wasanaeth pensiynadwy neu 25 mlynedd o wasanaeth pensiynadwy ac sy’n 50 oed o leiaf.
• Cwnstabliaid neu Ringylliaid sy’n 55 oed neu hŷn.
• Arolygwyr neu uwch sy’n 60 oed neu hŷn, neu
• Swyddogion Heddlu sy’n aelodau o Gynllun Pensiwn Heddlu 2006 sy’n 55 oed neu hŷn.

Nid yw’r polisi hwn yn berthnasol ar gyfer cyn swyddogion sydd eisiau ailymuno ond a ymddeolodd dros 12 mis yn ôl. Yn hytrach, bydd y Polisi Recriwtio a Dethol yn berthnasol ar eu cyfer nhw

3. Pwerau a Gofynion Cyfreithiol/Polisi

Cyflwynir y polisi hwn yn dilyn cyhoeddi Nodyn 8 (Canllawiau ar gyfer Ymddeol ac Ailymuno) Canllawiau Tîm Gwobrwyo Cenedlaethol Cyngor Cenedlaethol Prif Swyddogion yr Heddlu a gyhoeddwyd i gefnogi heddluoedd i ffurfio polisïau lleol yn dilyn nifer o ddatblygiadau, gan gynnwys:

• Yr angen i gadw swyddogion profiadol mewn ystod eang o rolau i gefnogi’r Rhaglen Ymgodi i ddarparu cadernid, mentora a hyfforddi ar adeg pan mae nifer fawr o swyddogion â phrofiad plismona gweithredol cyfyngedig.
• Y newidiadau i’r Oed Ymddeol Gorfodol ar gyfer swyddogion heddlu o 1 Ebrill 2022 a chefnogi amcanion y llywodraeth o sicrhau bywydau gweithio hirach, a dileu’r anghymhelliad ariannol a allai annog swyddogion a fyddai fel arfer eisiau parhau i weithio i’r heddlu adael y gwasanaeth am resymau sy’n gysylltiedig â newidiadau i fuddion pensiwn.

Dylid darllen y ddogfen bolisi hon ar y cyd â’r ddogfen weithdrefn Ymddeol ac Ailymuno, a’r canlynol:-

• Deddf Cydraddoldeb 2010
• Cyfarwyddeb Oriau Gwaith 1998
• Deddf Diogelu Data 2018
• Rheoliad Cyffredinol ar Ddiogelu Data 2018
• Deddf Iechyd a Diogelwch yn y Gwaith 1974
• Y Cod Moeseg ar gyfer Plismona
• Mae Asesiad o’r Effaith ar Gydraddoldeb wedi’i gwblhau mewn perthynas â’r polisi hwn
• Nodyn Cyngor 8 Cyngor Cenedlaethol Prif Swyddogion yr Heddlu – Canllawiau ynghylch Ymddeol ac Ailymuno

4. Dewisiadau a Chynlluniau Wrth Gefn

Egwyddorion

Er mwyn cyflawni hyn, bydd Heddlu Dyfed-Powys yn

• Darparu fframwaith ar gyfer ailbenodi swyddogion sydd wedi ymddeol.
• Rheoli disgwyliadau swyddogion a bod yn dryloyw gydag ymgeiswyr cymwys gan esbonio bod y cynllun yn ddewisol, yn seiliedig ar angen yr Heddlu a meini prawf cymhwysedd, heb hawl absoliwt i swyddog ymddeol ac ailymuno.
• Drwy gynllunio gweithlu strategol, monitro ac adolygu’r cynllun er mwyn sicrhau budd optimaidd o ran bodloni heriau gweithlu/gallu.
• Defnyddio gweithdrefn recriwtio fyrrach a symlach ar gyfer swyddogion cymwys sydd eisiau ailymuno, yn unol ag anghenion yr Heddlu.
• Lleihau pensiynau’n llawn ar gyfer swyddogion wedi ymddeol sy’n ailymuno. Bydd swyddogion sy’n cael eu hailbenodi o dan y polisi hwn yn cael eu buddion pensiwn misol wedi’u lleihau h.y. ddim yn cael eu talu, unwaith maen nhw’n cael eu hailbenodi i’r Heddlu.
• Disgwyl i swyddogion sy’n dychwelyd o dan y Cynllun i roi o leiaf tri mis o rybudd am eu bwriad i ymddeol.

Mae’r egwyddorion Cod Moeseg canlynol yn berthnasol i’r polisi hwn a'r weithdrefn.

• Dewrder
• Parch ac Empathi
• Gwasanaeth Cyhoeddus

Mae'r polisi hwn yn anelu i gefnogi cyflenwi Ein Cynllun a'n Llw Diwylliant.

5. Gweithredu ac adolygu  

Bydd y polisi hwn yn cael ei adolygu’n rheolaidd er mwyn sicrhau ei effeithiolrwydd, a cheisir adborth gan randdeiliaid allweddol a’r heddlu ehangach.

Bydd unrhyw adborth neu anfodlonrwydd â’r polisi’n cael ei gofnodi a’i drafod gyda pherchennog y polisi a bydd camau gweithredu priodol yn cael eu cymryd.

COD MOESEG - TYSTYSGRIF GYDYMFFURFIO

Mae'r polisi hwn wedi'i ddrafftio yn unol â'r Coed Moeseg ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Cod hwnnw a'r egwyddorion sy'n sail iddo.

TYSTYSGRIF GYDYMFFURFIO'R DDEDDF HAWLIAU DYNOL

Mae'r polisi hwn wedi'i ddrafftio yn unol â'r Ddeddf Hawliau Dynol ac fe'i hadolygwyd ar sail ei gynnwys a'r dystiolaeth ategol a bernir ei fod yn cydymffurfio â'r Ddeddf honno a'r egwyddorion sy'n sail iddi.

ASESIAD O'R EFFAITH AR GYDRADDOLDEB

Mae adran 4 o Ddeddf Cydraddoldeb 2010 yn nodi'r nodweddion gwarchodedig sy'n gymwys i'w gwarchod o dan y Ddeddf fel a ganlyn: Oedran; Anabledd; Ailbennu Rhywedd; Priodas a Phartneriaeth Sifil; Beichiogrwydd a Mamolaeth; Hil; Crefydd neu Gred; Rhyw; Cyfeiriadedd Rhywiol.

Mae dyletswydd cydraddoldeb y sector cyhoeddus yn gosod gofyniad cyfreithiol rhagweithiol ar gyrff cyhoeddus i ystyried, wrth arfer eu swyddogaethau, yr angen i:

• ddileu gwahaniaethu, aflonyddu, erledigaeth, ac unrhyw ymddygiad arall sy'n anghyfreithlon o dan y Ddeddf;
• hyrwyddo cyfle cyfartal rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu;
• meithrin perthnasoedd da rhwng unigolion sy'n rhannu nodwedd warchodedig berthnasol ac unigolion nad ydynt yn ei rhannu.

Mae'r ddyletswydd cydraddoldeb yn berthnasol i'r holl nodweddion gwarchodedig ac eithrio Priodas a Phartneriaeth Sifil: dim ond y ddyletswydd i ystyried yr angen i ddileu gwahaniaethu sy’n berthnasol i’r nodwedd hon.

Mae cynnal asesiad o effaith ar gydraddoldeb yn cynnwys asesu'n systematig effeithiau tebygol neu wirioneddol polisïau ar bobl mewn perthynas â'r holl nodweddion gwarchodedig a nodir uchod.

Dylid cynnal asesiad o effaith ar gydraddoldeb ar unrhyw bolisi sy'n berthnasol i ddyletswydd cydraddoldeb y sector cyhoeddus.

CWBLHAWYD ASESIAD O'R EFFAITH AR GYDRADDOLDEB: Mawrth 2026