Paratoi’r ffordd ar gyfer Menywod mewn Technoleg: Rheolwr Cynnyrch a Rhaglenni Heddlu Dyfed-Powys yn derbyn Gwobr Aelod Staff Heddlu’r Flwyddyn!

Heddiw, yr ydym yn dathlu llwyddiant Catherine Davies, Rheolwr Cynnyrch a Rhaglenni TGCh, a enillodd wobr Aelod Staff Heddlu’r Flwyddyn yn 2020.

Mae Catherine, sydd wedi bod yn aelod o Heddlu Dyfed-Powys ers bron ugain mlynedd, wedi’i chydnabod am ei hymrwymiad arbennig tuag at reoli nifer o brosiectau datrysiadau technolegol arwyddocaol sydd wedi cynorthwyo perfformiad gweithredol yr heddlu.

Diolch i ymdrechion gofalus Catherine a’i harbenigedd technolegol, bellach, mae gan holl swyddogion rheng flaen Heddlu Dyfed-Powys derfynellau data symudol a chamerâu corff, ac mae camerâu newydd wedi eu gosod mewn cerbydau ymateb arfog a thraffig  .

Yn ôl y wefan ‘Women in Tech’, dim ond 19% o’r bobl mewn rolau technegol yn y DU sy’n fenywod.

Dywedodd Claire Parmenter, Prif Gwnstabl Dros Dro Heddlu Dyfed-Powys, “Yr ydym yn falch iawn bod Catherine yn hyrwyddo swyddi gwyddoniaeth, technoleg, peirianneg a mathemateg, ac yn ysbrydoli pobl eraill yn ei maes.

“Mae’r dechnoleg y mae Catherine wedi cyflwyno ar draws yr heddlu’n helpu swyddogion heddlu a SCCH i fod yn fwy effeithiol, atebol a gwybodus yn eu gwaith o gasglu cudd-wybodaeth ac amddiffyn y cyhoedd.”

Mae prosiectau Catherine yn aml yn rhedeg ar y cyd, sy’n golygu bod yn rhaid iddi gydbwyso ei chyfrifoldebau’n fanwl iawn, ac mae ei gwaith wedi arbed costau sylweddol i Heddlu Dyfed-Powys.

Er bod ei gwaith yn heriol, mae hi wedi’i chanmol am gyflenwi’n gyson hyd safon uchel, a dal dod o hyd i’r amser i helpu eraill.

Dywedodd ei chydweithiwr, Marie McAvoy: “Mae Catharine yn ysbrydoli ac yn ysgogi staff, ac mae hi bob amser yn barod i gynghori a chynorthwyo eraill â’r nod o’u datblygu fel unigolion, ac er budd ehangach Heddlu Dyfed-Powys.”

Dywedodd Catherine, a oedd wedi’i llethu gan yr arwydd a’r enwebiad a gyflwynwyd gan ei chydweithiwr: “Mae’n braf gwybod bod fy ymdrechion yn cael eu gwerthfawrogi gan gydweithwyr a bod y gwaith sy’n cael ei wneud ochr yn ochr â chyfrifoldebau personol yn cael ei gydnabod.”

Cyrhaeddodd Sharlene Watkins, Uwch Reolwr Gweithrediadau Fforensig yr Heddlu, a Charles Gill, Arbenigwr Technegol mewn Gwaith Fforensig ar Gyfrifiaduron, y rhestr fer ar gyfer y wobr Aelod Staff Heddlu’r Flwyddyn hefyd.

Fory, byddwn ni’n rhannu enillwyr Gwobr Tîm y Flwyddyn 2020. 

NODDWYD GWOBR AELOD STAFF HEDDLU’R FLWYDDYN GAN | Unsain – undeb mwyaf y DU, sy’n gweithio o fewn y sector preifat a’r sector cyhoeddus, gan ddarparu gwasanaethau hollbwysig ar gyfer y cyhoedd.