Ditectif yn cyrraedd y rhestr fer ar gyfer Cân i Gymru 2022

Mae un o dditectifs Heddlu Dyfed-Powys yn paratoi i berfformio’n fyw ar S4C fel rhan o gystadleuaeth Cân i Gymru.

Bydd y Ditectif Gwnstabl Steve Williams, sy’n gweithio yn y Drenewydd, yn un o wyth act a fydd yn cystadlu am y teitl arobryn yng Nghanolfan y Celfyddydau, Aberystwyth, ddydd Gwener 4 Mawrth.  

Bydd y Ditectif Gwnstabl Williams yn perfformio ei gân ‘Pan Ddaw’r Byd i Ben’, sy’n anelu i godi ymwybyddiaeth am newid hinsawdd.  

“Rwy’n edrych ymlaen,” meddai’r Ditectif Gwnstabl Williams. “Cymerais ran y llynedd hefyd, ac roedd yn brofiad gwych.

“Mae’n braf cael ychydig o gydnabyddiaeth drwy gael fy newis ar gyfer y rhestr fer am yr ail flwyddyn yn olynol.”  

Cyrhaeddodd cân y Ditectif Gwnstabl Williams, ‘Yr Arlywydd’, y rhestr fer yng nghystadleuaeth y llynedd.

Bydd Elin Fflur a Trystan Ellis-Morris yn cyflwyno’r sioe ar y noson gyda’r wyth cân a ddewiswyd ar gyfer y rhestr fer gan banel o arbenigwyr - Dafydd Iwan, Betsan Haf Evans, Lily Beau ac Elidyr Glyn.

"Difyr iawn oedd cael bod ar y panel eleni, a hynny flynyddoedd lawer ers i mi gael y fraint o'r blaen. Yr argraff ges i oedd bod y safon wedi codi gryn dipyn, a'r amrywiaeth yn rhyfeddol," meddai Dafydd Iwan, sydd ar fin dathlu 60 mlynedd yn y diwydiant.

"O ystyried mai cynnyrch amser hamdden yw'r caneuon hyn, a bod yna lawer o gyfansoddwyr na fyddai byth am gystadlu, mae gennym le i ymfalchïo fel Cymry yn ein creadigrwydd, ac rwy’n edrych ymlaen yn fawr at glywed y rownd derfynol."

Er mwyn pleidleisio dros y Ditectif Gwnstabl Williams i ennill £5,000 a’r teitl arobryn Cân i Gymru 2022, galwch heibio i: https://www.s4c.cymru/cy/adloniant/cn-i-gymru/.

Darlledir Cân i Gymru ar S4C nos Wener 4 Mawrth am 8 o’r gloch.