“Gallai siarad yn gyhoeddus am gam-drin domestig newid eich bywyd”

Byw gan ofni eu partner, wedi’u hynysu oddi wrth eu teuluoedd a’u ffrindiau, ac yn cael eu rheoli ym mhob agwedd o’u bywydau.

Hwn yw’r realiti ar gyfer nifer o bobl ledled ardal Dyfed-Powys sy’n byw gyda cham-drin domestig, stelcio ac aflonyddu – troseddau na sylwir arnynt yn rhy aml wrth i droseddwyr, a hyd yn oed dioddefwyr, wneud popeth o fewn eu gallu i guddio’r arwyddion.

Er y gall canlyniadau byw gyda cham-drin domestig fod yn ddinistriol, i lawer, gall canlyniadau codi llais ac adrodd am droseddau wrth yr heddlu ymddangos yn rhy fawr i’w goresgyn, gan arwain dioddefwyr i fyw mewn perthnasau sy’n parhau i ddirywio, a gydag ymddygiad camdriniol sy’n parhau i waethygu.

Gan gydnabod yr angen i dynnu sylw at y cymorth sydd ar gael i bobl sy’n byw gydag ymddygiad camdriniol, mae Heddlu Dyfed-Powys wedi lansio ymgyrch sy’n anelu i roi’r grym i ddioddefwyr gymryd y cam cyntaf tuag at geisio cymorth wrth iddo weithio i ddileu cam-drin domestig o’i gymunedau.

Dywedodd y Ditectif Uwch-arolygydd Jayne Butler: “Mae cam-drin domestig yn faes gwaith cymhleth iawn ar gyfer heddluoedd ledled y wlad, gan fod cymaint o ddioddefwyr yn ofni’r canlyniadau posibl pe baent yn codi eu llais. 

“Fel heddlu, yr ydym wedi ymrwymo i weithio tuag at ddileu cam-drin domestig, stelcio ac aflonyddu, a rhoi strwythurau a phrosesau mewn grym i gyflawni hyn. Er y gall hyn ymddangos fel tasg enfawr, credwn y byddai anelu am unrhyw beth llai na dileu ymddygiad o’r fath yn golygu’n bod ni’n derbyn yn ddi-gwestiwn y bydd hyn yn digwydd.

“Nid ydym yn barod i wneud hyn, ac mae’r ymgyrch hon yn un o’r camau yr ydym yn eu cymryd i wireddu’r nod hwn, gan siarad yn uniongyrchol â phobl sy’n byw gyda cham-drin domestig a thynnu sylw at y cymorth y gallwn gynnig.”

Mae cam cyntaf yr ymgyrch wedi’i arwain gan y ddealltwriaeth fod y penderfyniad i adael perthynas gamdriniol yn un anodd iawn. Mae dioddefwyr yn aml yn credu y byddai canlyniadau adrodd am eu partner yn waeth na pharhau i fyw yn y berthynas gan eu bod nhw’n wynebu chwalu teulu, colli ffrindiau, anawsterau ariannol, a’r bygythiad o drais pellach.

Fodd bynnag, mae swyddogion yn benderfynol o ddangos bod cymryd y cam cyntaf tuag at godi llais yn caniatáu i ddioddefwyr gael mynediad at gymorth ar gyfer parhau â’r broses cyfiawnder troseddol a chael eu traed tanynt eto.

“Yr ydym yn cydnabod ac yn deall y pryder gwirioneddol sy’n gysylltiedig ag adrodd am rywun yr oeddech yn ei garu – ac yn aml dal yn ei garu er waethaf ei ymddygiad,” meddai’r Ditectif Uwch-arolygydd Butler.

“Mae’r pryder hwn yn glir iawn i ni yn y ffordd yr ydym yn derbyn llawer o adroddiadau sydd ddim yn dod yn uniongyrchol wrth y dioddefydd. Mae plant yn ein galw i ddweud bod eu tad wedi bod yn dreisgar tuag at eu mam, sydd â gormod o ofn codi llais, ffrindiau sy’n dweud eu bod wedi derbyn galwad ffôn wrth i’r dioddefydd ddioddef ymosodiad, a chymdogion pryderus sy’n cysylltu â ni i fynd i leoliadau aflonyddwch.

“Hyd yn oed pan gyflwynir yr adroddiadau hyn, ac mae swyddogion yn mynd i’r lleoliad, yn aml, mae dioddefwyr yn gyndyn i gymryd camau gweithredu, cymaint yw’r ofn y mae’r troseddwyr wedi codi arnynt, a’r bygythiadau sydd wedi’u gwneud pe baent yn codi llais.

“Yr ydym angen i bobl wybod nad oes rhaid iddynt – ac ni ddylent – gadw’n dawel.

“Wrth i’r ymgyrch hon fynd rhagddi, byddwn yn gwneud popeth o fewn ein gallu i dynnu sylw at y cymorth sydd ar gael i ddioddefwyr, y camau y gallwn gymryd i sicrhau eu bod yn ddiogel gartref, ac yn rhannu digwyddiadau go iawn er mwyn dangos sut mae pobl eraill yn eu sefyllfa nhw wedi newid eu bywydau drwy gymryd y cam hynod ddewr hwnnw o gysylltu â’r heddlu.”

Rhennir gwybodaeth a chyngor ar gyfrifon Facebook a Twitter Heddlu Dyfed-Powys.

Gellir adrodd am gam-drin domestig, stelcio ac aflonyddu wrth yr heddlu drwy’r dulliau canlynol:

• Ar-lein: https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/
• E-bost: [email protected]
• Ffôn: 101
• Os ydych chi’n fyddar neu’n drwm eich clyw, neu os oes gennych nam ar eich lleferydd, anfonwch neges destun at y rhif difrys, sef 07811 311 908

Mewn argyfwng, galwch 999 bob amser.

*Os ydych chi’n teimlo bod angen cymorth arnoch i gysylltu â’r heddlu, mae yna sefydliadau sy’n medru’ch helpu. Cliciwch yma i ddod o hyd iddynt, neu chwiliwch am ‘Byw Heb Ofn’ neu ‘Cymorth i Fenywod’ ar-lein – mae gan y sefydliadau hyn linellau cymorth am ddim.