Carchar ar gyfer dyn a ymosododd ar ei bartner beichiog

Mae dyn a ymosododd ar ei bartner pan oedd hi’n feichiog, a bygwth lles y plentyn a oedd heb ei eni, wedi’i garcharu.

Ceisiodd Darren Nicholas guddio rhag yr heddlu pan wnaed yr adroddiad yn ei erbyn, cyn honni bod ci wedi achosi’r anafiadau i’w bartner.  

Derbyniodd Heddlu Dyfed-Powys adroddiad gan heddlu cyfagos ar 10 Mawrth bod dynes wedi mynd i’r ysbyty â phelfis toredig tybiedig, a’i bod wedi datgelu bod ei phartner wedi ei hanafu’n ddifrifol.

Clywodd swyddogion bod y dioddefydd wedi llwyddo i ddianc rhag y drwgdybyn yn ystod yr ymosodiad, a ddigwyddodd bum diwrnod yn gynharach.

Cychwynnwyd ymholiadau’n syth er mwyn canfod ac arestio Nicholas, 36 oed, o Olwg y Parc, Llanelli.

Daethpwyd o hyd iddo’r diwrnod canlynol, ac yn ystod cyfweliad gyda’r heddlu, honnodd fod y dioddefydd wedi’i hanafu pan syrthiodd dros ei chi.

Fodd bynnag, diolch i ymholiadau pellach, roedd modd i swyddogion gyhuddo Nicholas o anafu anghyfreithlon gan achosi niwed corfforol difrifol.

Ymddangosodd yn Llys y Goron Abertawe ddydd Mawrth 25 Ebrill, lle y cafodd ei ddedfrydu i 15 mis o garchar.

Cafodd ei ddedfrydu hefyd am drosedd ar wahân o niwed corfforol difrifol yn dilyn digwyddiad digyswllt yn Llanelli, a bydd yn treulio cyfanswm o 33 mis yn y carchar.

Dywedodd swyddog yr achos, y Ditectif Ringyll Rebecca Thomas: “Hoffwn ganmol y dioddefydd yn yr achos hwn am y dewrder mae hi wedi dangos drwy gydol ein hymchwiliad.

“Ar ben ymdrin â’i hanafiadau ei hun, mae hi wedi wynebu’r bygythiad y gallai niwed fod wedi achosi i’r baban yn ei chroth hefyd, sy’n rhywbeth nad yw’r un ddarpar fam eisiau.

“Mae’n anodd meddwl am adrodd am eich partner wrth yr heddlu, ond ry’n ni’n rhoi cymorth i’r dioddefydd yn yr achos hwn, a gobeithiwn ei bod hi’n teimlo’n ddiogel gan wybod y bydd Nicholas yn y carchar am y dyfodol rhagweladwy.”

*Os ydych chi’n byw gyda cham-drin domestig neu drais ac eisiau adrodd am hyn, cewch gysylltu â ni drwy un o’r dulliau canlynol:

Ar-lein: https://www.dyfed-powys.police.uk/cy-GB/cysylltu-a-ni/af/cysylltu-a-ni-beta/cysylltu-a-ni/

E-bost: [email protected]

Ffôn: 101

Os ydych chi’n fyddar neu’n drwm eich clyw, neu os oes gennych nam ar eich lleferydd, anfonwch neges destun at y rhif difrys 07811 311 908.

Mewn argyfwng, galwch 999 bob amser.

Os nad ydych chi’n barod i adrodd am drosedd wrthym, ond mae angen cymorth arnoch, mae yna sefydliadau sy’n medru’ch helpu: Sefydliadau cymorth | Heddlu Dyfed-Powys