Eich dyfodol. Eich dewis.

Mae ymgyrch tair wythnos am ddiogelwch ffyrdd, gyda’r nod o addysgu gyrwyr ifanc a beicwyr am beryglon y ffordd, wedi’i chyflwyno’n llwyddiannus ar draws ysgolion uwchradd ym Mhowys. Pwysleisiodd ymgyrch Eich Dyfodol Eich Dewis, a gyrhaeddodd gannoedd o fyfyrwyr, bwysigrwydd hanfodol arferion gyrru a beicio diogel.

Cododd yr ymgyrch, sef ymdrech ar y cyd rhwng swyddogion plismona’r ffyrdd Heddlu Dyfed-Powys, swyddogion cyswllt ysgolion, y gwasanaeth tân, a thimau diogelwch ffyrdd Cyngor Powys, ymwybyddiaeth o ganlyniadau ymddygiad peryglus, a sut i gadw’n ddiogel y tu ôl i’r llyw. Ffocws allweddol yr ymgyrch oedd atgyfnerthu’r neges bod diogelwch ar y ffyrdd yn gyfrifoldeb a rennir sy’n gofyn am ddewisiadau mwy diogel gan bawb.

Dywedodd Rhingyll Plismona’r Ffyrdd, Rob Hamer, “Ein pobl ifanc yw gyrwyr a beicwyr yfory, ac mae’n hanfodol ein bod yn rhoi’r wybodaeth a’r sgiliau iddynt gadw’n ddiogel ar y ffyrdd.

“Mae ymgyrch Eich Dyfodol Eich Dewis wedi dod ag asiantaethau lleol ynghyd i ddarparu neges glir: mae diogelwch ar y ffyrdd yn gyfrifoldeb i bawb. Drwy gydweithio, gallwn helpu i atal gwrthdrawiadau ac achub bywydau.”

Dros y cyfnod o dair wythnos, clywodd 724 o fyfyrwyr gan ein swyddogion am bwysigrwydd gyrru cyfrifol, peryglon goryrru, gyrru dan ddylanwad alcohol a chyffuriau, defnyddio dyfais symudol, gwisgo gwregys diogelwch, a gyrru diofal a pheryglus. Gelwir y rhain yn y Pump Angheuol. Clywsant hefyd hanes Olivia Alkir mewn ffilm bwerus a ryddhawyd ym mis Mawrth 2022. Mae Stori Olivia yn esbonio sut y cafodd Olivia, 17 oed o Ruthun, ei lladd yn drasig ar y B5105 yn Rhuthun ym mis Mehefin 2019 yn dilyn gwrthdrawiad lle bu dau yrrwr ifanc yn rasio. 

Fe wnaeth yr heddlu hefyd siarad am drwyddedau gyrrwyr newydd, y gyfraith a phwyntiau cosb.

Dywedodd y Swyddogion Cyswllt Ysgolion Lindsay Sweetman a Gayle Jones, “Rydym yn gobeithio, trwy glywed stori Olivia, y bydd myfyrwyr yn gadael gyda gwell dealltwriaeth o’r risgiau sy’n gysylltiedig â gyrru a beicio, a’r cyfrifoldeb sydd ganddynt pan fyddant yn mynd y tu ôl i’r llyw.” 

Fe wnaeth swyddogion Gwasanaeth Tan ac Achub Canolbarth a Gorllewin Cymru gynnig gweithgareddau ymarferol ar yrru dan ddylanwad alcohol neu gyffuriau, oedd yn cynnwys y defnydd o gogls rhith-realiti, a gogls cwrw lle roedd y myfyrwyr yn gorfod symud o amgylch conau tra'n efelychu bod dan ddylanwad sylweddau, a'r effaith ar yrru. 

Siaradodd Jim Campbell a Robert Griffiths o adran Ddiogelwch Ffyrdd Powys am yrru dan ddylanwad alcohol a chyffuriau a rhoi arddangosiadau ymarferol o sut mae'r heddlu yn cael samplau wrth yrrywr ar ymyl y ffordd. 

Ychwanegodd swyddog diogelwch ffyrdd Cyngor Sir Powys, Jim Campbell, “Mae’r ymgyrch hon yn gallu creu effaith barhaol. Gall addysgu gyrwyr ifanc nawr wneud gwahaniaeth enfawr i leihau nifer y gwrthdrawiadau a marwolaethau ar ein ffyrdd yn y dyfodol.”

Mae adborth gan fyfyrwyr wedi bod yn hynod gadarnhaol, gyda llawer yn dweud eu bod yn teimlo'n fwy hyderus yn eu gallu i wneud dewisiadau diogel ar y ffordd. Sbardunodd yr ymgyrch hefyd drafodaethau gwerthfawr ymhlith myfyrwyr am bwysau gan gyfoedion, peryglon ymddygiadau’r Pump Angheuol, a phwysigrwydd codi llais os ydynt yn gweld gyrru’n anniogel.

Mae’r digwyddiad yma yn rhan o ymrwymiad parhaus gan Heddlu Dyfed-Powys ac asiantaethau partner i leihau gwrthdrawiadau a marwolaethau ar ein ffyrdd.

Dysgwch fwy am yr ymgyrch ar ein gwefan - Eich Dewis. Eich Dyfodol. | Heddlu Dyfed-Powys