Ymgyrch plismona ataliol lwyddiannus yng ngharnifal Rhaeadr

Mae’r cyntaf o ymgyrchoedd Prosiect Vigilant Heddlu Dyfed-Powys wedi’i gynnal ym Mhowys, gyda thimoedd o swyddogion yn atafaelu cyllell wrth unigolyn ifanc yn ei arddegau, tywys menywod a oedd yn agored i niwed i fannau diogel, ac aduno plentyn coll â’i rieni.

Ymgyrch yw Prosiect Vigilant sy’n gweld swyddogion heddlu mewn lifrai ac mewn dillad cyffredin yn gweithredu fel timoedd aflonyddu i atal troseddau rhywiol a threisgar rhag digwydd, ac yn ddiweddar, mae wedi’i gyflwyno ledled yr ardal heddlu.

Gwelodd swyddogion ym Mhowys gyfle i ddefnyddio Vigilant fel ffordd o gadw ymwelwyr â’r carnifal yn Rhaeadr ddydd Sadwrn 19 Gorffennaf yn ddiogel. Teithiodd swyddogion wedi’u hyfforddi’n arbennig o Sir Benfro a Cheredigion i gynorthwyo swyddogion ymateb Sir Faesyfed, Sir Drefaldwyn a Sir Frycheiniog, a Thîm Plismona Bro ac Atal Sir Faesyfed, o ran cefnogi’r digwyddiad.

Cynhaliwyd cyfarfod briffio yng ngorsaf heddlu Llandrindod, lle yr ymgyfarwyddodd swyddogion â’r digwyddiad ac unrhyw gudd-wybodaeth a dderbyniwyd am ymddygiad troseddol posibl. Yna, patroliodd timoedd o swyddogion mewn lifrai ac mewn dillad cyffredin y digwyddiad, a throsglwyddwyd gwybodaeth am ymddygiad amheus neu ymddygiad a oedd yn destun pryder rhwng y ddau dîm.

Yn ystod y dydd, gwelodd swyddogion mewn dillad cyffredin gyllell ym meddiant unigolyn 16 oed. Cafodd ei stopio a’i chwilio gan gydweithwyr mewn lifrai. Atafaelwyd cyllell gloi, balaclafa a chanabis, ac mae’r glaslanc dal dan ymchwiliad. Cynhaliwyd saith proses stopio a chwilio cadarnhaol hefyd ar unigolion ifainc o dan 18 oed a gafodd eu dal â chanabis yn eu meddiant.

Cynhaliwyd patrolau mewn parciau, ar hyd glan yr afon ac mewn alïau er mwyn sicrhau diogelwch unrhyw un a oedd yn yr ardaloedd diarffordd hyn. Ymgysylltwyd â menywod ar ben eu hunain, grwpiau bach a chyplau er mwyn esbonio diben gwaith y swyddogion, a chynigwyd cyngor diogelu.

Dychwelwyd plentyn ifanc a gafodd ei weld ar ben ei hun at ei rieni.

Ar brif strydoedd Rhaeadr, cynorthwywyd nifer o fenywod yr ystyriwyd eu bod yn agored i niwed drwy feddwdod i ddod o hyd i fannau mwy diogel er mwyn eu hatal rhag dod i niwed posibl. Atafaelwyd llawer iawn o alcohol wrth yfwyr dan oed yn ystod y noson hefyd.

Dywedodd Xxx: “Hwn oedd y tro cyntaf inni gynnal ymgyrch Prosiect Vigilant ym Mhowys, ac roedd yn llwyddiant ataliol ardderchog.

“Nod Vigilant yw sicrhau diogelwch pobl ar noson allan yn bennaf, ac atal troseddau rhywiol neu ddifrifol rhag digwydd. Yn yr achos hwn, roeddem yn cadw llygad ar bawb a oedd yn bresennol yng ngharnifal Rhaeadr, sy’n ddiwrnod prysur ac yn noson brysur, a’n nod oedd sicrhau y gallai pawb fwynhau’n ddiogel.

“Mae atal yn rhan bwysig iawn o blismona, a thrwy weithio gyda thimoedd o swyddogion sy’n cadw llygad yn agored am ymddygiad gwrthgymdeithasol posibl ac yn aflonyddu arno, gallwn wneud gwahaniaeth gwirioneddol o ran atal troseddau posibl cyn iddynt ddigwydd.”

Cewch ragor o wybodaeth am Brosiect Vigilant yma.