Mae planhigion canabis sy'n werth dros £860,000 wedi’u hatafaelu yn ystod gwrthdaro ar gynhyrchu cyffuriau
Cynnwys y prif erthygl
Op Mille PR cym
Mae planhigion canabis gwerth dros £860,000 wedi’u hatafaelu o eiddo yn Sir Gaerfyrddin, Ceredigion a Phowys mewn un wythnos yn unig wrth i’r heddlu barhau i fynd i’r afael â chynhyrchu cyffuriau ar raddfa ddiwydiannol.
Cymerodd Heddlu Dyfed-Powys ran yn Ymgyrch Mille 3 – ymgyrch blismona genedlaethol wythnos o hyd wedi’i hanelu at aflonyddu ar ffatrïoedd canabis mawr a sefydlwyd gan rwydweithiau troseddu trefnedig – gyda gweithgarwch yn profi’n llwyddiannus iawn.
Dros saith diwrnod, cynhaliwyd cyrch ar chwe eiddo, gyda saith o bobl yn cael eu harestio. Cyhuddwyd chwe ohonynt o gynhyrchu canabis.
Chwaraeodd timoedd a oedd yn cynnwys CID, swyddogion plismona rhagweithiol, plismona bro ac atal, ymateb arfog, trinwyr cŵn a pheilotiaid drôn oll eu rhan yn y gweithgarwch.
Dywedodd y Ditectif Brif Arolygydd Rich Lewis: “Mewn un wythnos yn unig, rydyn ni wedi atafaelu a dinistrio swm sylweddol o ganabis, sy’n siŵr o fod wedi aflonyddu ar weithgarwch troseddu trefnedig yn Nyfed-Powys a thu hwnt.
“Mae tyfu canabis ar raddfa fasnachol yn broblem rydyn ni wedi wynebu dros y flwyddyn ddiwethaf yn Nyfed-Powys, ond rydyn ni’n cymryd ymagwedd gadarn tuag at ei dileu. Rydyn ni o hyd yn asesu cudd-wybodaeth o gwmpas ble mae’r ffatrïoedd hyn yn cael eu sefydlu, a phwy sy’n gysylltiedig â’u sefydlu a’u cynnal, gan weithredu ar frys pan mae gennym ddigon o dystiolaeth."
&w=1024&h=450&scale=both&mode=max)
Canlyniadau Ymgyrch Mille
Dechreuodd gweithredu’r wythnos ddydd Llun 17 Chwefror, pan ddefnyddiodd swyddogion rym i gael mynediad i dŷ ar Stryd Cambrian, Llanelli. Awgrymodd cudd-wybodaeth fod llawer iawn o ganabis yn cael ei dyfu yn y tŷ teras, a sylwodd swyddogion ar arogl cryf tu mewn yn syth. Arestiwyd dyn 26 oed ar amheuaeth o gynhyrchu canabis, a dechreuodd y tîm plismona rhagweithiol chwilio’r eiddo.
Daeth yn amlwg yn fuan bod y tŷ’n cael ei ddefnyddio fel ffatri ganabis, gyda phlanhigion aeddfed wedi’u canfod mewn pum ystafell – y gegin, tair ystafell wely, a’r atig. Roedd cwtsh dan stâr hefyd yn cael ei ddefnyddio i dyfu planhigion bach. Amcangyfrifwyd eu bod nhw ond pythefnos i ffwrdd o gael eu hamaethu. Atafaelwyd cyfanswm o 179 planhigyn, gyda gwerth posibl o hyd at £61,600 ar y stryd.
Gadawyd y tŷ – eiddo rhent – mewn cyflwr peryglus o ganlyniad i ddwyn trydan. Roedd gan bob ystafell oleuadau a dwythellau awyru’n hongian o’r nenfydau, balastau tyfu wedi’u gosod ar y waliau, a gorchuddion ar y lloriau a’r waliau. Roedd ffenestri allanol wedi’u gorchuddio, fodd bynnag, roedd bleindiau arnynt er mwyn rhoi’r argraff bod popeth yn normal.
Cyhuddwyd Muhammed Sulaj o gynhyrchu canabis, ac fe fydd yn ymddangos yn Llys y Goron Abertawe ar 21 Mawrth.
Y diwrnod canlynol, gweithredwyd gwarant mewn eiddo gwledig tu allan i Gydweli, gyda ditectifs, trinwyr cŵn, a thimoedd plismona bro ac atal yn bresennol. Cafwyd mynediad i’r iard drwy ffens weiren bigog, ac arestiwyd y perchennog cartref, Martin Evans – a gafodd ei ganfod mewn cartref symudol – ar amheuaeth o gynhyrchu canabis.
Ar ôl mynd mewn trwy ddrws ochr y tŷ fferm, y peth cyntaf a welodd swyddogion oedd ystafell wely fach dros dro a oedd yn cynnwys gwely, popty ac oergell, lle y daethant o hyd i un dyn, Fatjon Xhafa. Tu hwnt i’r ystafell honno, lle’r oedd Xhafa yn byw, roedd y tŷ cyfan yn llawn planhigion canabis mewn cyfnodau tyfu gwahanol, ynghyd â deunydd tyfu, goleuadau ac offer awyru.
Wrth i un tîm chwilio’r adeilad er mwyn sicrhau nad oedd neb arall yn bresennol, cafodd un arall fynediad i gynhwysydd cadw allanol, lle y daethpwyd o hyd i nifer o blanhigion llai.
Atafaelwyd cyfanswm o 194 blanhigion i’w difa, gyda gwerth amcangyfrifol o hyd at £264,100.
Cyhuddwyd Fatjon Xhafa o gynhyrchu canabis, ac ymddangosodd yn Llys Ynadon Lanelli lle na chyflwynodd ble. Bydd yn ymddangos yn Llys y Goron Abertawe ddydd Llun 24 Mawrth.
Cyhuddwyd Martin Evans o gynhyrchu canabis ac o fod yn gysylltiedig â chyflenwi canabis. Ymddangosodd yn Llys Ynadon Llanelli a chyflwynodd ble euog. Bydd yn ymddangos yn Llys y Goron Abertawe ddydd Llun 24 Mawrth i gael ei ddedfrydu.
Cafodd swyddogion fynediad drwy rym i eiddo pedwar llawr yn Clifton Terrace, y Drenewydd, ddydd Mercher 19 Chwefror, gyda thriniwr cŵn yn bresennol yn dilyn ymgeisiau’r drwgdybiedigion i ffoi rhag ffatrïoedd eraill ym Mhowys yn ystod gwarantau blaenorol.
Wrth i’r drws dorri, gwelwyd dyn yn rhedeg o’r gegin i ystafell flaen, gan ysgogi camau cyflym i’w ddal tra bod yr arall yn cael eu chwilio.
O’r stryd, doedd dim ffordd o wybod bod y 274 planhigyn canabis yn tyfu yn yr adeilad briciau coch. Roedd y llawr isaf, y lloriau uchaf a’r llofft yn llawn offer tyfu, goleuadau hydroponeg a phibau awyru a oedd yn bwydo gwres allan o’r adeilad drwy’r simnai.
Roedd y gosodiad helaeth yn cael ei redeg gan gyflenwad trydan a oedd wedi’i addasu’n anghyfreithlon, gyda’r palmant o flaen y tŷ wedi’i balu er mwyn cael mynediad i’r prif gyflenwad.
Ynghyd â’r planhigion canabis, aed â dau ffôn symudol, tri cherdyn SIM ac arian parod o’r tŷ.
Cyhuddwyd Ismet Lika, 35 oed, o gynhyrchu canabis. Cyfaddefodd i hyn yn y llys. Bydd yn cael ei ddedfrydu ar 20 Mawrth.
Cafodd gwarant cyffuriau adran 8 ei gweithredu mewn eiddo gwledig yn Llanfihangel-ar-Arth ddydd Iau, Chwefror 20, lle lleolwyd tyfiant canabis bach mewn adeilad allanol ynghyd â chanabis o fewn yr eiddo. Atafaelwyd dyfeisiau symudol ac offer tyfu hefyd.
Cafodd un ddynes, 49 oed, ei harestio ar amheuaeth o dyfu canabis, tynnu trydan, a meddiant gyda’r bwriad o gyflenwi canabis.
Mae hi ar fechnïaeth ar hyn o bryd tra bod ymholiadau’n parhau.
Cynhaliwyd trydedd warant gan dîm plismona rhagweithiol Sir Gaerfyrddin ar Stryd Mansel, Porth Tywyn. Wrth i swyddogion fynd mewn i’r eiddo drwy’r drws ffrynt, fe wnaethant arestio dyn ar amheuaeth o gynhyrchu canabis.
Ar ôl chwilio’r tŷ, daethpwyd o hyd i bron 170 o blanhigion canabis. Roedd llawer ohonyn nhw’n dechrau blodeuo. Roedd gwerth y canabis ar y stryd tua £166,000.
Cyhuddwyd Renaldo Allmuca o gynhyrchu canabis ac ymddangosodd yn Llys Ynadon Llanelli ddydd Mercher 26 Chwefror. Ni chyflwynodd ble. Cafodd ei gadw yn y ddalfa a bydd yn ymddangos yn Llys y Goron Abertawe ddydd Mercher 28 Mawrth.
Cynhaliwyd gwarant olaf Sir Gaerfyrddin o dan Mille yn Gilbert Crescent, Llanelli. Daethpwyd o hyd i bron 150 o blanhigion canabis yn y tŷ, gyda gwerth posibl o hyd at £113,000.
Cyhuddwyd Fabian Cela o gynhyrchu canabis a chafodd ei gadw yn y ddalfa. Ymddangosodd yn Llys Ynadon Llanelli ddydd Gwener 28 Chwefror a phlediodd yn ddieuog. Cadwyd Cela yn y ddalfa a bydd yn ymddangos yn Llys y Goron Abertawe ddydd Llun 31 Mawrth.
Dywedodd y Ditectif Brif Arolygydd Rich Lewis:
“Er y gall ein cymunedau fod dan yr argraff y byddai canabis ar y raddfa hon yn cael ei dyfu mewn unedau diwydiannol mawr, neu y tu allan i’r dref, yr wythnos hon, rydyn ni wedi targedu nifer o dai teras rhent yng nghanol trefi, neu’n agos i ganol trefi, sydd wedi’u haddasu i dyfu cannoedd o blanhigion.
“Mae’r eiddo hyn yn ymddangos yn gwbl gyffredin o’r stryd - gan fod dulliau gofalus yn cael eu rhoi ar waith er mwyn cuddio gweithgarwch anghyfreithlon. Fodd bynnag, mae arwyddion i gadw llygad amdanynt os ydych chi’n amau y gallech fod yn byw ger ffatri ganabis. Fe’ch anogwn i ymgyfarwyddo â’r arwyddion hyn, a chysylltu â ni os oes gennych unrhyw bryderon, neu wybodaeth i’w rhannu.”
Arwyddion mwyaf cyffredin ffatri ganabis yw:
- GWRES: Mae angen gwres ar blanhigion canabis i dyfu. Efallai byddwch chi’n gweld anwedd ar ffenestri neu’n sylwi nad oes ia ac eira ar doeon adeg y gaeaf.
- AROGL: Mae gan blanhigion canabis arogl cryf, sy’n gryfach yn ystod tri mis olaf y cyfnod tyfu.
- SBWRIEL: Llawer o sbwriel ‘gardd’ wedi’i adael tu allan, megis potiau planhigion, compost a chynwysyddion bwyd planhigion gwag.
- GOLAU: Mae angen goleuadau llachar ar ganabis 24 awr y dydd i dyfu. Efallai y byddwch chi hefyd yn clywed sŵn ffannau.
- CYFRINACHEDD: Efallai bydd ffenestri wedi’u gorchuddio er mwyn cuddio gweithgarwch anghyfreithlon, neu efallai bydd cloeon ychwanegol wedi’u gosod.
- TRYDAN: Efallai bydd eich stryd yn dioddef toriadau trydan mwy cyson ac anarferol wrth i fesuryddion trydan gael eu hosgoi.
- YMWELWYR: A oes pobl yn mynd a dod, o bosibl yn ystod oriau anarferol? A yw’r goleuadau ymlaen o hyd ond nid yw’n ymddangos fel pe bai rhywun yno?
Os oes gennych unrhyw wybodaeth neu bryderon i’w rhannu, cysylltwch â Heddlu Dyfed-Powys drwy un o’r dulliau canlynol:
Ar-lein | https://bit.ly/DPPContactOnline,
E-bost | [email protected],
Ffôn | 101
Fel arall, cysylltwch â’r elusen annibynnol Crimestoppers yn ddienw drwy alw 0800 555111, neu drwy alw heibio i crimestoppers-uk.org.
Ar gyfer Dyfed-Powys, mae’r gweithgarwch hwn yn barhad o Ymgyrch Scotney, sef ymgyrch a arweinir gan CID, a ddechreuodd ym mis Ionawr 2024. Yn ystod y cyfnod hwnnw, mae gwarantau wedi’u gweithredu mewn dros 40 ffatri ganabis ar raddfa ddiwydiannol, ac mae gwerth dros £12 miliwn o ganabis wedi’i atafaelu.
&w=1024&h=450&scale=both&mode=max)