Lansio Ymgyrch Apex yn ardal Heddlu Dyfed-Powys i wella diogelwch reidwyr beic modur dros y Gwanwyn/Haf hwn

Mae Heddlu Dyfed Powys wedi lansio Ymgyrch Apex sy’n canolbwyntio ar wella diogelwch reidwyr beic modur a gostwng gwrthdrawiadau difrifol ar ffyrdd allweddol.

Bydd yr ymgyrch yn golygu y bydd presenoldeb yr heddlu’n cynyddu ar ffyrdd sy’n boblogaidd gyda reidwyr, yn enwedig y rhai hynny sy’n adnabyddus oherwydd cyfraddau gwrthdrawiad uwch. Bydd swyddogion yn cynnal cyfuniad o weithgarwch gorfodi ac ymgysylltu, gan dargedu’r prif ffactorau sy’n cyfrannu at wrthdrawiadau difrifol ac angheuol.

Mae beicwyr modur ymhlith defnyddwyr mwyaf agored i niwed y ffyrdd, ac yn ystod  cyfnodau’r gwanwyn a’r haf gwelir cynnydd yn y niferoedd o reidwyr sy’n teithio ar draws ffiniau’r heddlu i fwynhau ffyrdd gwledig ac arfordirol.

Fel rhan o Ymgyrch Apex, bydd swyddogion yn canolbwyntio ar:

• Cyflymder eithafol neu amhriodol
• Goddiweddyd peryglus
• Colli rheolaeth ar droadau
• Ymddygiad reidio gwrthgymdeithasol neu risg uchel

Yn ogystal â gorfodi, bydd swyddogion yn ymgysylltu gyda reidwyr er mwyn darparu cyngor ynghylch reidio diogelach ac yn hyrwyddo datblygu sgiliau pellach drwy’r cynllun BikeSafe cenedlaethol.

Mae reidwyr hefyd yn cael eu hannog i gynnal gwiriadau sylfaenol cyn-reidio cyn iddynt gychwyn ar eu taith, gan gynnwys gwirio teiars, breciau, goleuadau a lefelau hylif, er mwyn sicrhau bod eu beic modur yn addas i’r ffordd fawr.

Dywedodd yr Arolygydd Dawn Fencott-Price, o Ymgyrchoedd Arbenigol Heddlu Dyfed Powys: “Bwriad Ymgyrch Apex yw gostwng y niferoedd o reidwyr sy’n cael eu hanafu’n ddifrifol neu eu lladd ar ein ffyrdd. Rydyn ni’n gwybod y bydd nifer o reidwyr beic modur yn teithio i’n hardal i fwynhau’r ffyrdd sydd gennym i’w cynnig, ac rydyn ni eisiau i bawb gyrraedd yn ddiogel a dychwelyd adref yn ddiogel.

“Nid atal pobl rhag mwynhau eu reidiau yw amcan yr ymgyrch hwn. Ei fwriad yw annog ymddygiadau reidio diogelach, sicrhau bod beiciau modur mewn cyflwr da, a gweithredu pan fyddwn yn gweld gweithgarwch peryglus sy’n peryglu bywydau.”

Gofynnir i heddluoedd partner gefnogi’r ymgyrch drwy rannu negeseuon diogelwch allweddol gyda reidwyr a fydd efallai’n teithio i’r ardal.

Atgoffir reidwyr beic modur i:

• Reidio o fewn eu gallu ac addasu eu cyflymder yn ôl cyflwr y ffordd ac amodau’r tywydd
• Cymryd gofal pellach ar ffyrdd anghyfarwydd
• Bod yn ymwybodol o ddefnyddwyr eraill y ffyrdd na fydd efallai wedi eu gweld nhw
• Cynnal gwiriadau cynnal a chadw sylfaenol cyn teithio

Mae Heddlu Dyfed Powys hefyd yn annog reidwyr i ystyried cofrestru ar gyfer gweithdy BikeSafe, sy’n cynnig cyngor ymarferol a thaith dan oruchwyliaeth reidiwr beic modur lefel uwch yr heddlu  er mwyn helpu gwella sgiliau ac ymwybyddiaeth o’r ffordd.

I gael mwy o wybodaeth ynghylch BikeSafe, ewch at: www.bikesafe.co.uk 

Neu am gyngor a gwybodaeth pellach: Ymgyrch Apex | Heddlu Dyfed-Powys