Strategaeth Troseddau Gwledig a Bywyd Gwyllt yn hybu patrolau ac ymgysylltu.

Bydd strategaeth Troseddau Gwledig a Bywyd Gwyllt yn hybu patrolau ac ymgysylltu.

Mae Heddlu Dyfed Powys wedi ategu eu hymrwymiad i gadw cymunedau gwledig yn ddiogel gyda strategaeth troseddau gwledig a bywyd gwyllt newydd.

Yr amcan yw cynyddu patrolau gan swyddogion troseddau gwledig ac adeiladu perthnasau cryfach gyda chymunedau. Bydd swyddogion yn chwilio am gyfleoedd i ymgysylltu gyda phobl mewn digwyddiadau ac yn cynnig mwy o ymweliadau atal trosedd.

Mae tîm troseddau gwledig Heddlu Dyfed Powys, sy’n gweithio yn yr ardal heddlu ehangaf a mwyaf gwledig yng Nghymru a Lloegr, yn gyfrifol am ardal enfawr. Maent yn gweithio i fynd i’r afael â throseddau sy’n effeithio ar ffermydd, tyddynnau, arfordiroedd a bywyd gwyllt. Amcan gwella eu hamlygrwydd yw sicrhau bod mwy o bobl yn rhoi gwybod am droseddau a chynyddu cudd-wybodaeth yn y cymunedau gwledig hyn.

Dywedodd yr Arolygydd Matthew Howells, o Heddlu Dyfed Powys:

“Yn aml dydy pobl ddim yn rhoi gwybod i ni am droseddau gwledig. Rydyn ni eisiau cryfhau ein presenoldeb, ac ehangu Gwarchod Cefn Gwlad a Gwarchod Ffermydd, er mwyn sicrhau bod mwy o bobl yn rhoi gwybod am droseddau. Bydd hyn yn rhoi data ychwanegol i ni er mwyn llunio ein patrolau a tharfu ar weithgarwch troseddol.”

"Bydd ein swyddogion troseddau gwledig yn hyrwyddo marcio eiddo a diogelwch. Rydyn ni eisiau gostwng achosion o ail-ddioddef troseddu a tharfu ar weithgarwch troseddol.”

Yn 2025, derbyniodd Heddlu Dyfed Powys 49 adroddiad o ddwyn da byw. Fe wnaethant hefyd dderbyn 42 adroddiad o ddwyn beiciau cwad a 60 adroddiad o droseddau treftadaeth. Mae troseddau treftadaeth yn difrodi asedau a safleoedd hanesyddol. Mae’n cynnwys datguddio metel yn anghyfreithlon neu ysbeilio, a defnyddio cerbydau oddi ar y ffordd mewn safleoedd o’r fath.

Y drosedd y derbyniwyd y mwyaf o adroddiadau yn ei chylch oedd aflonyddu ar dda byw. Derbyniwyd 60 adroddiad o hyn yn ystod 2025.

Cyfarfu’r Prif Gwnstabl Ifan Charles yn ddiweddar ag aelodau o’r gymuned ffermio. Ymunodd Dafydd Llywelyn, y Comisiynydd Heddlu a Throsedd, a’r tîm troseddau gwledig ag ef. Fe wnaethant drafod y strategaeth newydd a’r diweddariadau i gyfreithiau aflonyddu ar dda byw.

Roedd y cyfarfod ar fferm o eiddo Anwen Hughes, is-lywydd rhanbarthol Undeb Amaethwyr Cymru. Hefyd yn bresennol roedd Rob Taylor, Cydgysylltydd Troseddau Cefn Gwlad a Bywyd Gwyllt Cymru.

Clywodd y grŵp bod Anwen yn ddiweddar wedi colli tri oen yn dilyn ymosodiad da byw. Fe wnaethant siarad am y newidiadau i’r cyfreithiau aflonyddu ar dda byw, a sut i godi ymwybyddiaeth amdanynt. Fe wnaethant hefyd drafod sut y gall y strategaeth troseddau gwledig a bywyd gwyllt helpu cymunedau.

Dywedodd y Prif Gwnstabl Ifan Charles:

“Ni ellir tanbrisio effaith y troseddau hyn ar gymunedau gwledig. Mae bywoliaeth a chartrefi pobl wedi eu hymblethu.

“Pobl mewn cymunedau gwledig sydd wrth galon y strategaeth newydd. Mae diogelu ardaloedd gwledig enfawr Dyfed Powys yn gosod her wahanol i blismona ardaloedd trefol. Bydd ein timau troseddau gwledig yn cydweithio gyda phobl i ddeall yr heriau ac i’w cadw’n ddiogel.”

Gallwch roi gwybod am droseddau gwledig, bywyd gwyllt, a threftadaeth drwy ffonio 101 neu ar-lein wrth fynd at Rhoi gwybod am droseddau gwledig, bywyd gwyllt a threftadaeth - Heddlu Dyfed-Powys. Dylech bob amser ffonio 999 mewn argyfwng.

Gallwch weld y strategaeth troseddau gwledig a bywyd gwyllt newydd ar-lein wrth fynd at: Plismona gwledig | Heddlu Dyfed-Powys