Ymgyrch Vigilant: Aflonyddu ar frwydr stryd, diogelu menywod bregus, a chynnal arést ar gyfer cyffuriau dosbarth A

Mae ymgyrch Prosiect Vigilant a gynhaliwyd yn Sir Benfro wedi bod yn llwyddiant, gyda thimoedd o swyddogion yn mynd i leoliad brwydr stryd, yn sicrhau diogelwch menywod a oedd o bosibl yn agored i niwed, ac yn arestio dyn am feddu ar gyffuriau dosbarth A.

Ymgyrch yw Prosiect Vigilant sy’n gweld swyddogion mewn lifrai ac mewn dillad cyffredin yn gweithredu fel timoedd aflonyddu i atal troseddau rhywiol a threisgar rhag digwydd. Yn ddiweddar, mae’r prosiect hwn wedi’i gyflwyno ledled yr ardal heddlu.

Gwelodd swyddogion yn Sir Benfro gyfle i ddefnyddio Vigilant fel ffordd o gadw pobl yn ddiogel yn ystod noson brysur yn Hwlffordd nos Sadwrn 2 Awst. Patroliodd swyddogion wedi’u hyfforddi’n arbennig o’r Adran Ymchwilio i Droseddau a thimoedd ymateb, yn ogystal â chydweithwyr plismona bro ac atal, y dref, gyda gwybodaeth am ymddygiad amheus neu ymddygiad a oedd yn destun pryder yn cael ei throsglwyddo rhwng y ddau.

Yn ystod y noson, aethpwyd i leoliad anhrefn ar raddfa fawr ar Rodfa Portland. Roedd nifer o bobl wedi adrodd am yr anhrefn hwn. Cefnogwyd timoedd plismona lleol i ymdrin â grŵp o ddynion a oedd yn ymladd ar y stryd, ac arestiwyd dyn am fod yn feddw ac afreolus.

Ymdriniwyd â gyrrwr am yrru heb y gofal a’r sylw dyladwy ar ôl iddo gael ei weld yn gyrru’n afreolaidd yng nghanol y dref, tra bod dyn arall wedi derbyn hysbysiad adran 59 am yrru gwrthgymdeithasol ar Stryd y Cei. Mae hyn yn golygu y gellir atafaelu ei gerbyd os yw’n cael ei ddal yn gyrru mewn modd gwrthgymdeithasol eto o fewn 12 mis.

Cynhaliwyd patrolau helaeth o gwmpas ardaloedd prysur canol y dref a’r cyffiniau, ac ymgysylltwyd â staff drws, aelodau o’r cyhoedd a bugeiliaid stryd. Gwiriodd swyddogion ar les sawl menyw a oedd o bosibl yn agored i niwed, gan gynnwys dwy fenyw 18 oed y daethpwyd o hyd iddynt yng nghwmni dynion mewn ardal ddiarffordd. Sicrhaodd swyddogion eu bod nhw’n ddiogel, gan esbonio diben eu gwaith a rhoi cyngor diogelwch priodol.  

Rywle arall, arestiwyd dyn am feddu ar gyffur dosbarth A ar ôl i dîm mewn dillad cyffredin ei weld yn ymddwyn yn amheus.

Dywedodd y Ditectif Ringyll Vinny Barrett, a gydlynodd yr ymgyrch: “Nod Vigilant yw sicrhau diogelwch pobl ar noson mas yn bennaf, ac atal troseddau rhywiol neu ddifrifol rhag digwydd. Yn yr achos hwn, roeddem yn gofalu am bawb a oedd allan yn Hwlffordd ar noson brysur, a sicrhau bod pawb yn medru mwynhau’n ddiogel.  

“Mae atal yn rhan bwysig iawn o blismona, a thrwy weithio gyda thimoedd o swyddogion sy’n cadw llygad am ymddygiad troseddol posibl ac yn aflonyddu arno, gallwn wneud gwahaniaeth gwirioneddol o ran atal troseddau posibl cyn iddynt ddigwydd.”

Cewch ragor o wybodaeth am Brosiect Vigilant fan hyn.