Atal trais a chadw pobl yn ddiogel

Gall trosglwyddo gwybodaeth i sefydliadau megis Crimestoppers neu Fearless nid yn unig helpu ar ôl trosedd neu ddigwyddiad, ond yn hollbwysig atal rhywbeth rhag digwydd.

Gallai hyn olygu y gall rhywun gael ei arbed rhag cael ei frifo, neu ei helpu cyn iddo gyflawni trosedd a mynd i’r system cyfiawnder troseddol.

Mae’r heddlu’n poeni am bobl ifanc a byddai’n well ganddynt bob amser atal trosedd yn hytrach na’i chanfod gan fod hyn yn golygu bod rhywbeth wedi digwydd i rywun. Nid ydynt byth eisiau gweld person ifanc yn cael ei frifo neu mewn trafferth os gellir atal hynny. Byddant bob amser yn helpu os bydd rhywun yn teimlo dan fygythiad, ofn neu’n meddwl eu bod mewn perygl o niwed.

Mae Fearless yn rhan o elusen Crimestoppers. Gallwch gysylltu â’r ddau fudiad yn gwbl ddienw ac maent yn gwbl annibynnol ar yr heddlu.

Nid ydynt byth yn gofyn am eich enw, ni allant olrhain eich galwad nac unrhyw ddyfais electronig megis eich ffôn neu gyfrifiadur ac nid oes neb byth yn gwybod eich bod wedi trosglwyddo gwybodaeth.

Gallai gwybodaeth hollbwysig gynnwys:

• Gwybodaeth am bwy sy’n delio cyffuriau yn yr ardal – hyd yn oed os mai dim ond amheuaeth ydyw.
• Pobl rydych chi’n credu sy’n gysylltiedig â gang neu droseddau cyfundrefnol.
• Gwybodaeth am weithgarwch gangiau – yn enwedig os oes bygythiad o drais neu ddial ar fin digwydd.
• Pobl rydych yn amau eu bod yn gofyn i bobl ifanc wneud pethau yn gyfnewid am arian, dillad, ffonau neu eitemau eraill.
• Pobl rydych chi’n credu sy’n cario cyllyll neu arfau.
• Unrhyw wybodaeth am sefyllfa lle mae rhywun yn cael ei ecsbloetio neu orfodi’n rhywiol.
• Pobl ifanc sy’n mynd ar goll yn aml ac na allant neu na fyddant yn dweud ble maent wedi bod.
• Rhifau ffôn, pobl, ceir, lleoliadau neu arfau rydych chi’n credu sy’n ymwneud â, neu wedi bod yn ymwneud â, throseddau.
• Pobl ifanc sy’n bryderus, mewn ofn neu’n ofidus neu sydd ag anafiadau y maent yn bod yn gyfrinachol yn eu cylch.
• Gwefannau neu safleoedd cyfryngau cymdeithasol lle mae tystiolaeth o droseddau yn cael ei dangos – yn cynnig gwerthu cyffuriau neu arfau, gweithredoedd treisgar neu annog trais.

Os oes gennych chi wybodaeth neu os ydych chi’n poeni am eich diogelwch eich hun neu ddiogelwch ffrind neu aelod o’r teulu – dywedwch.

Gallwch gysylltu â’ch tîm plismona bro neu gallwch ffonio 101 a gofyn i gael siarad â’ch heddlu lleol.

Os nad ydych eisiau siarad â’r heddlu yna cysylltwch â naill ai Crimestoppers neu Fearless.

Gallwch hefyd gael cyngor ar wahanol fathau o droseddau a darllen am ganlyniadau posibl dod i gysylltiad â’r broses gyfreithiol.