Rydw i angen help

Ydych chi dan bwysau i ddelio cyffuriau neu gario cyllell, gwn neu arf arall? Ydych chi eisoes yn gysylltiedig â gang neu droseddu? Ydych chi eisoes yn cario cyllell?

Os ydych, efallai y byddwch yn teimlo bod eich bywyd allan o reolaeth, eich bod yn edrych dros eich ysgwydd drwy’r amser ac nad oes ffordd allan. Efallai y byddwch yn meddwl y bydd hi’n waeth ceisio dod allan o gang a bod angen i chi gario arf i’ch amddiffyn. Y gwir yw, mae’n fwy peryglus dal ati fel yr ydych ar hyn o bryd. Ond rydych chi yma yn chwilio am help, sy’n ddechrau da ac mae yna lawer o sefydliadau ac elusennau sydd eisiau eich helpu.

Beth allwch chi ei wneud?

Mae llawer o help a chefnogaeth ar gael.

Os ydych chi’n poeni am eich diogelwch, siaradwch â rhywun - rhiant, athro, athrawes, gweithiwr ieuenctid neu swyddog heddlu er enghraifft. Nid oes unrhyw un eisiau eich gweld chi’n cael eich brifo.

Os nad ydych yn teimlo y gallwch siarad â’ch rhieni, athro, athrawes neu’r heddlu, siaradwch â gweithiwr proffesiynol yn gyfrinachol. Gallai ChildLine fod yn alwad gyntaf i chi ar 0800 1111 – gall y cwnselwyr gefnogi pobl ifanc 24 awr y dydd.

Mae’r heddlu’n poeni am bobl ifanc a byddai’n well ganddynt bob amser atal trosedd yn hytrach na chanfod trosedd gan fod hyn yn golygu bod rhywbeth wedi digwydd i rywun. Nid ydynt byth eisiau gweld person ifanc yn cael ei frifo neu mewn trafferth os gellir atal hynny. Byddant bob amser yn helpu os bydd rhywun yn teimlo dan fygythiad, ofn neu’n meddwl eu bod mewn perygl o niwed.

Beth arall allwch chi ei wneud?

• Arfau – os na fyddwch yn mynd ag arf gyda chi, ni fydd yn cael ei ddefnyddio.
• Anwybyddwch wawdio neu feirniadu ar gyfryngau cymdeithasol.
• Er mai cerdded i ffwrdd yw’r peth anoddaf i’w wneud yn aml, dyma’r peth mwyaf diogel ac ni fyddwch yn mynd i drafferth gyda’r heddlu – mae’n rhaid bod aros yn fyw i ofalu am eich teulu a gwireddu eich potensial yn werth hynny. Edrychwch ar y darlun mwy.
• Mae Fearless yn cynnig cyngor ac arweiniad; mae yna hefyd dudalen lle gallwch drosglwyddo gwybodaeth am drosedd yn ddienw.
• Gall Ymddiriedolaeth y Tywysog helpu i ddarparu cefnogaeth a chyfleoedd i bobl ifanc, yn enwedig pobl ifanc sy’n symud oddi wrth gangiau a throseddu. Mae wedi helpu miloedd o bobl ifanc.
• Ffoniwch 999 bob amser os ydych yn poeni bod rhywun mewn perygl. Mae’r heddlu yno i’ch helpu a’ch cadw’n ddiogel.

Beth ddylech ei wneud os ydych chi eisoes wedi anafu rhywun?

• Os ydych chi wedi defnyddio arf i anafu rhywun, mae’n debyg eich bod yn teimlo cymysgedd o wahanol emosiynau: ofn, euogrwydd, dicter, pryder.
• Rhaid i chi gyfaddef eich gweithred. Bydd yn helpu os byddwch yn rhagweithiol ac yn siarad â’r heddlu. Bydd faint o drafferth y byddwch ynddo yn llawer gwaeth os canfyddir y gwir yn ddiweddarach na phe byddech yn gwneud y peth iawn nawr.
• Os ydych am siarad â’r heddlu, cysylltwch â’ch Swyddog Cyswllt Ysgolion, eich Tîm Plismona Bro lleol neu ewch i’ch gorsaf heddlu agosaf. Os yw’n argyfwng, ffoniwch 999 nawr.
• Gallwch hefyd ffonio elusen Crimestoppers yn ddienw a 0800 555 111 (Nid oes angen i chi roi eich enw ac ni fydd eich galwad yn cael ei holrhain).

Ydych chi wedi dioddef trosedd cyllyll?

Os ydych chi wedi dioddef trosedd cyllyll neu ynnau, mae’n debyg eich bod yn mynd trwy gymysgedd eang o emosiynau - ofn, dicter, poen. Efallai ei fod yn ymosodiad ar hap, neu efallai eich bod mewn gang a bod hynny’n mynd i ddigwydd yn hwyr neu’n hwyrach. Efallai eich bod yn cael eich bwlio a bod y bwlio wedi gwaethygu’n fawr.

Heb os, cael eich anafu gan gyllell neu wn yw un o’r pethau gwaethaf sydd wedi digwydd i chi. Gall hyd yn oed cael eich bygwth ag arf fod yn hynod o frawychus. Peidiwch â bod ag embaras gofyn am help – mae angen cymorth arnoch ac mae llawer o ffyrdd y gallwch siarad â rhywun yn ddienw.

Os nad yw’r heddlu wedi cael gwybod yn barod, yna dylech chi neu rywun sy’n agos atoch gysylltu â nhw ar unwaith drwy siarad â’ch Swyddog Cyswllt Ysgolion, eich Tîm Plismona Bro, neu drwy fynd i’ch gorsaf heddlu agosaf.

Os yw’n argyfwng, a’ch bod yn dal i deimlo eich bod mewn perygl, mae angen i chi ffonio 999 nawr.

Ei riportio

Os nad ydych am wneud yr alwad i’r heddlu neu ei riportio ar-lein, siaradwch â rhywun megis rhiant neu athro - gallant wneud yr alwad ar eich rhan.

Hefyd, nid oes raid i chi siarad â’r heddlu os nad ydych eisiau. Gallech ffonio elusen Crimestoppers yn ddienw ar 0800 555 111. Bydd eich galwad yn cael ei thrin yn gwbl gyfrinachol – nid oes angen i chi roi eich enw, ac ni fydd eich galwad yn cael ei holrhain.

Os ydych wedi cael eich bygwth ond heb eich anafu, mae’n dal i fod yn fater i’r heddlu a rhaid ei riportio er eich diogelwch eich hun.